
马尔巴大师教言集MARPA14རྗེ་བཙུན་མར་པའི་གསུང་མགུར།
1-1-215a
༄༅། །རྗེ་བཙུན་མར་པའི་གསུང་མགུར།
༄། །ཡོངས་སུ་གྲགས་པའི་ལམ་གླུ་རིང་མོ།
༄། །བླ་མ་དམ་པ་རྣམས་ལ་ཕྱག་འཚལ་ལོ། །རྗེ་མར་པ་ལོ་ཚ་(ཙཱ་)བས། རྒྱ་གར་དུ་ལོ་བཅུ་དགུ་བཞུགས་ཏེ། ནད་ཀྱི་ཐ་མར་བོད་དུ་གཤེགས་པར་བཞེད་ནས། ཧ་ལ་པར་བ་ཏ་དུག་མཚོ་ཁོལ་མའི་དོ་རི་ལ། དཔལ་ཞི་བ་བཟང་པོ་བཞུགས་ནས། བླ་མ་ལ་ཕྱི་ཕྱག་སྐྱེལ་དུ་ཕྱིན་ཏེ། ཚུར་ལོག་ནས། ཤིང་ཨ་མྲའི་ཚལ་དུ་ཉལ་བའི་ནུབ་མོ་བསམ་པ་ཅུང་ཞིག་བཏང་བས། ཡོང་ཚེ་འདི་ལ་བར་ཆོད་མེད་པར་སྒྲ་སྐད་མཁས་པའི་ཚད་ཅིག་ལོབས། རྒྱུད་འགྲེལ་མང་པོ་ཡང་ཤེས། ད་འགྲོ་བ་ཤིན་ཏུ་བྲོད་པ་ལ། བླ་མ་སྐུ་དྲིན་ཅན་དང་མཆེད་གྲོགས་སྙིང་དང་འདྲ་བ་རྣམས་ཤུལ་དུ་ལུས་པ་ཡང་སེམས་པ་འཕྲེང་། ལམ་གྱི་གཅན་འཕྲང་དང་། ཟམ་པ་མང་པོ་ཡོད་པ་ཤིན་ཏུ་འཚེར་ནས། དེའི་དུས་སུ་ལམ་གླུ་རིང་མོ་འདི་འགུར་དུ་བཞེངས་པ་ཡིན་གསུང་། རྗེ་འགྲོ་བ་འདྲེན་མཛད་སྐུ་དྲིན་ཅན། །གྲུབ་ཐོབ་རྒྱུད་པའི་བླ་མ་རྣམས། །མི་ཁོ་བོའི་སྤྱི་གཙུག་བརྒྱན་(རྒྱན་)དུ་བཞུགས། །བཞུགས་ནས་བྱིན་གྱིས་བརླབ་དུ་(ཏུ་)གསོལ། །ཁྱེད་རྒྱ་གར་གྱི་ན་རོ་པན་ཆེན་དང་། །ང་བོད་ཡུལ་གྱི་མར་པ་ལོ་ཚ་(ཙྰ་)གཉིས། །དང་པོ་ཞལ་མཐོང་འཇལ་ནས་ཀྱང་། །ལོ་དྲུག་དང་ནི་ཟླ་བ་བདུན། །དུས་སྐད་ཅིག་མ་བྲལ་འགྲོགས་པའི་ཕྱིར། །ཐུགས་ལ་མི་འདོགས་ཀྱི་ས་མ་མཆིས། །དཔལ་མེ་ཏོག་དཔུངས་པའི་དགོན་པ་དེར། །དབང་བཞིའི་ཆུ་བོ་རྫོགས་པར་སྐུར། །སྙན་རྒྱུད་ཀྱི་གདམས་ངག་མཐར་ཐུག་གནང་། །བླ་མེད་ཐེག་པ་མཆོག་གི་དོན། །གཉིས་མེད་རྩེ་གཅིག་གཞིར་བཞག་ནས། །སེམས་སྟོང་པ་ཉིད་ལ་སྦར་ཟིན་བྱས། །ཁ་བ་ཅན་འདབ་བྱང་ཕྱོགས་སུ། །ལུང་བསྟན་རྒྱལ་ཚབ་
1-1-215b
བསྐོས་པའི་ཕྱིར། །ད་ནི་བན་ཆུང་བོད་དུ་འགྲོ། །བན་ཆུང་བོད་དུ་འགྲོ་བ་ལ། །ཤུལ་ན་འཕྲེང་བ་རྣམས་གསུམ་ཡོད། །ཡིད་ལ་བཅགས་པ་རྣམ་གསུམ་ཡོད། །ལམ་ན་འཇིགས་པ་རྣམ་གསུམ་ཡོད། །བར་ན་འཚེར་བ་རྣམ་གསུམ་ཡོད། །གདོད་ན་བྲོད་པ་རྣམ་གསུམ་ཡོད། །ངོ་མཚར་ཆེ་བ་རྣམ་གསུམ་ཡོད། །གླུ་དེའི་ཕྱི་རྗེས་མ་བཅད་ན། །ཚིག་དེས་དོན་གྱི་བརྡའ་མི་འཇལ། །རྗེ་ན་རོ་དང་མཱེ་ཏྲིས་དབུ་མཛད་ནས། །གྲུབ་ཐོབ་ཀྱི་བླ་མ་བརྒྱ་རྩ་བརྒྱད། །འདི་ཤུལ་ན་ལུས་ཏེ་མ་བས་འཕྲེང་། །དཔལ་འཇིགས་མེད་གྲགས་པས་དབུ་མཛད་ནས། །མཆེད་དང་ལྕམ་དྲལ་བརྒྱ་རྩ་བརྒྱད། །འདི་ཤུལ་ན་ལུས་ཏེ་མ་བས་འཕྲེང་། །གནས་པུ་ལ་ཧ་རིས་སྣ་དྲངས་ནས། །གྲུབ་ཐོབ་ཀྱི་གནས་ཆེན་བརྒྱ་རྩ་བརྒྱད། །འདི་ཤུལ་དུ་ལུས་ཏེ་མ་བས་འཕྲེང་། །ལྷ་དྷརྨ་བོ་དེ་ཨ་ཤོ་ཀ །དྲིན་ཅན་གྱི་གནས་པོ་ཕོ་མོ་རྣམས། །ད་འབྲལ་མི་ཕོད་དེ་ཡིད་ལ་བཅགས། །བྲམ་ཟེའི་ཁྱེའུ་གསེར་འཕྲེང་ཅན། །ཤི་སྲོག་གིས་མཐུད་པའི་གྲོགས་པོ་བྱས། །ད་འབྲལ་མི་ཕོད་དེ་ཡིད་ལ་བཅགས། །དེད་དཔོན་གྱི་བུ་མོ་སྔོ་བསངས་མ། །མཚན་ལྡན་གྱི་ཕྱག་རྒྱར་བསྟེན་བསྟེན་ནས། །ད་འབྲལ་མི་ཕོད་དེ་ཡིད་ལ་བཅགས། །ལྷོ་དུག་མཚོ་ཁོལ་མས་སྣ་དྲངས་ནས། །ཤར་ཆུ་བོ་གང་ག་ད་བཟོད་རྒལ། །འདི་མ་མཐོང་གི་གོང་ནས་ང་རེ་འཇིགས། །རི་ཨུ་ཤི་རིའི་ནགས་འདབ་ན། །མི་རྐུན་གྱི་ཇག་པས་ལམ་ན་བསྒྲུགས། །འདི་མ་མཐོང་གི་གོང་ནས་ང་རེ་འཇིགས། །གྲོང་ཁྱེར་ཏི་ར་ཧུ་ཏི་ན། །ཁྲེལ་མེད་ཀྱི་ཤོ་གམ་བཅུ་གཅིག་འབེབས། །འདི་མ་མཐོང་གི་གོང་ནས་ང་རེ་འཇིགས། །འཕྲང་པ་ལ་ཧ་ཏི་མ་གཏོགས་པ། །གཅན་འཕྲང་གི་ཟམ་པ་བརྒྱ་བཅུ་གཅིག །ཨེ་མ་དངུལ་ཆུ་བས་ཀྱང་འཚེར། །ལ་ཁ་ལ་བྱ་ལ་མ་གཏོགས་པར། །ལ་ཆེན་
1-1-216a
དང་ལ་ཆུང་བརྒྱ་བཅུ་གཅིག །ཨེ་མ་དངུལ་ཆུ་བས་ཀྱང་འཚེར། །ཐང་དཔལ་མོ་དང་དཔལ་ཐང་མ་གཏོགས་པ། །ཐང་ཆེན་དང་ཐང་ཆུང་བརྒྱ་བཅུ་གཅིག །ཨེ་མ་དངུལ་ཆུ་བས་ཀྱང་འཚེར། །སྒྲ་ཀ་ལ་ཙན་ཏྲས་སྣ་དྲངས་ནས། །སྐད་སྣ་བརྒྱ་དང་རྩ་བརྒྱད་ཤེས། གྲོགས་ལོ་ཚ་(ཙཱ་)འཚོགས་ན་ང་རེ་བྲོད། །དཔལ་དགྱེས་རྡོར་དང་གདན་གཞིས་(བཞིས་)སྣ་དྲངས་ནས། །རྒྱུད་འགྲེལ་བརྒྱ་དང་རྩ་བརྒྱད་ཤེས། །གྲོགས་སྟོན་ཆེན་འཚོགས་ན་ང་རེ་བྲོད། །ཀ་བཞིའི་གདམས་པས་སྣ་དྲངས་ནས། །སྙན་རྒྱུད་བརྒྱ་དང་རྩ་བརྒྱད་ཤེས། །གྲོགས་བསྒོམ་(སྒོམ་)ཆེན་འཚོགས་ན་ང་རེ་བོད། །བསྲེ་བ་དང་འཕོ་བ་མ་གཏོགས་པ། །ཁྱད་ཆོས་བརྒྱ་དང་རྩ་བརྒྱད་ཤེས། །ཆེ་ན་ངོ་མཚར་དེ་ཆེ་མོད། །དུར་སོལ་གྱི་ལྷ་མོ་མ་གཏོགས་པ། །བསྟན་བསྲུངས་བརྒྱ་དང་རྩ་བརྒྱད་ཤེས། །ཆེ་ན་ངོ་མཚར་དེ་ཆེ་མོད། །རིམ་ལྔའི་དམར་ཁྲིད་མ་གཏོགས་པ། །རྫོགས་རིམས་བརྒྱ་དང་རྩ་བརྒྱད་ཤེས། །ཆེ་ན་ངོ་མཚར་དེ་ཆེ་མོད། །དེ་ཐམས་ཅད་བླ་མ་རྗེའི་དྲིན། །འབངས་དྲིན་ལན་གཞལ་གྱིས་མི་འཁོར་བས། །རྗེ་མི་འབྲལ་གཙུག་གི་རྒྱན་དུ་བཞུགས། །དེ་འོག་མཆེད་དང་ལྕམ་དྲལ་རྣམས། །ང་བན་ཆུང་བོད་དུ་འགྲོ་བ་ལ། །རྐྱེན་བར་ཆད་མེད་པར་བྱིན་རླབས་ཞུ། །དུས་འདི་ལ་མཇལ་ཏེ་ཡོངས་མི་མཆི། །དཔལ་ཨུ་རྒྱན་ཡུལ་ལམ་མཁའ་སྤྱོད་དུ། །ཚེ་ཕྱི་མ་ཅིས་ཀྱང་འཇལ་(མཇལ་)བར་ཞུ། །ཞེས་བླ་མ་ལོ་ཚ་(ཙཱ་)བ་ཆེན་པོས་འགུར་དེ་སྐད་དུ་བཞེངས་པ་ལས། མཆེད་གྲོགས་གོང་མར་གྱུར་པ་བྲམ་ཟེ་ས་མུད་ཏ་ཀིར་ཏི་དང་། རྣལ་འབྱོར་མ་སུ་ཁ་ཌ་རི་ལ་སོགས་པ་ཕོ་མོ་བརྒྱད་ཀྱིས་སྤྱན་ཆབ་ཤོར་སྐད་དོ། །དེ་ཐམས་ཅད་ཀྱིས་བྱིན་གྱིས་རླབས་པ་དང་། རྗེས་སུ་གནང་བ་གནང་བ་མཛད་དེ་བྱོན་པས། །ཡུལ་
1-1-216b
ལྷོ་བྲག་ཏུ་བྱོན་ནས་སྐུ་ཚེ་མཐར་སྐྱོལ་གྱི་བར་དུ་ཐུགས་དགོངས་ལ་བར་ཆད་མེད་དེ། འགྲོ་བ་མང་པོ་ལ་ཕན་ཐོགས། ཤིན་ཏུ་ཞལ་གྲོ་ཞིང་། བཀྲ་ཤིས་པར་བྱུང་སྐད་དོ། །རྗེ་མར་པ་ལོ་ཚ་(ཙཱ་)བའི་ཡོངས་སུ་གྲགས་པའི་ལམ་གླུ་རིང་མོའོ།། །།
༄། །དབང་གི་རྟོགས་པ་ཕུལ་བའི་མགུར།
རྗེ་བཙུན་མར་པ་ལྷོ་བྲག་པས། རྒྱ་གར་ཡུལ་དུ་ལན་གསུམ་བྱོན་ནས། དཀའ་བ་དཔག་ཏུ་མེད་པ་སྤྱད་པའི་ཕྱི་ཏ་ལ། འགུར་འདི་བཞེངས་པ་ཡིན་སྐད། ན་རོ་པན་ཆེན་མ་གཏོགས་པའི། །བླ་མ་བརྒྱ་དང་བརྒྱད་བཅུ་(ཅུ་)གཅིག །མ་གཅིག་པས་ཀྱང་ཤུལ་ན་འཕྲེང་། །པུ་ལ་ཧ་རི་མ་གཏོགས་པའི། །དགོན་པ་བརྒྱ་དང་བརྒྱ་བཅུ་གཅིག །འདི་མ་ཅིག་(གཅིག་)པས་ཀྱང་ཤུལ་ན་འཕྲེང་། །རྡོ་རྗེ་གདན་དྲུང་མ་བཏོགས་པ། །རྟེན་བཟང་པོ་བརྒྱ་དང་བརྒྱ་བཅུ་གཅིག །འདི་མ་གཅིག་པས་ཀྱང་ཤུལ་ན་འཕྲེང་། །རྒྱ་གར་འཛི་གོལ་མ་གཏོགས་པ། །ཆང་སྣ་བརྒྱ་དང་བརྒྱ་བཅུ་གཅིག །འདི་མ་གཅིག་པས་ཀྱང་ཤུལ་ན་འཕྲེང་། །འབྲས་ས་ལུ་གཞུང་སྔོན་མ་གཏོགས་པའི། །ཟས་སྣ་བརྒྱ་དང་བརྒྱ་བཅུ་གཅིག །འདི་མ་གཅིག་པས་ཀྱང་ཤུལ་ན་འཕྲེང་། །གནས་པོ་འབའ་རོ་མ་གཏོགས་པ། །གནས་པོ་བརྒྱ་དང་བརྒྱ་བཅུ་གཅིག །འདི་མ་ཅིག་(གཅིག་)པས་ཀྱང་ཤུལ་ན་འཕྲེང་། །འདི་དྲུག་འཕྲེང་བའི་འཕྲེང་དྲུག་ལགས། །དུག་མཚོ་ནག་མོ་མ་གཏོགས་པའི། །མཚོ་ཕྲན་བརྒྱ་དང་བརྒྱ་བཅུ་ཅིག(གཅིག) །འདི་དངུལ་ཆུ་བས་ཀྱང་མདུན་ན་འཚེར། །ཆུ་བོ་གང་ག་མ་གཏོགས་པའི། །ཆུ་བྲན་བརྒྱ་དང་བརྒྱ་བཅུ་གཅིག འདི་དངུལ་ཆུ་བས་ཀྱང་མདུན་ན་འཚེར། །མོན་པ་གློ་བག་མ་གཏོགས་པའི། །མི་རྐུན་བརྒྱ་དང་བརྒྱ་བཅུ་གཅིག །འདི་དངུལ་ཆུ་བས་ཀྱང་མདུན་ན་འཚེར། །བལ་པོའི་འཕྲང་རྫས་མ་གཏོགས་པ། །ཤོ་གམ་བརྒྱ་དང་བརྒྱ་བཅུ་གཅིག །འདི་དངུལ་ཆུ་བས་ཀྱང་
1-1-217a
མདུན་ན་འཚེར། ཁ་ལ་དང་བྱ་ལ་མ་གཏོགས་པའི། །ལ་ཕྲན་བརྒྱ་དང་བརྒྱ་བཅུ་གཅིག །འདི་དངུལ་ཆུ་བས་ཀྱང་མདུན་ན་འཚེར། །དཔལ་མོ་དང་དཔལ་ཐང་མ་གཏོགས་པའི། །ཐང་ཕྲན་བརྒྱ་དང་བརྒྱ་བཅུ་གཅིག །འདི་དངུལ་ཆུ་བས་ཀྱང་མདུན་ན་འཚེར། །དེ་ཚོ་འཚེར་བའི་འཚེར་དྲུག་ལགས། །དགྱེས་རྡོར་གདན་གཞི་(བཞི་)མ་གཏོགས་པའི། །རྒྱུད་ཕྲན་བརྒྱ་དང་བརྒྱ་བཅུ་ཤེས། །ཨེ་མ་ངོ་མཚར་རྨད་ཀྱི་ཆོས། །འཕོ་བ་དང་གྲོང་འཇུག་མ་གཏོགས་པའི། །མན་ངག་བརྒྱ་དང་བརྒྱ་བཅུ་ཤེས། །ཨེ་མ་ངོ་མཚར་རྨད་ཀྱི་ཆོས། །གཏུམ་མོ་ལྷུན་གྲུབ་མ་གཏོགས་པའི། །སེམས་འཛིན་བརྒྱ་དང་བརྒྱ་བཅུ་ཤེས། །ཨེ་མ་ངོ་མཚར་རྨད་ཀྱི་ཆོས། །ན་ཚ་བོབས་དབྱུང་མ་གཏོགས་པ། །གེགས་སེལ་བརྒྱ་དང་བརྒྱ་བཅུ་ཤེས། །ཨེ་མ་ངོ་མཚར་རྨད་ཀྱི་ཆོས། །འོད་གསལ་སྒྱུ་ལུས་མ་གཏོགས་པ། བསམ་གཏན་གཉིད་དང་བསྲེ་བ་ཤེས། །ཨེ་མ་ངོ་མཚར་རྨད་ཀྱི་ཆོས། །རྣམ་རྟོག་ལམ་དུ་སློང་བ་ཙ་ན། །ལས་ཀྱི་ཕྱག་རྒྱའི་གདམ་ངག་ཤེས། །ཨེ་མ་ངོ་མཚར་རྨད་ཀྱི་ཆོས། །དེ་ངོ་མཚར་ཆེ་བའི་ཆེ་དྲུག་ལགས། [།རྒྱུད་ཀྱི་རྒྱལ་པོ་དགྱེས་རྡོར་ཤེས། །ན་རོ་པན་ཆེན་གྱི་གདམ་(གདམས་)[།རྒྱུད་ཀྱི་རྒྱལ་པོ་དགྱེས་རྡོར་ཤེས། །ན་རོ་པན་ཆེན་གྱི་གདམ་(གདམས་)ངག་ཡོད། །ད་དགོན་པར་མི་སྡོད་ན་རང་ལ་སྡིག]ངག་ཡོད། །ད་དགོན་པར་མི་སྡོད་ན་རང་ལ་སྡིག]རྒྱུད་ཀྱི་རྒྱལ་པོ་གདན་གཞི་ཤེས། །འཕོ་བ་གྲོང་འཇུག་གི་གདམ་ངག་ཡོད། །ཐ་མལ་དུ་འཆི་ན་རང་ལ་སྡིག །སེམས་འཛིན་ཀྱི་(གྱི་)རྒྱལ་པོ་གཏུམ་མོ་ཤེས། །བཙན་ཐབས་གནད་ཀྱི་གདམ་ངག་ཡོད། །ཉམས་སུ་མི་ལེན་ན་རང་ལ་སྡིག །རླུང་གི་དེ་ཉིད་བདུན་བཅུ་(ཅུ་)ཤེས། །ན་ཚ་བོགས་དབྱུང་གི་གདམ་ངག་ཡོད། །སྨན་པ་འགུགས་ན་རང་ལ་སྡིག །འོད་གསལ་སྒྱུ་ལུས་ཀྱི་གདམ་ངག་ཡོད། །བསམ་གཏན་གཉིད་དང་བསྲེ་བ་ཤེས། །ཐ་མལ་དུ་ཉལ་ན་རང་ལ་སྡིག །རྣམ་རྟོག་ལམ་དུ་སློང་ཙམ་ན། །ལས་ཀྱི་ཕྱག་རྒྱའི་གདམ་ངག་ཡོད། །
1-1-217b
བུ་མོ་སྤེལ་ན་རང་ལ་སྡིག །འདི་དྲུག་སྡིག་པའི་སྡིག་དྲུག་ལགས། །ཞེས་བོད་དུ་འབྱོན་ཁར་གསུངས་སོ། །རྗེ་མར་པ་ཆེན་པོ། དཔལ་ཆེན་ན་རོ་པའི་ཞབས་དྲུང་དུ་ལོ་དྲུག་ཟླ་བ་བདུན་དུ་བཞུགས་ནས། ད་ཟང་ཀྱི་བོད་དུ་བྱོན་ཀར། །བླ་མ་དང་མཁའ་འགྲོ་ལ་གཏང་རག་གི་མཆོད་པ་ཕུལ་བའི་རྗེས་སུ། །ཐུགས་དགོངས་བཏང་བས་ཡོང་བླ་མ་གྲུབ་ཐོབ་དང་མཇལ། །བཀའ་རྒྱུད་སྡེ་ཟབ་མོ་ལ་ཉན་བཤད་བྱས། །གདམ་ངག་ངོ་མཚར་ཅན་ལ་ཐོབ། །ཉམས་ཁྱད་པར་ཅན་སྐྱེས། །དུས་དེ་རིང་ཙམ་ལས་དགའ་བ་མི་འོང་སྙམ་ནས། །བླ་མ་ལ་རྟོགས་པ་ཕུལ་བའི་འགུར་བཞེངས་པ། རྗེ་མཚན་ལྡན་གྱི་བླ་མ་རིན་པོ་ཆེ། །ཁྱོད་སྔོན་སྦྱངས་བསོད་ནམས་བསགས་པའི་ཕྱིར། །སྤྲུལ་སྐུ་ཏེ་ལོ་དངོས་དང་འཇལ། །སྤང་དཀའ་སྲིད་པའི་སྡུག་བསྔལ་ལས། །ཁྱད་དུ་གསོད་པ་བཅུ་གཉིས་མཛད། །དཀའ་བ་སྤྱད་པས་ཐུགས་བལྟམ་སྟེ། །སྐད་ཅིག་ཉིད་ལ་བདེན་པ་གཟིགས། །ཤྲི་ཛྙ་ན་སིད་དྷའི་ཞབས་ལ་འདུད། །ང་སྒྲ་བསྒྱུར་བོད་ཀྱི་བན་ཆུང་འདི། །སྦྱངས་པ་སྔ་མའི་ལས་འབྲེལ་གྱིས། །ན་རོ་པན་ཆེན་ཁྱེད་དང་མཇལ། །རྒྱུད་ཟབ་མོར་གྲགས་པའི་དགྱེས་རྡོར་བསླབས། །སྙིང་པོ་མ་ཧ་མ་ཡ་གནང་། །ཡང་སྙིང་བདེ་མཆོག་སྙན་རྒྱུད་ཞུས། །ལར་རྒྱུད་སྡེ་བཞིའི་ཁོང་སྙིང་ཕྱུང་། །མ་བསྐལ་བ་བཟང་མོས་རྗེས་གནང་བའི། །བྱིན་བརླབས་(རླབས་)ཀྱི་ཆུ་རྒྱུན་མ་ཆད་པས། །དབང་བཞིའི་དོན་ལ་ངོ་སྤྲོད་མཛད། །ཟག་པ་མེད་པའི་ཏིང་འཛིན་སྐྱེས། །ཞག་བདུན་བར་དུ་བརྟན་པ་ཐོབ། །སྲོག་རྩོལ་འཕོ་བ་ཉི་ཟླ་གཉིས། །གཡོ་མེད་ནམ་མཁའི་ཁྱིམ་དུ་ཆུད། །རང་བྱུང་ལྷན་ཅིག་སྐྱེས་པའི་ཉམས། །བདེ་གསལ་མི་རྟོག་ཁོང་ནས་ཤར། །བག་ཆགས་གཉིད་ཀྱི་འཁྲུལ་པ་དེ། །འོད་གསལ་ལམ་
1-1-218a
གྱི་ངོ་བོར་རྟོགས། ཡིད་ཀྱི་འགྱུར་བ་གཟུང་འཛིན་གཉིས། །སྤྲོས་བྲལ་ཆོས་ཀྱི་དབྱིངས་སུ་ཐིམ། །ཕྱི་སྣང་བ་སྒྱུ་མའི་འཁྲུལ་འཁོར་འདི། །སྐྱེ་མེད་བདེ་བ་ཆེན་པོར་རྟོགས། །ནང་འཛིན་པ་སེམས་ཀྱི་ངོ་བོ་དེ། །སྔོན་ཆད་མཛའ་བོ་ཕྲད་པ་བཞིན། སེམས་ཉིད་རང་ངོ་རང་གིས་ཤེས། །ལྐུག་པས་རྨི་ལམ་རྨིས་པ་བཞིན། །བརྗོད་དུ་མེད་པའི་དོན་ཅིག་རྟོགས། །གཞོན་ནུས་བདེ་བ་མྱོང་བ་བཞིན། །སྨྲ་རུ་མེད་པའི་ཉམས་ཅིག་(ཤིག་)ཤར། །ཕ་སྐུ་དྲིན་ཆེ་བོ་ན་རོ་པ། །སྔར་ཡང་དབང་བསྐུར་བྱིན་གྱིས་བརླབས། །ད་ཡང་སྐུ་དྲིན་སྐྱོབ་དུ་(ཏུ་)གསོལ། །ཞེས་རྟོགས་པ་ཕུལ་བས། རྗེ་ན་རོ་པ་ཤིན་ཏུ་མཉེས་པ་ཡིན་གསུང་། །རྗེ་མར་པའི་དབང་གི་རྟོགས་པ་ཕུལ་བའི་འགུར་(མགུར་)ཡིན་ནོ།། །།
༄། །ནཱ་རོ་དང་མཻ་ཏྲི་པའི་བཞེད་གཞུང་གི་རྟོགས་མགུར་ཕུལ་བ།
རྗེ་བཙུན་མར་པ་རྒྱ་གར་ནས་བལ་པོར་བྱོན་ནས། གདན་ཕེབས་པའི་ཕྱི་དེ་ཞག་གཉིས་ན། བླ་མ་ཕམ་འཐིང་པ་ཚེས་བཅུའི་མཆོད་པ་བྱེད་ཅིང་གདའ་སྐད་པ་ལ། དེའི་ཚོགས་གྲལ་དུ་དགེ་སློང་འཇིགས་མེད་གྲགས་པས་དབུ་མཛད་པའི་རྣལ་འབྱོར་པ་ཕོ་མོ་ཉི་ཤུ་རྩམ་འཚོགས་(ཙམ་ཚོགས་)པའི་གྲལ་དུ་བླ་མ་ཕམ་འཐིང་པའི་ཞལ་ནས། །སྤྱིར་ཁྱེད་བོད་བྱ་བ་གླུ་མཁས་པ་ཡིན། །ཁྱད་པར་དུ་ཡང་ལོ་ཚ་(ཙྰ་)བ་ཁྱེད་རྒྱ་གར་དུ་ཡུན་རིང་བཞུགས་པ་ལ། སྲོག་ལ་བར་ཆད་མེད་པར་སློབ་གཉེར་མཐར་ཕྱིན་ནས་འདུག་པས། །བཀྲ་ཤིས་པའི་གླུ་གཅིག་བླང་དགོས། །ཁྱེད་ཀྱི་བླ་མ་མེ་ཏྲི་པ་དེ་ལྟ་བ་གཙོ་བོར་སྨྲ་བ་ཡིན་ཟེར་བས། །ཁོང་གི་དགོངས་པ་ཇི་ལྟར་བཞེད་ཅིང་འདུག་འདིར་བྱུང་བ་ལ། དེའི་དུས་སུ། རྗེ་མེ་ཏྲི་པའི་བཞེད་གཞུང་མ་རྟོགས་པ་ཕུལ་བའི་འགུར་(མགུར་)བཞེངས་པ་ཡིན་གསུང་། །ཕ་རི་ཁྲོད་ཞབས་ཀྱིས་བྱིན་བརླབས་ཤིང་། །
1-1-218b
དགོངས་པའི་མཐར་ཐུག་སྙིང་པོའི་དོན། །ཆོས་ཕྱག་རྒྱ་ཆེ་ལ་མངའ་བརྙེས་པའི། །རྗེ་མངའ་བདག་ཆེན་པོའི་ཞབས་ལ་འདུད། །གྲོགས་སྙིང་དང་འདྲ་བ་རྡོ་རྗེའི་སྤུན། །འབྲལ་ཐབས་མེད་དོ་རང་ཅག་རྣམས། །ཐ་དད་ལུས་ལ་སེམས་རྒྱུད་ཅིག །དཔལ་འཇིགས་མེད་གྲགས་པ་མ་ལགས་སམ། །ང་རྒྱ་གར་དབུས་ནས་ཡོངས་(ཡོང་)པ་དང་། །ཁྱེད་བལ་པོའི་ཐིལ་ན་བཞུགས་པ་གཉིས། །ཚེ་འདུ་བྱེད་དབང་དུ་མ་ཐལ་བར། །དི་རིང་ཁྱད་པར་དུས་བཟངས་ལ། །མཁའ་འགྲོ་མཆོད་པའི་ཚོགས་གྲལ་དུ། །དུས་མཚུངས་ཞལ་ཡར་འཛོམ་པ་དེ། །དམ་ཚིག་ལ་ངོ་ལྐོག་མེད་པར་ངེས། །མི་ཁོ་བོ་ཤིན་ཏུ་སྤྲོ་བ་སྐྱེ། །ཁྱེད་དགའ་རུ་ཚོར་རམ་འདིར་བཞུགས་རྣམས། །ང་མགོ་རྨོངས་བོད་ཀྱི་བན་ཆུང་ལ། །མི་ཁྱེད་ཀྱིས་མཚན་སྙན་ལོ་ཚར་བཏགས། །ཁྱེད་སྒྲ་བསྒྱུར་བོད་ཀྱི་གླུ་ལོང་གསུངས། །ང་འདྲེན་པའི་གྲེ་འགྱུར་མི་བདེ་ཡང་། །ཁྱེད་ཕོ་བོ་གོང་མའི་གནད་མི་ཐེག །རྗེ་ན་རོ་མེ་ཏྲི་རྣམ་གཉིས་ལ། །སྐུ་དྲིན་རྗེས་སུ་དྲན་པའི་གླུ། །ངོ་མཚར་ཅན་གྱི་མཐོང་ལུགས་ཡོད། །སྙན་ཅ་རེ་གསོན་ཅིག་ལྕམ་གྲལ་རྣམས། །རྗེ་རྟོགས་ཚད་ཅན་གྱིས་མེ་ཏྲི་བ། ཁོང་གི་སྙན་པ་རྒྱང་ནས་ཁུམས། །སྤྲུལ་སྐུའི་བཞུགས་གནས་རྒྱ་གར་ཡུལ། །ལྗོངས་ཡངས་པ་ཅན་གྱི་དབུས་གྱུར་དུ། །ས་སྐྱོང་རྒྱལ་པོ་ཅོད་ཕན་(པན་)གྱིས། །ཞབས་རྡུལ་ཟེའུ་འབྲུས་ལེན་གྱུར་ཅིང་། །གནས་ལྔ་རིག་པའི་མཁས་པ་རྣམས། །མངའ་བདག་གཙུག་གི་རྒྱན་ཡིན་ཞེས(ཅེས)། །སྙན་པའི་བ་དན་ཕྱོགས་བཅུར་གྲགས། །ཆོ་འཕྲུལ་བྱའི་ལོ་དུས་ལ། །བདེ་གཤེགས་མཆོད་པ་མངའ་མཛོད་ཕྱིར། །མཚན་མངའ་བདག་ཞེས་(ཅེས་)བྱར་ཡོངས་སུ་གྲགས། །ཕ་སངས་རྒྱས་དེའི་ཞལ་སྔ་ནས། །ཐེག་པའི་མཐར་
1-1-219a
ཐུག་སྙིང་པོའི་དོན། མཐའ་བྲལ་ཡིད་ལ་མི་བྱེད་པ། །ཆོས་ཕྱག་རྒྱ་ཆེ་ལ་ངོ་སྤྲོད་བགྱིས། །ཕྱི་བཟུང་བ་ཡུལ་གྱི་སྣང་བ་འདི། །བདལ་བ་ཆེན་པོ་རྒྱུན་ཆད་མེད། །སྐྱེ་མེད་ཆོས་ཀྱི་སྐུ་རུ་རྟོགས། །ནང་འཛིན་པ་ཡིད་ཀྱི་རྣམ་ཤེས་འདི། །འགྱུ་བ་ངོས་བཟུང་མེད་པའི་ཕྱིར། །རིག་པ་རྟེན་མེད་གཅེར་བུར་མཐོང་། །སྣང་ཞིང་སྲིད་པའི་ཆོས་རྣམས་ཀུན། །གདོད་ནས་མ་གྲུབ་སྐྱེ་བ་མེད། །ངོ་བོ་སྤྲོས་དང་བྲལ་བར་རྟོགས། །མར་འཁོར་བ་སྤང་བྱར་མི་འདོད་ཅིང་། །ཡར་མྱ་ངན་འདས་པ་བསྒྲུབ་བྱར་མེད། །འཁོར་འདས་རང་གྲོལ་གཉུག་མའི་ངང་། །ཟུང་འཇུག་བདེ་བ་ཆེན་པོར་རྟོགས། །དུས་གསུམ་སངས་རྒྱས་ཀྱི་བཅུད་ཕྱུང་ཡང་། །མཐར་ཐུག་དེ་ལས་མེད་དོ་གསུང་། །མི་ཁོ་བོའི་སྒྲོ་འདོགས་དེ་ནས་ཆོད། །དེ་རྗེ་མེ་ཏྲི་བའི་བཞེད་གཞུང་ལགས། །ཁྱེད་ལྟ་བ་བཞེད་ན་དེ་ལ་མཛོད། །དབྱངས་མཆོད་པར་བཞེས་ཅིག་(ཤིག་)དཀོན་མཆོག་གསུམ། །ཐུགས་དགྱེས་པ་དགོངས་ཅིག་(ཤིག་)གདན་གང་རྣམས། །ཞེས་གསུངས་སོ།། །།ཡང་རྗེ་ཕ་མཐིང་བའི་ཞལ་ནས། རྗེ་མེ་ཏྲི་བའི་དགོངས་པ་དེ་ངོ་མཚར་ཤིན་ཏུ་ཆེ་ན། འོ་སྐོལ་རང་གི་བླ་མ་དང་ཁྱེད་གང་དུ་མཇལ། སྐུ་ཆེ་བའི་ཡོན་ཏན་ཁྱད་པར་ཅན་ནམ། ངོ་མཚར་ཆེ་བའི་ལྟས་ཅི་མཐོང་ཞེས་འདྲི་རུ་བྱུང་ལ། །སྐུ་དྲིན་རྗེས་སུ་དྲན་པའི་འགུར་(མགུར་)འདི་བཞེངས་པ་ཡིན་གསུང་། མཚན་བརྗོད་པར་དཀའ་བའི་ན་རོ་པ། །ཕ་རྗེ་བཙུན་དེའི་དྲིན་ཐོབ་པ། །དཔལ་ཀ་ན་ཀ་ཤྲཱིས་དབུ་མཛད་ནས། །ཁྱེད་འདིར་བཞུགས་གསོན་ཅིག་མཆེད་གྲོགས་རྣམས། །མི་ང་རང་གང་ཡིན་ཟེར་ཙམ་ན། །མཚན་སྙན་མར་པའི་ལོ་ཚ་(ཙཱ་)ཡིན། །ལྟེ་བ་བོད་ཡུལ་དབུས་སུ་བཅང་། །སྦྱངས་པ་ལྷོ་བལ་ཕྱོགས་སུ་བགྱིས། །ལར་རྒྱ་གར་ཡུལ་དུ་ལན་གསུམ་
1-1-219b
ཕྱིན། །དུས་ད་རེས་ནན་ཏན་ཞུ་ཏུག་བགྱིས། །ཞབས་པད་སྤྱི་བོར་རེག་མཛད་ཅིང་། །གསུང་དོན་བདུད་རྩི་རྗེས་གནང་བའི། །ཆོས་འབྲེལ་བ་ཙམ་གྱི་བླ་མ་ཡང་། །དཔལ་སིང་ག་གླིང་པས་སྣ་དྲངས་ནས། །མངོན་ཤེས་རིག་པ་མངའ་བརྙེས་ཤིང་། །སྣང་བ་བསྒྱུར་ནུས་བཅུ་གསུམ་བཞུགས། །ཀུན་གྱི་ནང་ན་མཆོད་སྡོང་བཞིན། །རྗེ་འགྲན་ཟླ་མེད་པའི་ན་རོ་པ། །རྡོ་རྗེ་འཆང་ཆེན་མི་གཟུགས་ཅན། །རྗེ་ཁོང་གི་སྐུ་དྲིན་ཁོར་ཐབས་མེད། །ཕ་ཡིད་ལ་གཅགས་སོ་སྤྲུལ་པའི་སྐུ། །མི་ཁོ་བོས་མ་བཙལ་ས་ཕྱོགས་མེད། །ཞལ་ཡང་དེ་མཇལ་དེ་མ་མཇལ། །རི་མུན་པ་ཅན་གྱི་ནགས་འདབ་དུ(ཏུ)། །ངོ་མཚར་ཤེལ་གྱི་ཕ་བོང་ལ། །རྒྱུ་ལ་འབུར་དུ་བརྐོས་པ་བཞིན། །ཕ་རྗེ་བཙུན་གཤེགས་པའི་ཞབས་རྗེས་མཐོང་། །ལར་ཆེ་ན་ངོ་མཚར་དེ་ཆེ་མོད། །ང་རང་དབང་མེད་པའི་མཆི་མ་ཤོར། །ངུ་སྙིང་འདོད་པའི་གདུང་བ་སྐྱེས། །རབ་ཏུ་མ་བཟོད་སྨྲེ་སྔགས་བཏོན། །རྩེ་གཅིག་ཡིད་ཀྱིས་གསོལ་བ་བཏབ། །རྗེ་ཐུགས་རྗེས་གཟིགས་ནས་མངོན་དུ་བྱོན། །ཡོང་མཐོང་ལམ་ལྟ་བུའི་དགའ་བ་སྐྱེད། །ཆེ་ན་ངོ་མཚར་དེ་ཆེ་མོད། །དཀོན་པའི་རིན་ཆེན་གསེར་ཕྱེ་ཕུལ། །ང་ནི་དེ་ཀུན་མི་འདོད་གསུང་། །ཡང་ཡང་བསྐྱར་ཏེ་བཞེས་པར་ཞུས། །ལྟོས་མེད་ནགས་ཀྱི་གསེབ་ཏུ་གཏོར། །བླ་མ་དཀོན་མཆོག་བཞེས་ཅིག་(ཤིག་)གསུང་། །ཁོ་བོས་ཕངས་སེམས་སྐྱེས་པ་ལས། །ཁྱེད་འདོད་ན་སླར་ཡང་ཡོད་དོ་གསུང་། །ཐལ་སྦྱར་སྙིམ་པ་ཁ་ཕྱེ་ནས། །མ་གོད་མ་ཉམས་སྔ་མ་བཞིན། །ཆེ་ན་ངོ་མཚར་དེ་ཆེ་མོད། །ཞབས་ཐེ་བོང་ས་ལ་བརྡབས་པ་ལས། །རྡོ་དང་གསེག་མ་གསེར་དུ་གྱུར། །ཐམས་ཅད་གསེར་གླིང་ཡིན་ནོ་གསུང་། །ཆེ་ན་ངོ་མཚར་དེ་ཆེ་མོད། །ལྟར་དཀར་ཉའི་ཁོག་པ་ལས། །ཚོགས་ཀྱི་འཁོར་
1-1-220a
ལོའི་མཆོད་པ་བཤམས། །རོ་བརྒྱར་ལྡན་པའི་ཁ་ཟས་བྱུང་། །ཆེ་ན་ངོ་མཚར་དེ་ཆེ་མོད། །ཁྱོད་འདི་རུ་མ་སྡོད་བོད་དུ་སོང་། །ལྗོངས་ཁ་བ་ཅན་རྒྱུད་བྱང་ཕྱོགས་ན། །གདུལ་བྱ་སྣོད་ལྡན་ཡོད་དོ་གསུངས། །ལུང་བསྟན་རྗེས་སུ་གནང་བ་ཐོབ། །ཆེ་ན་ངོ་མཚར་དེ་ཆེ་མོད། །ལར་སྤྲུལ་སྐུ་ན་རོ་པན་ཆེན་ལ། །ངོ་མཚར་ཅན་གྱི་མཐོང་ལུགས་བརྒྱད། །ཁྱེད་རྡོ་རྗེ་སྤུན་ལས་མ་གཏོགས་པ། །ཁོང་གཞན་ལ་བཟླས་ན་ཡིད་མི་ཆེས། །ལར་ད་དུས་བསྟན་པའི་སྙིགས་མ་ལ། །ལོག་རྟོག་སྐྱེ་བོ་ཕྲག་དོག་ཆེ། ཡོན་ཏན་བརྗོད་ན་སྒྲོ་བསྐུར་འདེབས། །སྤུན་ཁྱེད་མ་གཏོགས་ལ་གསང་བ་ཡིན། །གླུ་མཆོད་པར་བཞེས་ཅིག་(ཤིག་)སྐུ་དྲིན་ཅན། །ཐུགས་དགྱེས་པར་དགོངས་ཅིག་(ཤིག་)སྙིང་གི་གྲོགས། །ཞེས་མར་པ་ལོ་ཚ་(ཙཱ་)བས་ན་རོ་མེ་ཏྲི་རྣམ་གཉིས་ལ། སྐུ་དྲིན་རྗེས་སུ་དྲན་པའི་འགུར(མགུར)། །ཕུ་བོ་རྣམ་གཉིས་ཀྱིས་དབུ་མཛད་པའི་མཆེད་གྲོགས་རྣམས་ལ་བྱོན་སྐྱེས་སུ་ཕུལ་བའོ།། །།
༄། །བཀྲ་ཤིས་སྐྱེམས་སུ་ཕུལབའི་མགུར།
རྗེ་མར་པ་ལོ་ཙཱས། དུས་ཕྱིས་རྟིང་རྒྱ་གར་ནས་བྱོན་ནས། བལ་པོར་གདན་ཕེབས་དགུང་ཞག་འགའ་ཙམ་ལོན་པ་དང་། མེ་འཇའ་གླིང་ན་བླ་མ་མི་མཉམ་རྡོ་རྗེ་ཞེས་བྱ་བ། མངའ་བདག་མེ་ཏྲི་བས་བསྡུས་པའི་མཆེད་གྲོགས་ཅིག་(ཤིག་)བཞུགས་པ་ལ། །ཕྱག་སྐྱེལ་དུ་བྱོན་ནས། །ཁོང་རང་གི་གྲོགས་པོ་ཁ་ཆེ་ཡི་ལྷ་བཟོ་གཅིག་གིས་དཔལ་གསང་བ་འདུས་པའི་དཀྱིལ་འཁོར་ཅིག་བཞེངས་ནས། རབ་གནས་མཛད་ཅིང་གདའ་སྐད་པ་ལ། དེའི་ཚོགས་གྲལ་དུ་ཁོང་རྣམས་ན་རེ་བླ་མ་ལོ་ཚ་(ཙཱ་)བ་ཁྱོད་རྒྱ་གར་དུ་ཡིན་(ཡུན་)རིང་པོ་བསྡད་ན། ཁྱེད་ཀྱི་ཇོ་བོ་ན་རོ་པ་དེ་སྐུ་སྙན་པ་ཤིན་ཏུ་ཆེ་བར་གདའ་བས། །ཁོང་གི་ཞབས་དྲུང་དུ་ཇི་ཙམ་བསྡད། །ཆོས་ནི་གང་དང་གང་མཉན། ཉིད་རང་ལ་ཁོང་
1-1-220b
དུ་ཆུད་པའི་རྡེང་ཅི་ཡོད། །ཁྱེད་རྒྱ་གར་ནས་ཚུར་བྱོན་པའི་སྐྱེས་ཀྱི་གླུ་གཅིག་ལོང་དང་། ཟེར་བས། དེའི་དུས་སུ། ན་རོ་པ་དང་མཇལ་ལུགས་ཀྱི་གླུ་འདི་གསུངས་པ་ཡིན་གསུང་། །རྗེ་གྲུབ་ཐོབ་རྣམས་ལ་ཕྱག་འཚལ་ལོ། །སྐལ་ལྡན་བདག་ལ་བྱིན་གྱིས་རློབས། །ད་མོས་པའི་བུ་འདི་ལམ་སྣ་དྲོངས། །ལར་མི་ང་ལ་ཀླུ་ལོང་མི་རིགས་ཏེ། །ཁྱེད་མཆེད་གྲོགས་གོང་མའི་ཞལ་མི་ཆོགས། །ད་ནི་འཆི་བྲོད་ཀྱི་དབྱངས་ཅིག་(ཤིག་)ལེན། །ཁྱེད་གདན་གང་གི་ཐུགས་ལ་འདི་བཞེས་ལ། །ཆོས་ཚུལ་བཞིན་ཉམས་སུ་བཞེས་པར་ཞུ། །ང་བོད་ཡུལ་གྱི་མར་པ་ལོ་ཚ་(ཙཱ་)དང་། །རྒྱ་གར་གྱི་ན་རོ་པན་ཆེན་གཉིས། །ལྗོངས་མེ་ཏོག་རྒྱན་པའི་གྲོང་ཁྱེར་དང་། །རི་བོ་གསེར་གྱི་དགོན་པར་མཇལ། །དེ་ཚེ་རབས་ཀྱི་སྨོན་ལམ་དག་པ་འདྲ། །གནས་བྱིན་བརླབས་(རླབས་)ཅན་དུ་གྲགས་པ་དེར། །སྐུ་སྙན་པ་ཅན་གྱི་རྗེ་བཙུན་ལ། །ལོ་དྲུག་ཟླ་བ་བདུན་དུ་བསྟེན། །དབང་ཡོངས་སུ་རྫོགས་པ་ལན་བདུན་ཞུས། །དཔལ་བདེ་མཆོག་འཁོར་ལོའི་བྱིན་བརླབས་(རླབས་)མཛད། །རྒྱུད་ཟབ་མོ་དགྱེས་པ་རྡོ་རྗེ་ཞུས། །ཡི་དམ་ལྷན་སྐྱེས་ཇོ་མོ་གནང་། །གདམ་ངག་ཀོར་ཙེ་ཀོར་ཙེ་ཞུས། །ལམ་རྩ་དང་རླུང་ལ་སྦར་ཟིན་བྱས། །སངས་རྒྱས་ལག་པའི་ཐིལ་ན་གདའ། །དུས་ལན་གཅིག་འཆི་བའི་ཚུལ་སྟོན་ཏེ། །རྣམ་སྨིན་གྱི་ལུས་རྒྱ་འགྲོ་བའི་ཚེ། །འདའ་ཀ་ཡེ་ཤེས་རྡེང་ཡོད་དེ། །བསྲེ་འཕོ་གནད་ཀྱིས་འཚམས་(མཚམས་)སྦྱར་ནས། །དཔའ་བོ་དང་དཔའ་མོའི་སུན་མ་འོང་། །རྒྱལ་མཚན་རོལ་མོའི་སྒྲ་དང་བཅས། །བདེ་ཆེན་མཁའ་སྤྱོད་ཀྱི་ས་ལ་འགྲོ། །དཔལ་ན་རོ་པ་དང་འཇལ་བར་ངེས། །ད་ནི་འཆི་ཡང་ང་རེ་བྲོད། །ཁྱེད་འདིར་བཞུགས་ཀྱི་ཇོ་བོ་སྔགས་པ་རྣམས། །དོན་སྙན་རྒྱུད་ཀྱི་ངོ་སྤྲོད་མི་མངའ་བར། །བཤད་རྒྱུད་ཚིག་
1-1-221a
གི་ཐ་སྙད་ལ། ཚེ་ཅིག་སངས་རྒྱས་མ་རེ་མཛོད། །ལར་སྙིང་ནས་དམ་ཆོས་མཛད་དགོངས་ན། །རྗེ་ན་རོ་དང་མི་ཏྲིའི་རྒྱུད་པ་བཟུང་། །བུ་སློབ་མ་བས་ཀྱང་ཡང་སློབ་བཟང་། །བདེ་བ་ནས་བདེ་བར་འགྲོ་སྟེ་མཆི། །དབྱངས་སྙན་དུ་བྱོན་ནམ་འདིར་བཞུགས་རྣམས། །དོན་འཁྲུལ་པར་གདའ་ན་བཟོད་པར་བཞེས། །ཞེས་གསུངས་སོ། །ཡང་དེ་ན་བཞུགས་པ་རྣམས་ན་རེ། །སྤྱིར་ལོ་ཚ་(ཙཱ་)བ་ཁྱེད་ལ་བལ་པོ་ཕན་ཆད་ན་བླ་མ་དུ་བཞུགས། །བླ་མའི་གཙོ་བོ་རང་གང་ལ་བགྱིད། །མངའ་བདག་གི་ཞབས་དྲུང་དུ་བསྡད་པ་ལ་སྐུ་ཆེ་བའི་ཡོན་ཏན་ཇི་ལྟ་བུ་མཐོང་། །གདམས་པའི་གཙོ་བོ་རང་གང་ཁོ་ན་ཞུས། །ཞེས་འདྲིར་བྱུང་བ་ལ། །ཡང་འགུར་(མགུར་)འདི་བཞེངས་པ་ཡིན་སྐད། །རྗེ་བྲམ་ཟེའི་བརྒྱུད་པའི་གདུང་འཚོབ་ཅིང་། །མཐའ་བྲལ་གཉུག་མའི་དོན་རྟོགས་ཕྱིར། །དཔེ་མེད་ནམ་མཁའི་རྣལ་འབྱོར་པ། །མཚན་མེ་ཏྲི་ཞེས་བྱར་ཡོངས་སུ་གྲགས། །ཕ་རྗེ་བཙུན་དེའི་བཀའ་སྲོལ་འཛིན། །ལམ་འབྲལ་མེད་བསྒོམ་པའི་རྣལ་འབྱོར་པ། །ཁོ་བོ་ཞེ་སྡང་རྡོ་རྗེ་ཡིན། །ང་སྐྱེ་ས་འཕམ་སྟེ་འགྲོ་ས་རྒྱལ། །ཡུལ་རྒྱ་དང་བལ་པོར་ལན་ལྔ་ཕྱིན། །ལུས་སྲོག་ལ་མ་ལྟས་དམ་ཆོས་བཙལ། །རྗེ་སྤྲུལ་སྐུ་སངས་རྒྱས་རྣམས་དང་མཇལ། །དབང་གདམ་ངག་བཅས་པ་ཐུགས་ལ་བཏགས། །དུས་ད་རེས་དྲིན་ལེན་སྐྱེལ་དུ་མཆིས། །ལར་ཁྱེད་ལ་བླ་མ་དུ་ཡོད་ན། །སྤྱིར་སྨོན་ལམ་གྱི་འབྲེལ་པ་བཅུ་གསུམ་བཞུགས། །ཁྱད་པར་གྲུབ་ཐོབ་ཞལ་ལྔ་བཞུགས། །རྗེ་འགྲན་གྱི་དོ་མེད་རྣམ་གཉིས་བཞུགས། །གཙོ་བོ་དཔལ་ཆེན་ན་རོ་པ། །དེ་འོག་རྒྱལ་སྲས་མེ་ཏྲི་བ། །ཁོང་ལྷག་པར་མ་བས་བརྩེ་བའི་ཕྱིར། །ང་ཡང་ཡང་སེམས་
1-1-221b
ལ་འཕྲེང་ནས་ཀྱང་། ཤར་ཆུ་བོ་གང་གའི་འགྲམ་དུ་ཕྱིན། །རི་མེ་ལྟར་འབར་བའི་དུར་ཁྲོད་དུ། །ཤིང་ནྱ་གྲོ་ཏའི་བསིལ་གྲིབ་ལ། །རྗེ་མངའ་བདག་ཆེན་པོ་བཞུགས་པ་མཐོང་། །ས་དང་པོ་ལྟ་བུའི་དགའ་བ་སྐྱེས། །མཁའ་འགྲོ་མཉེས་པའི་མཆོད་པ་བཤམས། །བླ་མ་མཉེས་པའི་མ་དྷལ་ཕུལ། །གུ་རང་གསེར་གྱི་མེ་ཏོག་བཀོད། །ལུས་ཀྱིས་ཐལ་སྦྱར་རྐྱང་ཕྱག་འཚལ། །སེམས་རྩེ་གཅིག་གདུང་བའི་གསོལ་བ་བཏབ། །རྒྱུད་ཟབ་མོ་བསྟོད་པ་གླུ་བླངས་ཐོས། །ཡི་དམ་དགྱེས་པ་རྡོ་རྗེ་ཞུས། །དོན་མཐར་ཐུག་ཕྱག་རྒྱ་ཆེན་པོ་ཞུས། །དཔལ་གཉིས་མེད་ཨ་བ་འདུ་ཏི་བ། །ཕ་རྗེ་བཙུན་དེས་ཀྱང་ཐུགས་རྗེས་གཟིགས། །ནང་ཟབ་མོ་བརྡའི་དབང་བཞི་བསྐུར། །རྒྱུད་ཡོངས་སུ་དག་པའི་བྱིན་རླབས་ཞུགས། །གཞི་མདུན་པའི་ས་བོན་གཏིང་ནས་གཡོས། །ནང་རིག་པ་སེམས་ཀྱི་འདུག་ཚུལ་དེ། །འོད་གསལ་སྐྱེ་འགག་མེད་པའི་ཕྱིར། །གཞི་མ་བཅོས་གཉུག་མའི་ངོ་བོར་བསྟན། །བློ་བུར་གྱི་རྣམ་རྟོག་དབྱིངས་སུ་ཐིམ། །ཟག་མེད་ཀྱི་བདེ་ཆེན་ནང་དུ་ཤར། །གདོད་ནས་དག་པའི་དེ་བཞིན་ཉིད། །གཞི་ལ་སྐུ་གསུམ་གཏན་ལ་ཕབ། །སེམས་ཆོས་ཉིད་མ་དང་ཞལ་ཡང་འཇལ(མཇལ)། །དུས་ད་རེས་ངོ་མཚར་ཆེ་བའི་ལྟས། །སྒྲོན་ཤིང་མར་མེ་འཛུབ་གང་ལ། །ཞག་བདུན་བར་དུ་སྣང་བ་བྱུང་། །བེམས་པོར་གྱུར་པའི་ལྗོན་ཤིང་གིས། །རབ་ཏུ་མ་བཟོད་གཡོ་འགུལ་བྱས། །སྤྲུལ་པའི་ལྕེ་སྤྱང་དམར་མོ་བདུན། །དངོས་སུ་གཏོར་མ་ལེན་པ་མཐོང་། །ས་གསུམ་གནས་པའི་མཁའ་འགྲོ་རྣམས། །གཟུགས་མེད་སྔགས་ཀྱི་རང་སྒྲ་ཐོས། །བར་སྣང་གང་བའི་ཞིང་སྐྱོང་རྣམས། །སྣ་ཚོགས་རོལ་མོ་སྒྲོགས་པ་ཐོས། །ཁྱོད་སྐྱེ་བ་གསུམ་གྱི་འོག་རོལ་ཏུ། །མཆོག་གི་དངོས་གྲུབ་
1-1-222a
འཐོ་བོ་ཞེས། རྗེ་མངའ་བདག་ཞལ་ནས་ལུང་བསྟན་ཐོབ། །ལར་མི་ང་རང་ངན་ཏེ་བླ་མ་བཟང་། །ཆོས་ལྟ་བའི་ཡང་རྩེ་ཕུ་ཐག་ཆོད། །ལམ་གྲུབ་མཐའ་དམན་གྱི་དོགས་མ་མཆིས། །རྗེ་མེ་ཏྲི་བ་དང་མཇལ་ལུགས་ཡིན། །དམ་པའི་ཐུགས་དགྱེས་དེ་ལ་མཛོད། ཞེས་རྗེ་བཙུན་མར་པ་ལྷོ་བྲག་པས། །བླ་མ་མི་མཉམ་རྡོ་རྗེས་དབུ་མཛད་པའི་མཆེད་གྲོགས་རྣལ་འབྱོར་པ་རྣམས་ལ། །བཀྲ་ཤིས་བྱོན་སྐྱེམས་སུ་ཕུལ་བའི་འགུར་(མགུར་)གཉིས་ལགས་སོ།། །།རྗེ་བཙུན་གྱི་ཞལ་ནས་ཀྱང་། བརྒྱུད་པ་འདི་རང་གི་སྲོལ་འཛིན་ཅིང་། །ཉམས་སུ་ལེན་ངེས་པའི་བསྒོམས་(སྒོམ་)ཆེན་གཅིག་གམ་གཉིས་ལས་མ་གཏོགས་པ། །གཞན་ལ་སྤེལ་ན་མཁའ་འགྲོའི་བཀའ་ཆད་འབྱུང་། །ཆོས་ལ་སེར་སྣ་བྱེད་པ་མ་ཡིན་ཏེ། །སྣོད་དང་མི་ལྡན་པས་ཐོས་ནས་རྩ་བའི་ལྟུང་བ་འཕོག །དུས་དེང་སང་གི་སྐྱེ་བོ་ཕྲག་དོག་ཆེ་བས། ཅོ་འདྲི་ཞིང་སྒྲོ་བསྐུར་འདེབས། །སྡིག་སོག་(གསོག་)ཏུ་འོང་བས། ཡི་གེ་ལ་ཤིན་ཏུ་དམ་པར་བགྱི་འཚལ་ལོ་གསུང་ངོ་།། །།
༄། །བླ་མ་པེན་ཏ་བ་དང་དྲིས་པ་དད་ལན་གྱི་མགུར།
རྗེ་ལྷོ་བྲག་པ་བལ་ཡུལ་རིན་ཆེན་ཚུལ་གྱི་གཙུག་ལག་ཁང་གི་བྲང་ཁང་གཅིག་ན་བླ་མ་པེན་ཏ་བ་ལ་རལ་ཅིག་མའི་རྟོག་པ་དང་། །བདུད་རྩི་འོད་ཀྱི་བསྒྲུབ་ཐབས་དང་། །རྫོགས་རིམས་ཁ་འཐོར་འགའ་གསན་ཅིང་བཞུགས་པ་ལ། །ནུབ་ཅིག་(ཞིག་)གི་མཚན་མ་ལ། །རྗེ་མངའ་བདག་མེ་ཏྲི་པ་སེང་གེ་ལ་བཅིབས་ནས། །ནམ་མཁའ་ལ་གཤེགས་པ་རྨིས། །ཕ་རྗེ་བཙུན་ཐུགས་རྗེས་བཟུང་དུ་གསོལ་ཞེས་འོ་དོད་བོས་པས། མདུན་གྱི་ནམ་མཁའ་ལ་བྱོན་ནས། ནམ་མཁའ་མཚོན་པའི་བརྡའ་བསྟན། དཔེའ་དང་བྲལ་བའི་ཆོས་གསུངས། །མཐའ་ལས་འདས་པའི་དོན་རྟོགས། །སྔར་མ་སྐྱེས་པའི་ཉམས་
1-1-222b
ལ་ཤར་བ་རྨིས་ནས། །དེར་རྣལ་སད་ཙམ་ན། ནམ་ལངས་ནས་འདུག་པ་ལ། བླ་མ་དྲན་ནས་མང་པོ་ཡང་དག་པར་བཤུམས་སྐད། །དེའི་ཕྱི་དེ་ནུབ་མོ་བླ་མ་ལ་གསོལ་བ་འདེབས་པའི་མཆོད་ཆུང་གཅིག་བཤམས་ནས། དེའི་ཚོགས་གྲལ་དུ་མཚན་ལྟས་བཟོས་པའི་འགུར་(མགུར་)འདི་བཞེངས་པ་ཡིན་གསུང་ངོ་། །རྗེ་སྙིང་པོའི་དོན་རྟོགས་ཆོས་ཀྱི་སྐུ། །མཚན་ཡོངས་སུ་གྲགས་པ་མེ་ཏྲི་བའི། །ཁོང་བསམས་ཀྱིན་སྐུ་དྲིན་ཆེ་བའི་ཕྱིར། །ཁོ་བོའི་ཡིད་ལ་ཤིན་ཏུ་བཅགས། །ང་རྩེ་གཅིག་གདུང་བ་རྒྱུན་མི་གཅོད། །ཕ་བྱིན་གྱིས་བརློབས་ཅིག་(རློབས་ཤིག་)སྤྲུལ་པའི་སྐུ། །ཁྱེད་འདྲེན་པའི་བླ་མ་སྐུ་དྲིན་ཅན། །དཔལ་པན་ཏ་བ་ཡིས་དབུ་མཛད་ནས། །ཁྱེད་འདིར་བཞུགས་ཀྱི་རྣལ་འབྱོར་ཕོ་མོ་རྣམས། །གླུ་འདི་ལ་དར་ཅིག་སྙན་གསན་འཚལ། །ང་མར་སྟོན་ཆོས་ཀྱི་བློ་གྲོས་འདིས། །ཚེ་སུམ་གཉིས་རྒྱ་གར་ཡུལ་དུ་བསྐྱལ། །ལོ་བཞི་བཅུའི་བར་དུ་ཐོས་བསམ་བྱས། །དུས་ན་ནིང་སྡུག་པ་སྦྲུལ་གྱི་ལོ། །ཆོ་འཕྲུལ་རྟའི་ཟླ་བ་ལ། །མི་ཁོ་བོ་ལམ་དུ་ཞུགས་ནས་མཆིས། །ཆུ་འཇིགས་སུ་རུང་བའི་གང་ག་རྒལ། །རིགས་ངན་ཤི་སྐྱིད་ཀྱི་ཇག་པ་གཉིས། །ཆུ་ལ་བྱི་ལྟར་འཛུལ་ཞིང་བྱུང་། །ཚེ་སྔ་ཕྱི་དྲན་པས་སྐྲག་མ་མྱོང་། །ཕ་རྗེ་བཙུན་སྤྱི་བོར་བསྒོམས་པ་ལས། །ཁོང་ཡང་ཡང་བལྟས་ཤིང་ལོག་ནས་སོང་། །སྲོག་ཆུ་ནས་བཏོན་ནོ་སྐུ་དྲིན་ཅན། །ལར་ཁྱེད་ཀྱི་དྲིན་ལེན་འཁོར་ཐབས་མེད། །དུས་ཁར་སང་ཟླ་བ་སྔ་མ་ཡི། །ཁྱད་པར་ཡར་ངོའི་ཚེས་བཅུ་ལ། །དཔལ་དུར་ཁྲོད་ར་མ་དྷོ་ལི་དེར། །མཁའ་འགྲོ་མཆོད་པའི་ཚོགས་འཁོར་བགྱིས། །ཁོང་དེར་འཚོགས་(ཚོགས་)ཀྱི་རྣལ་འབྱོར་མཐོང་ཙམ་ན། །རྗེ་ན་རོ་དང་མེ་ཏྲི་ཏུར་གྱིས་དྲན། །ཐུགས་བརྩེ་བས་བུ་བཞིན་བསྐྱངས་པའི་ཕྱིར། །ཕ་མཛད་སྤྱོད་བསམས་
1-1-223a
ཤིང་ཡིད་ལ་འཕྲེང་། སླར་རྒྱ་གར་ཡུལ་དུ་ལྡོག་གམ་བསམ། །ནམ་ཐོ་རངས་ཐམ་ཐུམ་རྨི་ལམ་ན། །གོས་ཤིང་ལོ་གོན་པའི་བུད་མེད་ཅིག །ཕྱག་གཡས་པ་རྐྱང་མཛད་སོར་མོ་རྣམས། །མི་ཁོ་བོའི་མགོ་ལ་རེག་མཛད་དེ། །ཁྱོད་རྒྱ་གར་ཡུལ་དུ་མ་ལྡོག་པར། །བོད་ཡུལ་དབུས་སུ་སོང་ཅིག་(ཞིག་)གསུང་། །ལྗོངས་ཁ་བ་ཅན་དུ་མ་ཕྱིན་བར། །ཕྱི་ནང་བར་ཆད་མི་འབྱུང་ཞིང་། །གདུལ་བྱ་སྣོད་ལྡན་ཡོད་དོ་ཞེས། །ལུང་བསྟན་བྱིན་གྱིས་བརླབ་པ་མཛད། །དེ་ཞིང་སྐྱོང་གི་མཁའ་འགྲོ་ཡིན་པར་ངེས། །དེ་ཡང་རྗེ་བཙུན་ཁྱེད་ཀྱི་དྲིན། །མདང་བག་ཆགས་ཉིད་ཀྱི་རྨི་ལམ་ན། །མངའ་བདག་རྒྱལ་སྲས་མེ་ཏྲི་བ། །སེང་གེ་ཞོན་ནས་མཁའ་ལ་གཤེགས། །མི་ཁོ་བོའི་དྲུང་དུ་བྱོན་པ་རྨིས། །སྐྱེ་མེད་མཚོན་པའི་བརྡའ་གསུམ་བསྟན། །ཡི་གེ་མེད་པའི་ཆོས་ཅིག་(ཤིག་)གསུངས། །བརྗོད་དུ་མེད་པའི་དོན་ཅིག་རྟོགས། །སྔན་ཆད་མེད་པའི་ཉམས་ཅིག་(ཤིག་)སྐྱེས། །ད་ནང་གཉིད་དེ་སད་ཙམ་ན། །རྗེ་ཡང་ཡང་དྲན་ནོ་མེ་ཏྲི་བ། །མི་ཁོ་བོའི་མིག་སྔར་འབྲལ་མ་ཕོད། །གདོང་མཆི་མས་གང་བའི་ངུད་མོ་ཤོར། །དབུགས་ཁ་ནས་མ་ཐོན་བྱང་ཁོག་རྒྱངས། །ཕ་སྙིང་ལ་འདོད་དེ་ཆུ་བས་བསྐོམ། །མི་ཁོ་བོའི་གདུང་སེམས་མཁྱེན་ལགས་སམ། །ཕ་ལམ་སྣ་དྲོངས་ཅིག་(ཤིག་)སྤྲུལ་པའི་སྐུ། །ལར་རྨི་ལམ་བག་ཆགས་ཡིན་མོད་ཀྱང་། །མདང་རྗེ་བཙུན་བྱོན་པ་ཐུགས་ལ་བཏགས། །སེམས་དགའ་ལ་མི་དགའ་མཐོན་དམན་བྱུང་། །ཁྱེད་འདིར་བཞུགས་ཀྱི་སྙན་དུ་ཞུས་པ་ལགས། །ཞེས་པའི་འགུར་(མགུར་)བཞེངས་པའོ། །བླ་མ་སྦེན་ཏ་བས་ཁོ་བོའི་བྲོད་པ་བསྐྱེད་ཅིང་བླ་མའི་ངོ་བོ་ཅིག་(གཅིག་)ལ་རང་གི་མཐོང་ཚུལ་ལ་ཡོན་ཏན་ཐ་དད་འབྱུང་བ་དང་། ཁོ་བོའི་རྨི་ལམ་དེ་དག་འདྲི་བའི་ཕྱིར་ལེན་(ལན་)གསུངས་
1-1-223b
པ།། །།གྲོགས་སྙིང་དང་འདྲ་བའི་ལོ་ཚ་(ཙཱ་)བ། །བུ་ཁྱེད་ལ་དད་པ་གཏིང་ནས་ཡོད། །གཞི་རང་དབང་མེད་པའི་མདུན་པ་ཡོད། །ཡིད་ལྷག་པར་བརྩེ་བའི་སྙིང་རྗེ་ཡོད། །རྒྱུད་ཡོངས་སུ་སྦྱངས་པའི་སེམས་བསྐྱེད་ཡོད། །རིགས་ཁྱད་པར་ཅན་གྱི་སྐྱེས་བུ་ཡོད། །སྔོན་ཆད་བླ་མ་མ་བསྙེས་པས། །ད་ལྟ་གྲུབ་ཐོབ་དངོས་དང་མཇལ། །དེ་ཡང་གྲོགས་པོ་ངའི་དྲིན། །མི་ང་ལ་གཙུག་གི་ནོར་བུར་མཐོང་། །བུ་བྱས་པ་ཤེས་པ་ངོ་མཚར་ཆེ། །གསང་སྔགས་རྒྱལ་པོ་མཆོག་གི་ལམ། །བགྲོད་པ་ཀུན་གྱི་གཞིར་གྱུར་པ། །ལྷག་པའི་དམ་ཚིག་གི་ཁྱོད་ལ་ཡོད། །ལྷ་དང་མཁའ་འགྲོས་རྗེས་གནང་ཞིང་། །བླ་མའི་མན་ངག་སྙིང་ལ་ཞུགས། །དུས་འདིར་བདེ་བ་ཐོབ་པར་རིགས། །དུས་གསུམ་སངས་རྒྱས་ཐམས་ཅད་ཀྱི། །དངོས་གྲུབ་རྩ་བ་བླ་མ་རྗེ། །སྤྲུལ་སྐུ་མཆོག་གི་རྗེ་བཙུན་ལ། །ནམ་མཁའ་ལྟ་བུར་ངོ་ཤེས་ན། །སྐྱེ་མེད་སྟོང་པའི་དོན་རྟོགས་འགྱུར། །ཉི་མ་ལྟ་བུར་ངོ་ཤེས་ན། །བདལ་བའི་སྙིང་རྗེ་ཆེན་པོ་འབྱུང་། །ཟླ་བ་ལྟ་བུར་ངོ་ཤེས་ན། །ཉོན་མོངས་གདུང་བ་སེལ་བར་བྱེད། །རྒྱ་མཚོ་ལྟ་བུར་ངོ་ཤེས་ན། །མི་གཡོ་མཆོག་གི་ཏིང་འཛིན་བརྙེས། །ནོར་བུ་ལྟ་བུར་ངོ་ཤེས་ན། །དགོས་འདོད་རེ་བ་ལྷུན་གྱིས་གྲུབ། །དེད་དཔོན་ལྟ་བུར་ངོ་ཤེས་ན། །ཐར་པའི་རིན་ཆེན་གླིང་དུ་སྒྲོལ། །དམག་དཔོན་ལྟ་བུར་ངོ་ཤེས་ན། །ལོག་རྟོག་དགྲའི་གཡུལ་ངོ་འཇོམས། །རལ་གྲི་ལྟ་བུར་ངོ་ཤེས་ན། །དངོས་འཛིན་འཆིང་བ་གཅོད་པར་བྱེད། །འཁོར་ལོ་ལྟ་བུར་ངོ་ཤེས་ན། །མཐའ་ལ་མི་གནས་དོན་རྟོགས་འགྱུར། །སེང་གེ་ལྟ་བུར་ངོ་ཤེས་ན། །གཟུང་འཛིན་རི་དགས་ཟིལ་གྱིས་གནན། །གླང་པོ་ལྟ་བུར་ངོ་ཤེས་ན། །ཉམ་ངའི་བདུད་ལས་ཐར་བར་འགྱུར། །རྟ་མཆོག་ལྟ་བུར་ངོ་ཤེས་ན། །མྱ་ངན་འདས་པའི་
1-1-224a
དབྱིངས་སུ་སྐྱེལ། །རྒྱལ་པོ་ལྟ་བུར་ངོ་ཤེས་ན། །ཀུན་གྱིས་མཆོད་ཅིང་བཀུར་བར་འགྱུར། །རིགས་ལྡན་ཁྱོད་ཀྱིས་གང་མཐོང་བ། །དྲིན་ཅན་ཕ་ལྟར་ངོ་ཤེས་པས། །ཆོས་ཀྱི་རྒྱལ་སྲིད་རྒྱུན་མི་འཆད། །བུ་ཁྱོད་ཀྱི་བག་ཆགས་རྨི་ལམ་ན། །རྗེ་མངའ་བདག་ཆེན་པོ་བྱོན་ནས་ཀྱང་། །སྐྱེ་མེད་མཚོན་པའི་བརྡའ་བསྟན་ཅིང་། །ཡི་གེ་མེད་པའི་ཆོས་གསུངས་ཏེ། །མཐའ་ལས་འདས་པའི་དོན་རྟོགས་ནས། །སྔར་མ་སྐྱེས་པའི་ཉམས་ཤར་བ། །དེ་དོན་གང་ལགས་སྨྲ་བར་རིགས། །རྗེ་པན་ཏ་བས་དེ་སྐད་གསུངས་པས། །ཡང་བླ་མ་ལོ་ཚ་(ཙཱ་)བས་མདང་རྨི་ལམ་དུ་བྱོན་ཅིང་ཐུགས་ཉམས་སུ་བཞེས་པ་རྣམས། །བླ་མ་པན་ཏ་བས་དབུ་མཛད་ཀྱི་མཆེད་གྲོགས་རྣམས་ལ་རྟོགས་པ་ཕུལ་བ།། །།རྗེ་བརྟུལ་ཞུགས་སྤྱོད་པའི་པེན་ཏ་བ། །མཚན་ལྷ་ཡིས་ལུང་བསྟན་ངོ་མཚར་ཅན། །དཔལ་གཉིས་མེད་རོལ་པའི་ཆགས་འོག་ན། །སེམས་ཐ་དད་མེད་པར་རྡོ་རྗེའི་སྤུན། །ཤྲི་གྲུ་ན་མ་ཏིས་དབུ་མཛད་ནས། །གདན་གང་གི་དཔའ་བོ་སྙན་གསན་མཛོད། །དེ་འོག་སྦས་པའི་རྣལ་འབྱོར་མ། །ལྕམ་སུ་ཀ་བཛྲ་དབུ་མཛད་ནས། །གྲལ་གཡོན་ན་བཞུགས་པའི་དཔའ་མོ་གསོན། །སྤྱིར་ཆོས་རྣམས་ཐམས་ཅད་སྒྱུ་མ་སྟེ། །རྨི་ལམ་སྒྱུ་མ་ཁྱད་པར་འཕགས། །ནམ་སྲོད་ལ་བག་ཆགས་ཀྱི་རྨི་ལམ་བྱུང་། །དེ་ལ་གཟའ་གཏད་ཅི་ཡང་མེད། །ནམ་གུང་བདུད་གྱི་སྤྲུལ་པ་སྟོན། །དེ་ལ་ཡིད་བརྟན་བྱར་མི་རུང་། །ནམ་ཐོ་རས་ལྷ་ཡིས་ལུང་སྟོན་པ། །ཆེ་ན་ངོ་མཚར་དེ་ཆེ་མོད། །རྒྱུད་ད་ནང་སྐྱ་རེངས་ཤར་བ་ལ། །རྗེ་མངའ་བདག་ཆེན་པོ་བྱོན་ནས་ཀྱང་། །མཐར་ཐུག་སྟོན་པའི་ཆོས་གསུངས་པ། །དེ་མ་བརྗེད་དྲན་པ་འདི་ལྟར་གདའ། །ཆོས་རྣམས་ཐམས་
1-1-224b
ཅད་སེམས་ཉིད་དེ། །རང་སེམས་ཉིད་ལས་བླ་མ་བྱུང་། །སེམས་ལས་གུད་ན་གཞན་མེད་པས། །ཅིར་སྣང་ཐམས་ཅད་སེམས་ཉིད་ངང་། །དེ་ཡང་གདོད་ནས་མ་གྲུབ་པས། །མ་སྐྱེས་གཉུག་མར་གནས་ལུགས་པས། །རྣམ་རྟོག་རྩོལ་བས་སྤང་དུ་མེད། །མ་བཅོས་རང་སོ་ལྷུག་པར་བཞག །དེ་ཉིད་བརྡའ་ཡིས་མཚོན་པའི་ཕྱིར། །མི་རོ་གདོལ་པ་ཁྱི་དང་ཕག །བུ་ཆུང་སྨྱོན་པ་གླང་ཆེན་དང་། ནོར་བུ་རིན་ཆེན་ཨུད་པ་ལ། །དངུལ་ཆུ་རི་དགས་སེང་གེ་དང་། །བྲམ་ཟེ་ཁྲི་སྙན་མཐོང་ངམ་གསུང་། །བརྡ་ཡིས་མཚོན་པའི་དོན་རྟོགས་པ། །འཁོར་འདས་གཉིས་སུ་མི་འཛིན་ཅིང་། །སྤང་བླང་རྒྱུད་ལ་མི་སྦྱོར་བ། །གཞན་ནས་འབྲས་བུ་མི་རེ་བ། །ཡིད་ལ་བྱར་མེད་སྤྲོས་དང་བྲལ། །མཐའ་བཞི་དཔག་ཏུ་ལྷུང་བ་མེད། །བསྒོམ་དུ་མེད་ཅིང་ཡེངས་སུ་མེད། །དྲན་དུ་མེད་ཅིང་བརྗོད་དུ་མེད། །གང་གིས་ཀྱང་ནི་མཚོན་དུ་མེད། །བླ་མའི་དྲིན་གྱིས་དེ་ལྟར་རྟོགས། །དོན་དེ་རྟོགས་པའི་ཉམས་ཤར་བ། །སེམས་དང་སེམས་བྱུང་འགག་པ་ཡིན། །དབྱིངས་དང་རིག་པ་དབྱེར་མེད་དེ། །སྐྱོན་དང་ཡོན་ཏན་བསྐྱེད་འབྲི་མེད། །བདེ་སྟོང་གསལ་ལ་མ་འགགས་པ། །བདེ་གསལ་འགྲོ་འོང་མེད་པར་ཤར། །གཉུག་མ་ངོ་སྤྲོད་ལྟ་བའི་གནད། །སྐྱེ་མེད་མཚོན་པའི་བརྡའ་དོན་རྣམས། །རྗེ་མངའ་བདག་ཆེན་པོའི་ཞལ་ནས་ཐོས། །ངག་བརྗོད་པ་གླུ་རུ་མི་བླང་ངུ་། །རྗེ་གོང་ནས་བཀའ་ནན་ཆེ་བ་དང་། །གདན་གང་མཆེད་གྲོགས་ཀྱི་ཞལ་མ་ཆོགས། །མཁའ་འགྲོ་ཀོ་ལོང་མི་མཛད་ཞུ། །ཞེས་བླ་མ་ལོ་ཚ་(ཙཱ་)བ་དེས། རྗེ་པེན་ཏ་བ་ཡིས་དབུ་མཛད་པའི་མཆེད་གྲོགས་རྣམས་ལ་ཡུལ་རིན་ཆེན་ཚུལ་གྱི་གཙུག་ལག་ཁང་དུ་མངའ་བདག་མེ་ཏྲི་པ་རྨིས་ལམ་དུ་བྱོན་ནས། 
1-1-225a
ཕྱག་རྒྱ་ཆེན་པོའི་བརྡའ་དོན་བསྟན་པ་རྣམས་འགུར་(མགུར་)དུ་བཞེངས་པ་ཡིན་གསུང་། །རྗེ་ལོ་ཚ་(ཙཱ་)བས་མར་པ་འགོ་ཡགས་དང་། མིད་ལ་མ་གཏོགས་པ་གཞན་ལ་གནང་བ་མེད། །རྗེ་བཙུན་ཞལ་གཉིས་ལ། །ངན་རྫོང་སྟོན་པ་པོ་དེ་ར་ཙས་ཞུས་ཏེ་དགྱེས་བཞིན་དུ་གནང་ངོ་། །བླ་མ་ལོ་ཚ་(ཙཱ་)བ་ལ་རྗེ་མངའ་བདག་རྨི་ལམ་དུ་བྱོན་ནས། ཕྱག་རྒྱ་ཆེན་པོའི་བརྡ་ཐོག་བབས་ཀྱི་མན་ངག་ཡི་གེ་མེད་པའི་ངོ་སྤྲོད་འདི་ལ་བླ་མ་བཞི་ཡིས་མཚོན་ཏེ་གོ། །གྲུབ་ཐོབ་རྒྱུད་པའི་བླ་མས། །ཟབ་མོའི་དོན་ཉིད་མན་ངག་གནད་ཀྱི་ངོ་སྤྲོད་ལ། །དྲི་མེད་བཀའི་བླ་མས། སྙིང་པོའི་དོན་གྱི་ལུང་ལ་ཡིད་ཆེས་པར་བསྟན་སྣང་བ་བརྡའི་བླ་མས། གཉུག་མའི་དོན་ཏེ་བརྡ་ཐབས་ཀྱིས་མཚོན་ཏེ་གོ་བར་བྱས། །དག་པ་རང་སེམས་ཀྱིས་(ཀྱི་)བླ་མས། གཞི་གནས་ལུགས་རང་ལ་ཡོད་པར་ངོ་ཤེས་པའོ། །དང་པོ་ནི་མངའ་བདག་གིས་ནམ་མཁས་མཚོན་པའི་བརྡ་བསྟན་ཏེ། ཡི་གེ་མེད་པའི་ཆོས་གསུངས་པ་ནི། ཆོས་རྣམས་ཐམས་ཅད་སེམས་ཉིད་དེ་ཅེས་(ཞེས་)པའི་ཚིག་གིས་བསྟན་གཉིས་པ་ནི་སྙིང་པོ་དོན་གྱི་རྒྱུད་དཔལ་རྙོག་པ་མེད་པ་ནས་གསུངས་པ་དྲི་མེད་བཀའི་ལུང་གིས་ཡིད་ཆེས་པར་བྱས་པ་ནི། །གདོད་ནས་མ་གྲུབ་གཉུག་མའི་སེམས། །ཅིར་ཡང་མི་རྟོག་ཕྱག་རྒྱ་ཆེ། །ཆོས་རྣམས་ཀུན་གྱིས་མ་རེག་པ། །མ་བཅོས་དེ་ཉིད་ངང་ལ་ཞོག་ཅེས་གསུངས་ལ། གསུམ་པ་ནི་མི་རོ་གདོལ་པ་ལ་སོགས་པའི་བརྡའ་བཅོ་ལྔས་བསྟན་ཏེ། རེ་ཤིག་དེས་མཚོན་པ་ཙམ་དུ་ཟད་ཀྱི། །འདི་ལྟར་སྣང་བའི་ཆོས་ཐམས་ཅད་གནས་ལུགས་བརྡ་གོ་བར་བྱེད་པའོ། །བཞི་པ་ནི་བླ་མའི་སྣང་བའི་དཔེ་ཡང་། །རང་གི་སེམས་ལས་མ་གཏོགས་པ་གུད་ན་
1-1-225b
མེད་ཅེས་གོང་དུ་གསུངས་པའི་རང་སེམས་ཉིད་ལས་བླ་མ་བྱུང་ཞེས་དོན་གོ་བར་བྱས་ལ། རང་གྲོལ་བཞིའི་བླ་མ་དང་དངོས་སུ་མཇལ་བ་ནི། འཁོར་འདས་གཉིས་སུ་མི་འཛིན་པ་ལ་སོགས་པ་རྟོགས་པའི་དོན་བསྟན་པ་རྣམས་ཀྱི་གོ་བར་བྱའོ་གསུང་ངོ་། །རྗེ་མར་པ་ལོ་ཚ་(ཙཱ་)བ་ཆེན་པོ་དེ་ལ་རྟོགས་ཚད་ཀླུའི་བསམ་གཏན་དགུ་ཞེས་བྱ་བ། རྒྱ་གར་ནས་བོད་ཚུན་ཆད་དུ་གསུངས་པ་ཡོད་དེ། བླ་མ་ལ་རྟོགས་པ་ཕུལ་བའི་འགུར་(མགུར་)དབྱངས། རིངས་ཏ་འབུ་རའི་ཁོང་འགྱུར། ཆོས་ཕྱིར་དཀའ་བ་སྤྱད་པའི་འགུར(མགུར)། མྱ་ངན་དྲན་བྱེད། མཆེད་གྲོགས་ལ་བྱོན་སྐྱེས་སུ་ཕུལ་བའི་འགུར(མགུར)། དྲིས་པ་དད་ལན་གྱི་དབྱངས། བཀྲ་ཤིས་བྱོན་སྐྱེམས་ཀྱི་འགུར(མགུར)། སེང་གེ་ང་རོ་བསྒྲག་པའི་དབྱངས། བྱིང་བ་སེལ་བ་ལ་མཚན་ལྟས་དྲན་པའི་འགུར(མགུར)། ཆུ་ལྕགས་གི་ཟིལ་པ། མཐོར་བ་བསྡུ་བ་ལ་རིག་པ་ཆོས་དང་བསྲེ་བའི་འགུར(མགུར)། སེམས་ཀྱི་ལྕགས་ཀྱུ། འབྲས་བུ་ཟད་སར་སྐྱོལ་བ་ལ་ཆོས་ཉིད་ལྟ་བའི་འགུར(མགུར)། མཁའ་འགྲོའི་སྨྲེ་སྔགས། མཛད་སྤྱོད་རྫུ་འཕྲུལ་ངོ་མཚར་གྱི་འགུར(མགུར)། ཆོས་སྐྱོང་གི་སྤྱུགས་གླུ། སེམས་གནད་དུ་བསྣུན་པ་ལ་སྙིང་པོ་དོན་གྱི་མན་ངག །དྷོ་ཧ་རྡོ་རྗེའི་འགུར(མགུར)། ལྟ་བ་ཁྱུང་ཆེན་གྱི་གཤོག་རྒྱངས་སོ། །འདི་རྣམས་བླ་མ་གཞུང་པ་ཆེན་པོ་ལ་སོགས་པ་རྣམས་ཀྱིས་ཀྱང་སྐུ་འབག་གི་རྒྱབ་ལོགས་དང་། གདུགས་ཀྱི་ཡུ་བ་ལ་གསེར་གྱིས་བྲིས་ནས་ཡོད་གསུང་། འདི་རྣམས་ལེན་པའི་དུས་ཀྱང་དབང་བསྐུར་དང་། རབ་གནས་དང་ཚོགས་འཁོར་ལ་སོགས་པའི་ནང་མ་ཡིན་པ་གཞན་དུ་མ་གནང་། དེ་ཡང་ཆེན་པོ་རྣམས་ཀྱི་གསུང་ཡིན་པས་ཤིན་ཏུ་གཟབ་དགོས། དང་པོ་འདྲེན་བདེ་ལ་སྐད་འཕང་
1-1-226a
མ་ཆག་པ་ཅིག་(ཞིག་)དང་། སྡེབས་མཁས་ལ་གནད་དུ་སྐྱོལ་ཞིང་བརྡ་ཕྲད་པ་ཅིག་(ཞིག་)དགོས། དེ་ཡང་ལུས་ངག་གཉིས་བཅོས་མར་མ་སོང་བ་ནི་ཤིན་ཏུ་ཡང་གཅེས། དེ་ལྟར་འདི་ནི་རིགས་ཀྱི་བུ་མཛེས་ཤིང་གསལ་བ་རྣམས་ཀྱིས་གདན་ཐོག་ནས་བླང་བར་བྱ་བ་ནི་ཡིན་གྱིས། མ་ཞུམ་ཞིང་ཉམ་ང་བ་སྤངས་པའི་སྐྱེས་བུས་རྗེས་སུ་བླངས་ན། ཉན་པ་པོ་རྣམས་གནས་སྐབས་ཀྱི་སྣང་བ་འགྱུར་ཞིང་། རང་རང་གི་རིག་པ་འབར་བར་མ་གྱུར་ན། བླ་མ་རིན་པོ་ཆེ་གོང་མ་རྣམས་ལ་བྱིན་རླབས་མེད་པ་ཡིན་ནོ། །ཞེས་བློ་གྲོས་ཀྱི་སྤྱན་དང་ལྡན་པ་རྣམས་དེ་སྐད་གསུང་ངོ་།། །།གྲུབ་ཐོབ་རིན་ཆེན་རྒྱུད་པའི། །བླ་མ་རྣམས་ལ་ཕྱག་འཚལ་ལོ། །རྗེ་མར་པ་ལོ་ཚ་(ཙཱ་)བ་ཆེན་པོ་དེ་བླ་མ་འབྲོག་མི་ཆེན་པོའི་ཞབས་དྲུང་ན་བཞུགས་པའི་དུས་ན། ལོ་ཚ་(ཙཱ་)ལ་གཤེགས་པའི་ཐུགས་དགོངས་བྱུང་ནས། རྟ་ནག་པོ་སེང་གེ་སྲབ་མེད་དང་། ཟབ་ཆེན་ཡུག་གཅིག་དང་། སེང་ལྡེང་གི་སྒ་གཅིག་དང་གསུམ། སྟག་རིས་སུ་གསེར་ལ་འཚོང་དུ་བྱོན་ཏེ། ཚུར་བྱོན་པར་བཞེད་ནས་གྲོགས་མེད་པར་ཡོད་པ་ལ། གཙང་གི་དགྱེར་ཕུའི་དགེ་བཤེས་གློག་སྐྱ་ཆེན་པོ་དེ་སྟག་སྡེ་མིག་མངས་སུ་སློབ་མ་གཅིག་གིས་ཆོས་གྲྭ་ལ་གདན་གྲངས་ཏེ། འབུལ་བ་མང་པོ་བྱུང་ནས། དེ་ཚུར་བྱོན་པ་དང་དུས་མཚུངས་ཏེ། ལམ་གྲོགས་ཞུས་པས། དགེ་བཤེས་དེས་ཐུགས་གཉེར་མཛད་ནས། ལམ་དུ་རྒྱགས་དང་བྱ་ན་ཡང་གནང་སྐད། །སྐབས་སུ་དྲེའུ་ལ་ཞབས་བསོར་ཡང་མཛད་ནས། དགྱེར་ཕུའི་བར་དུ་ལྷན་ཅིག་ཏུ་འགྲོགས་ནས་བྱོན། དེར་བླ་མ་མར་པས། ཇོ་བོ་དམ་ཚིག་ཡོད་པར་གཟིགས་ནས་ང་ལྷོ་བལ་དུ་ལོ་ཚ་(ཙཱ་)ལ་འགྲོ་བ་ཡིན་པས། ད་རེས་ཁྱེད་ཀྱིས་ཤིན་ཏུ་ཐུགས་
1-1-226b
ལ་བཏགས། ཚེའི་བར་ཆོད་མ་བྱུང་ན་ཕྱིས་ཀྱང་ཁོ་བོའི་སྣ་ལེན་དང་བབས་ས་བགྱིད་པར་ཞུ་གསུངས་པས། དགེ་བཤེས་ན་རེ་ང་ན་སོ་རྒས་པས་ཁྱེད་དང་ཕྲད་དེ་མི་འོང་། །ངའི་ཇོ་སྲས་འདི་འདི་ཀུན་སྣ་ལེན་དང་། བསུ་སྐྱེལ་བྱེད་དུ་གཞུག་པས། ཅིས་ཀྱང་འདིར་འབྱོན་པར་ཞུ་དགོས་གསུང་ནས། གསེར་སྲང་ཕྱེད་དང་། རེའུ་སྣམ་བུབས་གཅིག་རྫོངས་གདའ་སྐད། །དེར་བླ་མ་མར་པས་ལྷོ་བལ་དུ་ལོ་བཅུ་གཉིས་བཞུགས་ནས། ཡང་རྒྱགས་ཆད་དེ་བོད་དུ་གསེར་ཚོལ་དུ་བྱོན། དེར་དགེ་བཤེས་ཡབ་ནི་སྐུ་འདས། ཇོ་སྲས་ཆེ་ཤོས་ཀྱིས་དཔལ་མོ་རྡོ་འཕྲེང་གི་བར་དུ་བསུ་བ་མཛད་ནས། རྩང་གི་དགྱེར་ཕུར་བྱོན། །སྣ་ལེན་བཟང་པོ་བྱས། །ཟླ་བ་ཕྱེད་དུ་ཆོས་གྲྭ་གཙུགས་པ་ལ། དེའི་དུས་སུ་ཡར་ངོའི་ཚེས་བཅུའི་མཆོད་པ་གཅིག་མཛད་དེ། །དེའི་དུས་སུ་བླ་མ་ལ་ཇོ་སྲས་ཀྱིས་ཞུ་བ་ཕུལ། ངེད་ཕ་སྤད་ཀྱིས་བླ་མ་ལ་སྔན་ཆད་ཀྱང་བསྙེན་བཀུར་མི་ཆུང་བར་བྱས། ད་ཡང་བྱེད་དགོས་པས། སྔན་ཆད་བཞེངས་མ་མྱོང་བའི་འགུར་(མགུར་)ཅིག་བཞེངས་པར་ཞུ་འཚལ་ཞེས་ཞུས་པ་ལས། དེའི་དུས་སུ་ཁོ་བོ་ཁར་ཉིན་དཔྱིད་ཀ་བལ་པོའི་མཐིལ་ནས་ཡར་ཡོངས་པའི་ལམ་ཀ་ན། ལི་ཤོ་ཀ་རི་བྱ་བ་མཐའ་འཁོབ་ཀྱི་གྲོང་ཁྱེར་ཆུང་ངུ་ན་ཤོ་གམ་ལེན་པ་གཅིག་འདུག །དེར་ཞག་འགའ་སྡད་པས་རྒུད་གཅིག་གི་རྨི་ལམ་ན། ཞི་སྤྱོད་གི་(ཀྱི་)མཁའ་འགྲོ་མ་གཉིས་བྲམ་ཟེའི་ཆ་བྱད་དུ་སྤྲུལ་ནས་ཁོ་བོ་སྤྱན་འདྲེན་དུ་འོངས། དེར་ལྷོ་ཕྱོགས་དཔལ་གྱི་རི་ལ་ཕྱིན་ནས། བྲམ་ཟེ་ཆེན་པོ་དང་ཞལ་དངོས་སུ་མཇལ། དེའི་དུས་སུ་ཡིད་ལ་མི་བྱེད་པ་སྙིང་པོའི་དོན། །བྲམ་ཟེ་ཆེན་པོའི་ཞལ་ནས། ཁོ་བོས་འདི་ལྟར་ཐོས་སོ་ཞེས་འགུར་(མགུར་)དུ་བཞེངས་པའོ།། །།
1-1-227a
༄། །དོ་ཧ་རྡོ་རྗེ་མགུར།
དཔལ་དེ་རིང་བཀྲ་ཤིས་ཡར་གྱི་ངོ་། །དུས་ཁྱད་པར་ཅན་གྱིས་ཚེས་བཅུ་ལ། །དཔའ་བོ་དགའ་སྟོན་གྱི་ཚོགས་གྲལ་དུ། །བུ་འགྱུར་བ་མེད་པའི་དམ་ཚིག་ཅན། །ཁྱོད་གློག་ཀྱ་(སྐྱ་)སྟོན་པས་ཞུ་ཕུལ་བ། །རྗེ་སྔར་མ་ཐོས་པའི་གླུ་ལོང་སྐད། །ང་ཤུལ་རིངས་ལམ་ནས་བཤར་བ་དེས། །ལུས་ངལ་དུབ་དབང་དུ་ཐལ་བའི་ཕྱིར། །གླུ་ཡིད་འཕྲོག་སྙན་པ་ཅུང་མི་མཆིས། །ཚིག་སྡེབས་(སྡེབ་)སྦྱོར་མཁས་པ་མི་འཚལ་ཡང་། །བུ་ཁྱེད་ལས་ངོ་ཆེ་མེད་པའི་ཕྱིར། །ཞུ་ཆེན་གྱི་དཔྲལ་བ་མི་བཟློགས་པས། །དོན་སྔར་མ་ཐོས་པའི་ངོ་མཚར་ཅན། །རྗེ་བྲམ་ཟེའི་བཞེད་དགོངས་གླུར་ལེན་གྱིས། །ཁྱེད་གདན་གང་བཞུགས་ཀྱི་མདོ་སྔགས་རྣམས། །སྙན་ལྷན་ནེ་གསོན་ལ་ཐུགས་དགོངས་འཚལ། །དུས་ཁར་ཉིན་དཔྱིད་ཟླ་ཐ་ཆུངས་ལ། །བཞི་(གཞི་)བལ་པོའི་མཐིལ་ནས་ཡར་འདས་པ། །གདུགས་དྲོ་ལམ་མཆིས་པའི་ཤུལ་ཀ་ན། །བལ་པོ་གླིང་གི་ཤོ་ཀ་རི། །མཐའ་གདོལ་པ་ཅན་གྱི་གྲོང་ཁྱེར་དུ། །མི་བརྡའ་མི་མཇལ་གྱི་ཤོ་གམ་པས། །འདྲོན་ཁ་ཉེན་པོའི་བོད་རྣམས་བསྐྱིལ། །མི་ངས་ཀྱང་དབང་མེད་ཞག་ལྔ་བསྡད། །རྒུད་ནུབ་ཅིག་ཐམ་ཐུམ་རྨི་ལམ་ན། །རིགས་ཀྱི་མཚན་ལྡན་ཚངས་སྐུད་ཅན། །བྲམ་ཟེའི་བུ་མོ་མཛེས་མ་གཉིས། །ཅུང་ཟད་འཛུམ་ཞིང་ཟུར་མིག་བལྟ། །མི་ཁོ་བོའི་དྲུང་དུ་འོངས་ནས་ཀྱང་། །ལྷོ་དཔལ་གྱི་རི་ལ་འགྲོ་དགོས་སྐད། །ཁོ་བོ་སྔན་ཆད་ཕྱིན་མ་མྱོང་། །རྒྱུས་མེད་ལམ་ཡང་མི་ཤེས་སྨྲས། །བུ་མོ་གཉིས་ཀྱི་མཆེད་ན་རེ། །མིང་པོ་དཀའ་བ་མི་དགོས་སོ། །ངེད་ཀྱི་འཕྲག་ལ་ཁུར་རོ་ཟེར། །དྷོ་ལི་དར་གྱི་ལྡིང་ཁྲི་དེར། །གདུགས་བཞིན་མཁའ་ལ་བཏེག་ནས་ཀྱང་། ཀློག་འགྱུ་སྐད་ཅིག་ཡུད་ཙམ་
1-1-227b
གྱིས། ལྷོ་དཔལ་གྱི་རི་ལ་ཕྱིན་པ་རྨིས། །ཤིང་བླག་ཤ་ལྗོན་པའི་བསིལ་གྲིབ་ལ། །སྟི་ར་རོའི་གདན་སྟེངས་ན། །བྲམ་ཟེ་ཆེན་པོ་ས་ར་ཧ། །ཞལ་སྔར་མ་མཐོང་བའི་གཟི་མདངས་ཅན། །བཙུན་མོ་གཉིས་ཀྱི་སྐུ་བརྟེན་ཅིང་། །སྐུ་ལ་དུར་ཁྲོད་ཆས་ཀྱིས་བརྒྱན། །དགྱེས་པའི་ཞལ་རས་འཛུམ་དང་བཅས། །བུ་བདེ་བར་འོངས་སམ་ཞེས་ཀྱང་གསུང་། །དེ་མཐོང་དགའ་བས་མ་བཟོད་དེ། །ལུས་ཀྱང་བ་སྤུ་གཡོས་པ་སྙེམ། །ལན་བདུན་བསྐོར་ཞིང་བརྐྱང་ཕྱག་འཚལ། །ཞབས་མཐིལ་གཙུག་ཏུ་བླངས་ནས་ཀྱང་། །ཕ་ཐུགས་རྗེ་བཟུང་འཚལ་ཞུས་པ་ལས། །ལུས་ལ་སྐུ་ཡིས་བྱིན་བརླབས་པ། །ཕྱག་དབང་སྤྱི་བོར་བཞག་ཙམ་གྱིས། །ཟག་མེད་བདེ་བར་ར་རོ་བ། །གླང་ཆེན་ཆང་གིས་མྱོས་པ་བཞིན། །ལུས་གཡོ་འགུལ་མི་ཤེས་ཉམས་ཅིག་(གཅིག་)སྐྱེས། །ངག་ལ་གསུང་གི་བྱིན་བརླབས་པས། །སྟོང་ཉིད་སེང་གེའི་ང་རོ་ཡིས། །ཡི་གེ་བཞིའི་དོན་གསུངས་པ། །ལྐུག་པས་རྨི་ལམ་རྨིས་པ་བཞིན། །ང་སྨྲར་མི་བཏུབ་པའི་ཉམས་གཅིག་ཤར། །ཡིད་ལ་ཐུགས་ཀྱིས་བྱིན་རླབས་པ། །ལྷན་ཅིག་སྐྱེས་པ་ཆོས་ཀྱི་སྐུ། །འགྲོ་འོང་མེད་པའི་དོན་རྟོགས་པས། །དུར་ཁྲོད་ཉལ་བའི་མི་རོ་ལྟར། །བསམ་དུ་མེད་པའི་དོན་གཅིག་རྟོགས། །དེ་རྗེས་བདེ་ཆེན་དག་པའི་གསུང་། །རིན་ཆེན་འགུར་(མགུར་)གྱིས་བུམ་པ་ནས། །ཚངས་པའི་དབྱངས་ཀྱི་བརྡ་སྐད་ཀྱིས། །དཔེ་བྲལ་ནམ་མཁའ་སྟོང་པའི་དོན། །གནས་ལུགས་མཚོན་པ་རྡོ་རྗེའི་གླུ། །སྐྱེ་མེད་རང་སྒྲ་འདི་ལྟར་ཐོས།། །།ན་མོཿ སྟོང་ཉིད་སྙིང་རྗེ་དབྱེར་མེད་པ། །རྒྱུན་མི་འཆད་པ་གཉུག་མའི་སེམས། །གདོད་ནས་དག་པ་དེ་བཞིན་ཉིད། །ནམ་མཁས་ནམ་མཁའ་སྦྱོར་བ་མཐོང་། །རྩ་བ་
1-1-228a
ཁྱིམ་ལ་གནས་པའི་ཕྱིར། ཡིད་ཀྱི་རྣམ་ཤེས་བརྩོན་དུ་བཟུང་། །བསྒོམ་པའི་ཤེས་པ་ཕྱི་མ་ཡིས། །སེམས་ལ་ལྷན་པ་གདབ་དུ་(ཏུ་)མེད། །སྣང་སྲིད་སེམས་ཀྱི་རང་བཞིན་ཞེས། །གཉེན་པོ་སར་པ་བསྒོམ་དུ་མེད། །སེམས་ཀྱི་གནས་ལུགས་དྲན་དུ་མེད། །དེར་སྣང་བ་མ་བཅོས་ངང་ལ་བཞག །དེ་དོན་མཐོང་ན་ངང་ལ་བཞག །དེ་དོན་མཐོང་ན་གྲོལ་བའི་ཕྱིར། །བུ་ཆུང་གདོལ་བའི་སྤྱོད་པ་ལྟོས། །ཤ་ཟ་སྨྱོན་པ་གར་དགར་ཐོང་། །སྙེམས་དང་བྲལ་བའི་སེང་གེ་ལྟར། །བུང་བ་མེ་ཏོག་རྒྱུ་ལ་ལྟོས། །སེམས་ཀྱི་གླང་པོ་ཡན་དུ་ཆུག །འཁོར་བ་སྐྱོན་དུ་མི་ལྟ་ཞིང་། །མྱ་ངན་འདས་ལ་མི་རེ་བ། །ཐ་མལ་ཤེས་པ་རང་ལུགས་དེ། །མ་བཅོས་སོ་མ་ཉིད་དུ་ཞོག །བྱ་བ་རྣམས་ལ་ཁྱོད་མ་གཏོགས། །ཕྱོགས་དང་ཆ་ལ་མི་གནས་པ། །སྤྲོས་བྲལ་ནམ་མཁའི་དཀྱིལ་དུ་ལྟོས། །ཆོས་ཟད་སྐྱོལ་བ་སྙིང་པོའི་དོན། །ལྟ་བའི་མཐར་ཐུག་ཕྱག་རྒྱ་ཆེ། །སེམས་གནད་དུ་བསྣུན་པའི་བདེ་དོན་ཅིག །རྗེ་བྲམ་ཟེ་ཆེན་པོའི་ཞལ་ནས་ཐོས། །སྐད་ཅིག་ཉིད་ལ་གཉིད་ཀྱང་སད། །མ་བརྗེད་དྲན་པའི་ལྕགས་ཀྱུས་ཟིན། །མ་རིག་གཉིད་ཀྱི་མུན་ཁང་དུ། །རིག་པ་ཡེ་ཤེས་འཐོམས་པ་སྟེ། །སྤྲིན་མེད་མཁའ་ལ་ཉི་ཤར་ལྟར། །འཁྲུལ་པའི་མུན་ནག་གདང་ནས་ཐལ། །དུས་གསུམ་སངས་རྒྱས་ཀྱི་ཞལ་མཐོང་ཡང་། །ཕྱིན་ཆད་དྲི་རྒྱུ་མེད་དོ་སྙམ། །སེམས་ཕུ་ཐག་ཆོད་པའི་ཉམས་ཅིག་(གཅིག་)སྐྱེས། །ཡིད་འགྱུ་བ་ཟད་པ་ངོ་མཚར་ཆེ། །ལར་ཡི་དམ་མཁའ་འགྲོའི་ལུང་སྟོན་དང་། །རྗེ་བླ་མས་ལུང་བསྟན་ཟབ་མོའི་དོན། །སྨྲ་རུ་མི་བཏུབ་གསངས་ན་ཡང་། །རྒུད་དོ་ནུབ་མི་བླང་ཐབས་མ་བྱུང་། །དུས་ད་རེས་ཙམ་ལས་
1-1-228b
གཏོགས་པ། སྔན་ཆད་ངག་ཏུ་བརྗོད་མ་མྱོང་། །ཕྱིས་ཀྱང་ཟློས་སམ་རྣ་བས་ཉོན། །ང་སྔན་ཆད་ཤུལ་རིང་རྒྱང་གི་མི། །མཛའ་བཤེས་གཉེན་མེད་གྲོགས་ཀྱང་མེད། །ངལ་དུབ་བཀྲེས་པར་གྱུར་པའི་ཚེ། །བུ་ཁྱོད་ཀྱིས་ཅི་བྱས་ཡིད་ལ་ཡོད། །དེ་བརྗེད་དུ་མ་བཏུབ་ཡིད་ལ་བཅགས(བཅག)། །དྲིན་འཁོར་བར་ཐལ་ལོ་སྙིང་གི་གྲོགས། །གླུ་འདི་ལ་མཁའ་འགྲོ་བྱིན་རླབས་ཆགས། །རྗེ་གོང་ན་བཞུགས་པའི་བླ་མ་དང་། །བར་ཆོད་བསྲུང་བའི་ཞིང་སྐྱོང་རྣམས། །མི་སྤུན་ལ་བཀའ་བསྐྱོན་མི་གསུང་འཚལ། །རྗེ་མར་པ་ལོ་ཚ་(ཙྰ་)བ་རྨི་ལམ་དུ་ལྷོ་ཕྱོགས་དཔལ་གྱི་རི་ལ་བྱོན་ནས། །བྲམ་ཟེ་ཆེན་པོ་ས་ར་ཧ་དང་འཇལ་(མཇལ་)ཏེ། །སེམས་གནད་དུ་བསྣུན་པའི་སྙིང་པོའི་དོན་གྱིས་གདམས་ངག །དྷོ་ཧ་རྡོ་རྗེའི་འགུར་(མགུར་)གསན་པ་དེ་རྣམས་ལགས་སྐད། །རྗེ་མར་པ་ལས་མར་པ་མགོ་ཡགས་ཀྱིས་མཎྜལ་ཡང་ཡང་ཕུལ་ནས་ཞུས་པ། རྨི་ལམ་ལུང་བསྟན་གྱི་འགུར(མགུར)། །བླ་མ་མགོ་ཡགས་ལ་ལྕིམ་ལུང་གི་ངན་རྫོང་རས་པས་ཞུས་པའོ།། །།
༄། །ངོ་མཚར་ཆེ་རྒུའི་མགུར།
ན་མོ་གུ་རུ། བླ་མ་མར་པ་ཆེན་པོ་དེས། རྒྱ་གར་ཡུལ་དུ་ལན་གསུམ། །བལ་པོ་མཐིལ་དུ་ལན་གསུམ་སྟེ་དྲུག་བྱོན་པ་ལས། །དང་པོ་འབྲོག་མི་མྱུ་གུ་ལུང་པའི་སར་ལོ་གཅིག་ཁྱུད་བསྐོར་དུ་ལོ་ཚ་(ཙྰ་)བསླབས། །དེར་ཁོང་ཞལ་ཚ་(ཙྰ་)བ་དང་། བཀའ་མདོག་པ་གཉིས་འཛོམ་སྟེ། ཧ་ཅང་བསྡོད་སྙིང་མ་འདོད་ནས། ལྷོ་བལ་དུ་སེམས་བཏེག །གསེར་སྲང་བཅོ་བརྒྱད་ཁྱེར་ནས། བལ་པོའི་མཐིལ་དུ་བྱོན། འཕགས་པ་རང་བྱུང་དུ་ལོ་གསུམ་བསྡད། །བླ་མ་བལ་པོ་སྤྱི་ཐེར་བ་ལས་གདན་བཞི་ཉན་ཅིང་ཚད་པ་ལ་གོམས་སུ་བཅུག་ནས། བཟོད་རྒྱ་གར་དུ་བྱོན། །པཎ་ཌི་ཏ་(པཎྜི་ཏ་)ཡེ་ཤེས་སྙིང་པོ་དང་། དཔལ་
1-1-229a
ཀུ་སུ་ལི་པ་དང་། རྗེ་པེན་ཏ་བ་སྐུ་མཆེད་ལ་ཕ་རྒྱུད་དང་ཀྲི་ཡ་མང་དུ་མཉན། །ཕ་རྒྱུད་ཀྱི་བསྒྲུབ་ཡིག་དང་། གདམ་ངག་ཤ་སྟག་ཤ་སྟག་གསན་ནས། །ལོ་ལྔ་ན་རྒྱགས་ཆད་དེ་ཚུར་བྱོན་པས། བལ་ཡུལ་དུ་གསེར་བསྐྱེལ་བ་དང་ཕྲད་ནས་ཡང་ཕར་ལོག་ནས་བྱོན་ཏེ། བླ་མ་རྣམས་ལ་སྲང་དང་། ཞོ་ཤས་ཀྱི་མཎྜལ་ཕུལ་བས། རྗེ་པན་ཏ་བ་ན་རེ་ཁྱོད་ལ་དམ་ཚིག་ཡོད་པར་འདུག་པས། ངའི་བླ་མ་ལས་མ་རྒྱུད་ཉོན་ཅིག་གསུང་ནས། པུ་ལ་ཧ་རིར་བསྐྱལ། ཇོ་བོ་ན་རོ་པ་དང་ཕྲད་དེའི་རེས་ལ་དཔལ་ན་རོ་དང་། མེ་ཏྲིས་དབུ་མཛད་པ་བླ་མ་དགུ་དང་འཇལ(མཇལ)། །སློབ་གཉེར་གྱི་གཙོ་བོ་མ་རྒྱུད་ལ་བྱས། །ལོ་བདུན་བཞུགས། དྲིལ་བས་སྔ་རེས་ལོ་ལྔ། ཕྱིས་ལོ་བདུན་ཏེ་བཅུ་གཉིས་བཞུགས་ནས། ཡང་རྒྱགས་ཟད་དེ་བལ་པོར་བལྟ་ཉུལ་ལ་བྱོན་ནས། རྒྱགས་བསྐྱལ་མེད་དེ་བོད་དུ་ཟངས་ཀྱིས་ཕྱིན། ལ་སྟོད་གཙང་གི་དགྱེས་ཕུར། གློག་སྐྱ་སྟོན་པ་གཅིག་གིས་སྣ་ལེན་བྱས་ནས་ཆོས་ཞུས། དེ་ནས་དབུ་རུ་བྱང་ཕྱོགས་སུ་བྱོན་ནས། །བྱང་ནམ་རའི་གསེར་བརྡོལ་[བ་དང་]ཁ་ཐུག་ཏེ། འཕན་ཡུལ་དུ་མར་པ་མགོ་ཡགས་ཀྱི་གསེར་སྲང་བཅུ་གཉིས་ཕུལ་ནས་དབང་བསྐུར་ཞུས་པ་ལ། ཤ་མར། གོས་སྣམ་ཚུན་ཆད་རྩིས་མིག་ཏུ་བཅུག་པས། གསེར་སྲང་བཞི་བཅུའི་ཞབས་ཏོག་བྱས་གཞན་ཡང་བསྒྲུབ་ཡིག་ཁ་ཡར་གྱིས་གསེར་མང་པོ་རྙེད་དེ། ལོ་གསུམ་ལོན་ནས་ཡང་རྒྱ་གར་དུ་བྱོན་ནས། དཔལ་རྡོ་རྗེ་གདན་རྟེན་ཁྱད་པར་ཅན་རྣམས་ལ་མཆོད་པ་རྒྱས་པར་བྱས། སྐུ་དྲིན་ཆེ་ཆུང་གི་བླ་མ་ཐམས་ཅད་ཐུགས་མཉེས་པའི་བསྙེན་བཀུར་བྱས། རྗེ་འགྲན་གྱི་དོ་མེད་ན་
1-1-229b
རོ་པ་དང་། མེེ་ཏྲི་པ་གཉིས། མཆོག་གི་དངོས་གྲུབ་བརྙེས་པའི་རྣལ་འབྱོར་པ་ལྔ་ཡིས་ཁྱད་པར་དུ་ཡང་ཐུགས་ལ་བཏགས། དབང་བསྐུར་ཞིང་གདམ་ངག་དང་རྗེས་སུ་བསྟན་པ་ཐམས་ཅད་རྫོགས་པར་གནང་ངོ་། །བར་དུ་སྐལ་བ་དང་ལྡན་པའི་སྟོབས་ཀྱིས་ཕྱག་རྒྱ་ཆེན་པོའི་དངོས་གྲུབ་བརྙེས་པའི་རྣལ་འབྱོར་པ་དང་། རྣལ་འབྱོར་མ་བཅུ་གཉིས་བསྟེན་པ་ཡིན་ནོ། །དེ་ལྟ་བུའི་རྒྱུད་བྱིན་གྱིས་བརླབས་ཤིང་། གདམ་ངག་རིན་པོ་ཆེའི་མཛོད་ལ་མངའ་བརྙེས་པའི་རྣལ་འབྱོར་པ། རྗེ་ལོ་ཚ་(ཙྰ་)བ་མཚན་བརྗོད་པར་དཀའ་བའི་མར་པ་ཆོས་ཀྱི་བློ་གྲོས་དེས། རྒྱ་གར་དུ་ལོ་བཅུ་དགུ་བཞུགས་ཏེ། ནད་ཀྱི་ཐ་མ་བོད་དུ་བྱོན་པའི་དུས་སུ་མར་པ་མགོ་ཡགས་ཀྱིས། བླ་མ་ལ་སྐུ་ཚེའི་བར་ཆོད་བྱུང་ངམ་མ་བྱུང་དང་། བོད་དུ་འབྱོན་ནམ་མི་འབྱོན་གྱི་གཏམ་འདྲི་བ་ལ་བལ་པོ་ཐུག་པར་འགྲོ་སྙམ་ནས་འོངས་པས། བླ་མ་དང་མང་ཡུལ་ཀྱི་(གྱི་)གྲོང་གི་མ་ཟད་དུ་མཇལ། དེར་བླ་མའི་ཞབས་ཏོག་མཛད་ཅིང་འགྲོགས་ནས་བྱོན་པས། མྱང་སྟོད་བཞེངས་ཀྱི་མཁར་ཀོང་ཀར་པོ་བྱ་བ་ན། མར་པ་མགོ་ཡགས་ཀྱི་མེས་པོ་ཕྱུག་པོ་གཅིག་ཡོད་པས། སྣེ་ལེན་བྱས་ནས་ཟླ་བ་གཅིག་ཆོས་གསུང་ཞིང་བཞུགས། དེ་ནས་དབུས་སུ་ཟངས་ཀྱིས་གཤེགས་ཁར་བླ་མ་རྒྱ་གར་ནས་ཚུར་སྐུ་མ་ནོངས་པར་བྱོན་པའི་གཏང་རག་ཏུ་ཚོགས་ཀྱི་མཆོད་པ་གཅིག་གཏང་(བཏང་)ནས། དེའི་དུས་སུ་ཞུས་པས། བླ་མ་ལགས། བླ་མའི་རྗེ་ཆེན་པོ་ན་རོ་པ་དེ་དང་། ད་རེས་ཞལ་ལེགས་པར་མཇལ་ལམ། ཐུགས་མཉེས་པར་ཐལ་ལམ། སྔར་དང་ད་རེས་གཉིས་ལ་གདམ་ངག་གི་ལྷག་ལུས་སམ། ཁྱད་ཅི་གདའ་ཞུས་པས་ཡང་(ཀྱང་)བླ་མ་ལོ་
1-1-230a
ཚ་བས། རྗེ་ན་རོ་པ་དང་མཇལ་ལུགས་དང་། གདམ་ངག་ལྷག་ལུས་མེད་པར་ཅི་ལྟར་གནང་ལུགས་རྣམས་འགུར་(མགུར་)དུ་བཞེངས་པ། སྤྲུལ་སྐུའི་བཞུགས་གནས་རྒྱ་གར་ཡུལ། །ལྗོངས་ཡངས་པ་ཅན་གྱི་མ་ག་ཏར། །མུ་སྟེགས་རྒོལ་བ་ཚར་གཅོད་ཅིང་། །སྒོ་སྲུངས་ཆེན་པོ་མངའ་གསོལ་བ། །དཔལ་ན་རོ་ཞེས་བྱར་གྲགས་པའི། །རྗེ་སྤྲུལ་སྐུ་དེའི་ཞབས་ལ་འདུད། །ཤར་ཁྲི་སྒོ་རྩེགས་(རྩེག་)པའི་ཕོ་བྲང་ན། མི་ང་རང་ལྟ་རྟོག་བྱེད་པའི་ཚེ། །སེམས་གཅིག་མ་བདེ་ཡིད་གཅིག་འཕྱོས། དཔལ་ཆེན་ན་རོ་ཏུར་གྱིས་དྲན། །གདུང་བའི་སེམས་ལ་བཟོད་ཐབས་མེད། །བས་མཐའི་ནགས་ལ་ཚོལ་དུ་ཕྱིན། །རྒྱུས་མེད་རིགས་ངན་གྲོང་དུ་ཞུགས། །རྒྱལ་པོ་དྲེགས་པས་བཙོན་དུ་བཟུང་། །ཞག་གསུམ་རྒྱལ་པོའི་མཆོད་གནས་བྱས། །འབར་བའི་སྦྱིན་སྲེག་ཐབ་ཁུང་ནས། །ཅི་འདོད་བཟའ་བཏུང་བྱུང་བ་མཐོང་། །ཆེ་ན་ངོ་མཚར་དེ་ཆེ་མོད། །ཡང་ཅིག་(ཞིག་)བསྐྱར་ནས་ཚོལ་དུ་ཕྱིན། །འབྲས་དཀར་མོ་བྲེ་གསུམ་རྒྱགས་སུ་ཁྱེར། །ལྟང་ཀར་ཉ་ལ་བྱ་ན་བྱས། །རྗེ་བརྟུལ་ཞུགས་སྤྱོད་པའི་པེན་ཏ་བ། །ས་མཁན་ལམ་གྱི་གྲོགས་སུ་ཁྲིད། །ཟླ་ཕྱེད་བར་དུ་ཕྱོགས་བཞི་བསྐོར། །དུར་ཁྲོད་ནགས་ཚལ་ཁྱབ་པར་ཉུགས། །དེར་ཡང་རྗེ་བཙུན་ཅང་མ་རྙེད། །དཔལ་ཆེན་ན་རོ་མ་རྙེད་ཀྱང་། །ངོ་མཚར་ཆེ་བའི་ལྟས་རྣམས་མཐོང་། །ཤིང་ཙན་དན་སྨན་གྱི་སྡོང་པོ་ལ། །དགྱེས་རྡོར་སྤྲུལ་པའི་ལྷ་དགུ་རྣམས། །ཅུང་ཟད་མ་རེག་རེག་ལ་ཁད། །མཇའི་གུར་ཕུབ་ལྟ་བུར་མཐོང་། །ཆེ་ན་ངོ་མཚར་དེ་ཆེ་མོད། །མ་ལྷན་ཅིག་སྐྱེས་པའི་ཐུགས་ཁ་ནས། །ཨཥྚ་སྔགས་ཀྱི་འཁོར་ལོ་དེ། །མེ་ལོང་
1-1-230b
ནང་གི་གཟུགས་བརྙན་བཞིན། །ཕྱི་ལུས་ཀྱིས་མ་བསྒྲིབས་གསལ་བར་མཐོང་། །ཆེ་ན་ངོ་མཚར་དེ་ཆེ་མོད། །ཤིན་ཏུ་སྲ་འཁྲེགས་རྡོ་རྗེའི་བྲག །མཁར་སྒོང་ཤེལ་གྱི་ཕ་བོང་ལ། །རྗེ་ན་རོ་གཤེགས་པའི་ཞབས་རྗེས་དེ། །སྤུ་ཤད་རི་མོ་རྫོགས་པར་མཐོང་། །ཆེ་ན་ངོ་མཚར་དེ་ཆེ་མོད། །ད་ནི་རིང་པོར་མི་ཐོགས་སྙམ། །ཞག་གསུམ་བར་དུ་གསོལ་བ་བཏབ། །གཞན་རིགས་མངོན་ཤེས་མངའ་བའི་ཕྱིར། །དེ་ནས་རྗེ་བཙུན་དངོས་སུ་བྱོན། །ཆེ་ན་ངོ་མཚར་དེ་ཆེ་མོད། །ང་རབ་ཏུ་དགའ་ཆེས་ངུ་འབོད་བཏབ། །དམན་པའི་ཞབས་མཐིལ་སྤྱི་བོར་བླངས། །ཐུགས་རྗེ་ཆུང་ཞེས་སྨྲེ་སྔགས་བཏོན། །གདུང་བའི་མཆི་མ་ཁྲག་ལྟར་འཛག །ཆེ་ན་ངོ་མཚར་དེ་ཆེ་མོད། །ལུས་བཙུན་མོ་ལྟ་བུར་སྐུ་ལ་འཁྱུད། །སྙིང་ལ་སྙིང་སྤྲད་དཔྲལ་བར་གཏུགས། །དུས་དེར་དབང་རྫོགས་སེམས་ལ་བསྐུར། །ཆོས་རྫོགས་ཐུགས་ཀྱི་ཉིང་ཁུ་ཕྱུང་། །ཆེ་ན་ངོ་མཚར་དེ་ཆེ་མོད། །རྟོགས་པ་ནང་གི་ཉམས་ཤར་བ། །ཉོན་མོངས་ཡེ་ཤེས་གཅིག་ཏུ་འདྲེས། །རྣམ་རྟོག་རྦ་རླབས་དབྱིངས་སུ་ནུབ། །ཡིད་འགྱུ་བ་སེམས་ཀྱི་ཕུ་ཐག་ཆོད། །ཆེ་ན་ངོ་མཚར་དེ་ཆེ་མོད། །ལར་རྒྱ་གར་གྱི་ན་རོ་པན་ཆེན་དང་། །བོད་ཡུལ་གྱི་མར་སྟོན་བློ་གྲོས་གཉིས། །སངས་རྒྱས་དང་སེམས་ཅན་གཉིས་སུ་འཇལ(མཇལ)། །གྲུབ་ཐོབ་མི་འབྱུང་གི་སྟབས་མ་མཆིས། །ཆེ་ན་ངོ་མཚར་དེ་ཆེ་མོད། །བུ་སྙིང་དང་འདྲ་བའི་དམ་ཚིག་ཅན། །ང་གཞེ་ནིང་རྒྱ་གར་འགྲོ་ཙ་ན། ལོངས་སྤྱོད་འབྱོར་པ་ཕོངས་དུས་སུ། །རིན་ཆེན་གསེར་གྱི་ཡོལ་མོ་བཀང་། །གཏམ་གྲགས་སུ་རུང་བ་ངོ་མཚར་ཆེ། །ཁྱོད་གཏོང་བ་ཕངས་སེམས་མེད་པའི་ཕྱིར། །ལུས་གོས་དང་ལྷམ་
1-1-231a
གྱིས་འཇུག་བཏུལ་ནས། །ཅི་འདོད་ཐམས་ཅད་རྫོངས་སུ་བཏབ། [ཚེ་ཕྱི་མའི་རྒྱགས་ཕྱེ་གཏེར་དུ་སྦས། །དེ་ཕྱིར་ཕྱིར་བསམས་ཤིང་ངོ་མཚར་ཆེ། །བུ་ཕ་བས་ལྷག་པའི་གདུང་སེམས་ཅན། །ཁྱོད་མར་པ་མགོ་ཡགས་མ་ཡིན་ནམ། །ནོར་སྒྱུ་མ་གཏོང་བ་སྨོས་ཅི་དགོས། སྲོག་ཕངས་པ་མེད་པ་ཁྱོད་ཀྱི་ལུགས། །ཡོང་ངོ་མཚར་འདི་བས་ཆེ་བ་མེད། །དུས་ད་རེས་གདོང་ནས་བསུ་བ་དེ། །ལམ་བཤུལ་ཐག་རིང་བ་རྣམས་ཀྱང་བདེན། །ལྷོ་ཁ་ནག་བལ་བོད་གཉིས་ཀྱི་མཚམས། །དགུན་ལོ་གསར་ལ་མེ་ཏོག་སྐྱེ། །འབྲས་དཀར་ས་ལུ་འདེབས་པའི་ས། །བོད་སྐད་རིགས་མི་གཅིག་གིས་ཡུལ་ཁམས་སུ། །ནད་བདའ་མི་མཇལ་གྱི་ཚད་པ་ལ། །ཤི་ཆད་ཀྱི་འཇིགས་སྲོག་སྡོས་བྱས་ནས། །བུ་དཀའ་བའི་དམ་ཚིག་བསྲུངས་བའི་ཕྱིར། །ཕ་ངས་ཀྱང་མི་བརྗེད་སེམས་ལ་བཞག །དུས་འདི་ལ་མི་འབྲལ་ཨ་ཅང་ཆེ། །ཚེ་ཕྱི་མ་མི་འཛོམ་ཐབས་མེད་པས། ཡི་དམ་མཁའ་འགྲོའི་སྤྱན་སྔ་རུ། །འོ་སྐོལ་ཕ་སྤད་སྨོན་ལམ་གདབ། །ངས་བྱས་པ་དྲིན་དུ་བཟོ་བའི་ཕྱིར། །ཀླུ་འདི་ཀུན་ཁྱོད་ཀྱི་ངོ་རུ་བླངས། །ཁོང་གཞན་ལ་མི་སྒྲོགས་གསང་བར་ཞུ། །དྲིན་ལན་གྱི་ཆོས་སྐྱེས་ད་གཟོད་གཏེར། །སྙིང་གཏམ་ཡོད་དེ་ཁད་ཀྱིས་བཟླ། །འོ་སྐོལ་སྔོན་ལ་ཕྲད་པ་གྲོགས་ཀྱི་མཆོག །ད་མ་ཤི་བར་དུ་འགྲོགས་པར་བྱ། །ཞེས་དཔལ་ན་རོ་ཆེན་པོའི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་མཐོང་ལྟས་ངོ་མཚར་ཅན་རྣམས་སྲས་ཀྱི་ཐུ་བོར་གྱུར་པའི་མར་པ་མགོ་ཡགས་ལ་བྱས་པའི་དྲིན་ལན་བསབ་པའི་འགུར་(མགུར་)དུ་བཞེངས་ནས། དཔལ་ན་རོ་པའི་ཐུགས་དམ་པདྨ་དམར་པོའི་འཕྲེང་
1-1-231b
བ་བརྒྱ་རྩ་གཅིག་དང་། །མངའ་བདག་མེ་ཏྲི་པའི་ཕྱག་སོར་གྱི་རྡོ་རྗེའི་འགུ་ཡ་ཟུང་གཅིག་གནང་ནས། །བུ་ཁྱོད་ང་ལ་བྱས་པ་ཆེ་བ་ཡིན་པས། །ང་མ་ཤི་བར་དུ་ལྷན་ཅིག་ཏུ་སྡོད་དགོས། །ཚེ་ཕྱི་མ་ལ་མི་མཇལ་བའི་ཐབས་མེད་དུ་སྨོན་ལམ་གདབ། །དམ་ཚིག་གི་གནད་ཀྱིས་བསྡུས་པའི་ཕྱིར། །འོ་སྐོལ་ཕ་སྤད་སྐྱེ་གནས་མཚུངས་ནས་མཆི། །ཡང་རྟེན་འབྲེལ་དག་པའི་སྟོབས་ཀྱིས་ན། །སྦྱངས་པ་སྔ་མའི་ལས་སད་ནས་འོང་བས། །དེའི་དུས་སུ་ལམ་བསྐྱེད་རྫོགས་ཀྱི་བསྟན་པ་མཐར་ཕྱུང་བ། རྡོ་རྗེ་འཆང་ཆེན་པོའི་གོ་འཕང་ཐོབ་པར་བྱ་གསུང་། །དེར་མར་པ་མགོ་ཡགས་ཀྱང་བླ་མའི་ཕྱི་བཞིན་དུ་འབྲངས་ཏེ། །ལྷོ་བྲག་ཏུ་ཡང་བྱོན་ནས། །བླ་མ་མ་འདས་ཀྱི་བར་དུ་ཉིན་ཅིག་(གཅིག་)ཀྱང་མ་བྲལ་བར་བསྟེན་པ་ལགས་སྐད། ལར་བླ་མ་ལོ་ཚ་(ཙྰ་)བ་ཆེན་པོ་དེས་ཡེ་ཤེས་ཀྱི་མཁའ་འགྲོ་དང་། དཔའ་བོ་རྣམས་ལ་གསང་སྔགས་རྗེས་སུ་བསྟན་པའི་གནང་བ་ཐོབ། ཆུའི་བུམ་པ་དང་། ཤིང་ཐོག་ཁ་བྱེ་བའི་ནང་ནས་ཐུགས་དམ་གྱི་དཀྱིལ་འཁོར་ཞལ་གཟིགས། །ནང་དུ་འོད་གསལ་གྱི་རྩལ་སྦྱོང་ཞིང་། རྣམ་ཤེས་འཕོ་བ་དང་། གྲོང་འཇུག་ལ་སོགས་པ་མཐར་ཕྱིན་པའི་ཡོན་ཏན་ཐུན་མོང་མ་ཡིན་པ་མངའ་ཡང་། སྦས་པའི་རྣལ་འབྱོར་དུ་བཞུགས་ནས་ཕྱི་རོལ་ཐ་མལ་པ་དང་སྣང་ཚུལ་བསྟན་ཏོ། །འདོད་ཡོན་ལྔ་དང་། འཇིག་རྟེན་གྱི་ཆོས་བརྒྱད་ལ་རོལ་པའི་ཚུལ་གྱིས་སྣོད་ལྡན་གྱིས་(གྱི་)གང་ཟག་ལས་འཕྲོ་དང་། སྐལ་བར་ལྡན་པ་འགའ་དང་འགའ་ཡི་དོན་མཛད་དེ། རྣམ་སྨིན་གྱི་སྐུ་ཕྱག་རྒྱ་བཏུལ་བའི་ཚུལ་བསྟན་ནས། མཁའ་ལ་སྤྱོད་པའི་འོག་མིན་གྱི་གནས་སུ་གཤེགས་སོ། །རྗེ་མར་པའི་
1-1-232a
འགུར་(མགུར་)འདི་རྣམས་བླ་མ་མིད་ལ་དང་། མར་པ་མགོ་ཡགས་གཉིས་མ་ཡིན་པ་གཞན་ལ་གནང་བ་མེད་དོ། །རྗེ་བཙུན་ཞལ་གཉིས་ལ་དགེ་བསྙེན་བོ་དེ་ར་ཛས་ཞབས་ཀྱི་པདྨ་ལ་ཡུན་རིང་དུ་བསྟེན་ཅིང་ཐུགས་ཡོངས་སུ་མཉེས་པར་བྱས། བླ་མ་དང་དཀོན་མཆོག་ལ་མཎྜལ་ཕུལ། མཁའ་འགྲོ་ཆོས་སྐྱོང་ལ་གཏོར་མ་བཏང་། །ཚུལ་བཞིན་དུ་ཞུས་ཤིང་། བླ་མས་ཀྱང་དགྱེས་བཞིན་དུ་གནང་བ་མ་ལགས་པ། །ཁོ་བོས་རང་དགར་བྲིས་པ་ཅུང་ཟད་ཙམ་ཡང་མེད་དོ།། །།
༄། །ཆོས་ཕྱིར་དཀའ་བ་སྤྱད་པའི་མགུར།
ལྷོ་ལ་ཡག་ཏུ་བ་རང་ལྦ་བ་ཅན་གྱིས་བླ་མ་མར་པ་སྤྱན་དྲངས་ནས། ཆོས་གྲྭ་ཆེན་པོ་བཙུགས་པའི་དུས་སུ་མཚུར་སྟོན་ཆོས་འབྱུང་དང་། མར་པ་མགོ་ཡགས་གཉིས་ཀྱིས་དཔལ་གསང་བ་འདུས་པ་རྒྱུད་རྐྱང་གི་ལུགས་གསན། །རིམ་ལྔའི་ཁྲིད་བསྐྱངས་ཏེ། དེའི་དུས་སུ་ཁོང་ཞལ་གཉིས་ཀྱིས་ཞུས་པ། བླ་མ་ལགས་སྤྱིར་དམ་པ་རིན་པོ་ཆེ་ལ། ལྷོ་བལ་ན་བླ་མ་དུ་བཞུགས། །དེའི་ནང་ནས་ཀྱང་གྲུབ་པ་ཐོབ་ངེས་པ་འམ། སྐུ་དྲིན་ཆེ་བའི་བླ་མ་དུ་བཞུགས། དེ་རྣམས་ལ་ཆོས་ཅི་དང་ཅི་གསན་ཞེས་ཞུས་པས། །བླ་མས་ཇི་ལྟར་གསན་པའམ། དཀའ་སླ་ཇི་ལྟར་སྤྱད་ལུགས་རྣམས་ཀྱི་འགུར་(མགུར་)འདི་བཞེངས་པ་ཡིན་གསུང་ངོ་། །རྗེ་རྩོད་ལྡན་དུས་ཀྱི་རྡོ་རྗེ་འཆང་། །དཀའ་བ་སྤྱད་པའི་སྐྱེ་བུ་མཆོག །ཀུན་གྱི་སྤྱིར་གནས་ཐོད་བཞིན་བསྐུར། །དཔལ་ན་རོའི་ཞབས་ལ་སྤྱི་བོས་འདུད། །ང་ལྷོ་བྲག་མར་པ་བློ་གྲོས་འདི། །ལོ་བཅུ་གསུམ་ལོན་ནས་ཆོས་དང་ཕྲད། །དེ་སྔོན་སྦྱངས་གི་བག་ཆགས་སད་པ་འདྲ། །དང་པོ་ཡི་གེ་ཀ་ཁ་སླབས། །བར་དུ་སྒྲ་བསྒྱུར་ལོ་ཚ་(ཙཱ་)བསླབས། །ཐ་མ་ལྷོ་བལ་རྒྱ་ལ་ཕྱིན། །ལོ་
1-1-232b
གསུམ་བལ་པོའི་མཐིལ་དུ་བསྡད། །ཕ་བྱིན་བརླབས་(རླབས་)ཅན་གྱི་བལ་པོ་ལ། །རྒྱུད་གཉན་པར་གྲགས་པའི་གདན་བཞི་མཉན། །འཕོ་བ་གྲོང་འཇུག་གི་གདམ་ངག་ཐོབ། །ཆོས་སྐྱོང་དུད་སོལ་གྱི་ལྷ་མོ་ཞུས། །ཁོ་བོ་དེས་ཀྱང་འདོད་པ་ཅུང་མ་ཚིམ། །ཡུལ་རྒྱ་གར་དབུས་སུ་ཆོས་ལ་ཕྱིན། །ཆུ་མི་ཟན་དུག་གི་ཆུ་ལ་རྒལ། །ལུས་དུག་སྦྲུལ་བཞིན་དུ་ལྤགས་པ་རྗེས། །སྲོག་འདོར་བར་ཕོད་དེ་ཆོས་ལ་བསམས། །ནུབ་དུ་(ཏུ་)ལ་ཁེ་ཏྲའི་གྲོང་ཁྱེར་དུ། །དཔལ་ཡེ་ཤེས་སྙིང་པོའི་ཞབས་ལ་གཏུགས། །ཕ་རྒྱུད་གསང་བ་འདུས་པ་མཉན། །ལམ་རིམ་པ་ལྔའི་དོན་ལ་བསླབས། །སྒྱུ་ལུས་འོད་གསལ་གྱི་གདམ་ངག་ཐོབ། །ལྷོ་དུག་མཚོ་ཁོལ་མའི་གླིང་དུ་ཕྱིན། །དུས་ཉི་མ་གུང་ལ་སྨག་ཏུ་སྲོས། །ལམ་ད་ཅི་གསལ་བ་ད་ལྟར་སྟོར། །སྲོག་ཡལ་བར་དོར་ནས་རྗེ་བཙུན་བཙལ། །དཔལ་ཞི་བ་བཟང་པོ་དངོས་དང་མཇལ། །མ་རྒྱུད་མ་ཧ་མ་ཡ་ཐོས། །དབྱིབས་རྣལ་འབྱོར་གསུམ་གྱི་དོན་ལ་བསླབས། །སྒྱུ་མ་གསུམ་གྱི་གདམ་ངག་ཐོབ། །ཤར་དངོས་གྲུབ་ཀྱི་ཆུ་བོ་གང་འགའ་(གཱ་)རྒལ། །རི་རབ་ཏུ་འཁྲུགས་པའི་དུར་ཁྲོད་དང་། །མེ་ཏོག་མདངས་འཕྲོག་དགོན་པ་རུ། །རྗེ་གང་གཱ་མེ་ཏྲིའི་ཞབས་ལ་གཏུགས། །རྒྱུད་ཟབ་མོ་སྟོན་པ་གླུ་བླངས་ཐོས། །ཆོས་ཕྱག་རྒྱ་ཆེ་ལ་རྟོགས་པ་སྐྱངས། །སེམས་དངོས་པོའི་བཞུགས་ཚུལ་གཏན་ལ་ཕབ། །གཞི་མ་བཅོས་དོན་གྱི་ངོ་བོ་མཐོང་། །གནས་ངོ་མཚར་མཁའ་འགྲོས་ལུང་བསྟན་པའི། །བྱང་ཕྱོགས་པུ་ལ་ཧ་རིར་ཕྱིན། །དཔལ་དངོས་སྒྲུབ་ཅན་གྱི་དགོན་པ་རུ། །སྒོ་བསྲུངས་ན་རོ་པན་ཆེན་ལ། །རྒྱུད་ཟབ་མོ་དགྱེས་པ་རྡོ་རྗེ་ཐོས། །བསྲེ་འཕོ་འཚམས་(མཚམས་)སྦྱོར་གྱི་གདམ་ངག་ཐོབ། །ཁྱད་པར་གཏུམ་
1-1-233a
མོའི་ལས་རྒྱ་ཞུས། སྙན་རྒྱུད་ཀྱི་གནད་ལ་ངོ་སྤྲོད་བྱས། །དེ་ཡན་ཆད་འཛམ་གླིང་དབུས་སུ་གྲགས། །ཕྱོགས་བཞིར་བརྒྱུད་པའི་ཆུ་བོ་ཡིན། །ལར་དུར་ཁྲོད་ཉུལ་བའི་རྣལ་འབྱོར་དང་། །ཤིང་དྲུང་གནས་པའི་ཀུ་སུ་ལི། །ཡོངས་སུ་མ་གྲགས་འགའ་ཡོད་དོ། །རྫོགས་རིམས་ཁ་མཐོར་མང་དུ་ཞུས། །ངོ་མཚར་ཅན་གྱི་བསྒྲུབ་ཐབས་དང་། །ཕྲན་ཚེགས་ཀྱི་གདམ་ངག་རྩིས་ལས་འདས། །ལམ་བལ་པོའི་མཐིལ་དུ་ཕྱིན་ཙམ་ན། །ང་ལྷོ་བྲག་གི་མར་པ་ལོ་ཚ་(ཙཱ་)དང་། ཁ་རག་གཉོས་ཀྱི་ལོ་ཚ་(ཙཱ་)གཉིས། ལོ་ཚ་(ཙཱ་)གང་མཁས་གང་མཁས་ཟེར། །གདམ་ངག་གང་ཆེ་གང་ཆེ་ཟེར། །ཡར་བལ་བོད་འཚམས་(མཚམས་)སུ་ཐོན་ཙམ་ན། །ནོར་ཟང་ཟིང་གི་སྐུ་བསོད་ཁོང་ལ་སྐྱེས། །ལ་སྟོད་ཚོ་བཞིར་ཕྱིན་ཙམ་ན། །སྒྲ་བསྒྱུར་གྱི་གྲགས་པ་མཉམ་པོར་ཐོབ། །བོད་དབུས་གཙང་གི་ཐིལ་དུ་ཕེབས་ཙམ་ན། །གདམ་ངག་གི་སྙན་པ་ཁོ་བོས་ཐོབ། །བླ་མ་གྲུབ་ཐོབ་དང་མཇལ་ལགས་པས། །གདམ་ངག་ལ་མི་ཆེའི་དོགས་མ་མཆིས། །བདག་ཐ་སྙད་ལ་བྱང་ཆུབ་མི་རེ་བས། །གཞུང་བཤད་ཀུན་ཇི་ལྟར་དགྱེས་དགྱེས་མཛོད། །ཞེས་ལ་ཡག་ཏུ་བཞེངས་པའི་འགུར་(མགུར་)རོ། །བླ་མ་མར་པ་ལོ་ཚ་(ཙཱ་)བ་ཆེན་པོ་དེ། བླ་མ་རྔོག་གཞུང་པ་ཆེན་པོས་སྤྱན་དྲངས་ནས། དབྱར་གཞུང་གི་རི་བོར་ཆོས་གསུངས་ནས། ནམ་སླར་སེར་ཀ་དོལ་དུ་མཚུར་སྟོན་དབང་ངེས་གདན་དྲངས་ནས། དགྱེས་རྡོར་རྩ་རྒྱུད་ཚར་གཅིག་གསུངས། དེའི་རྒྱུད་ཐོན་པའི་ཚོགས་གྲལ་དུ། བླ་མས་འགུར་(མགུར་)འདི་བཞེངས་པ་ཡིན་གསུང་ངོ་། །རྗེ་མི་བསྐྱོད་ངོ་བོ་ཐུགས་རྗེ་ཅན། །མི་ཁོ་བོའི་སྤྱི་གཙུག་རྒྱན་དུ་བཞུགས། །མི་བདག་གི་དཀའ་སླའི་དཔེ་བཤད་ན། །ཁྱེད་འདིར་བཞུགས་ཀྱི་ཇོ་བོ་བོད་སྟོན་རྣམས། །ཆོས་སླ་
1-1-233b
བར་མ་དགོངས་ཚུལ་བཞིན་ཞུས། །ཁོ་བོ་མར་པ་ལོ་ཚ་(ཙཱ་)འདི། །སྐྱེས་པ་ལྷོ་བྲག་གཏིང་དུ་སྐྱེས། །ལས་འཕྲོ་མང་དཀར་ཕྱོགས་སུ་སད། །དཔལ་མུ་གུ་ལུང་གི་དགོན་པ་རུ། །སྒྲ་བསྒྱུར་འབྲོག་མིའི་ལོ་ཚ་(ཙཱ་)ལ། སྒྲ་ཐང་ལོག་སྐད་ཀྱི་ཡིག་ཚད་བསླབས། །ཁོང་སྐུ་དྲིན་མི་ཆུང་ཆེ་བར་ཁུམས། །སློབ་གཉེར་ལྷོ་བྲལ་ཕྱོགས་སུ་བགྱིས། །བདག་བལ་ཡུལ་གྱི་ལམ་དུ་ཞུགས་ཙམ་ན། །གཅན་འཕྲང་དང་ཆུ་ལ་རྒལ་དུས་མེད། །ནགས་འཐུག་པོ་གཅིག་ལ་ཐོན་དུས་མེད། །ལམ་རིང་པོ་གཅིག་ལ་བགྲོད་དུས་མེད། །ལམ་དེ་ཀུན་གྱི་བདེ་དོག་མཐོང་ཙམ་ན། །བྱ་དགུང་ལ་འཕུར་བ་གཤོག་པ་འདར། །འོན་ཀྱང་ངལ་དུབ་སྤྱད་རིན་ཆོག །ཡུལ་ལྷ་ལས་བབས་པའི་བལ་པོ་མཐོང་། །ཕྱི་འདོད་ཡོན་ལྟ་བས་ཆོག་མི་ཤེས། མི་འདོད་ཁམས་ཀྱི་ལྷ་བྲན་ཡིན་ནམ་སྙམ། །དུས་བསྐལ་པ་བཟང་པོར་འདུག་གོ་སྙམ། །ལམ་བགྲོད་པར་དཀའ་ཡང་ཕྱིན་ཏེ་ལེགས། །ཁོ་བོ་དེ་ནས་རྒྱ་གར་དུ་འགྲོ་ཙམ་ན། །མཐའ་འཁོབ་ཀྱི་ཇག་པ་ཤི་སྐྱིད་ལ། །སྲོག་ཅི་བདེར་ཐོན་པ་ཅུང་མ་བསམས། །གཅན་གཟན་གྱི་ངར་སྐད་ཐོས་ཙམ་ན། །ལུས་གཙང་སར་ཐོན་པ་ཡིད་ལ་མེད། །སྦྲུལ་ཆེན་གྱི་ཁ་རླངས་མཐོང་ཙམ་ན། །ཡིད་བརྟན་པོར་ཕྱིན་ཡང་གོམ་ཚུགས་འཁྱོར། །ལམ་དེ་ཀུན་གྱི་ཚ་གྲང་བཤད་ཙམ་ན། །དུས་ད་ལྟར་དྲན་ཡང་གློ་སྙིང་འདར། །ཆུ་གྲགས་པ་ཅན་གྱི་གང་གའ་རྒལ(གཱ་བརྒལ)། །འོན་ཀྱང་དཀའ་བ་སྤྱད་རིན་ཆོག །ཡུལ་དབུས་འགྱུར་ཚལ་གྱི་བཀོད་པ་མཐོང་། །དཔལ་རྡོ་རྗེ་གདན་གྱིས་སྣ་དྲངས་ནས། །རྟེན་ཁྱད་པར་ཅན་ལ་མཆོད་པ་བྱས། །ཁོ་བོ་ཕྱིན་པ་འཕྱིས་སོ་སྙམ། །ཆོས་སྙིང་ནས་ཚོལ་བའི་གདུང་སེམས་ཀྱིས། །ཡུལ་རྒྱ་གར་ཤར་ནུབ་ཆུ་
1-1-234a
བཞིན་ཉུགས། ཐང་ཆེད་པོ་གཅིག་ལ་ཕ་མཐའ་མེད། །མྱ་ངན་གྱི་ཐང་ལ་ཕྱིན་ནོ་སྙམ། །ཆོས་ཡིད་ལ་བསམས་ཀྱང་སྙིང་རླུང་འཕྱོ། །ནད་འཚོ་བར་དཀའ་བའི་ཚད་པས་ཐེབས། །ལར་དེའུ་ཤི་དེའུ་ཆད་བཅུ་གསུམ་བྱས། །ཁ་ཆེམས་ཚིག་གསུམ་བཞག་ས་མེད། །དབུགས་རྒྱུ་བ་ཆད་པ་ལན་གསུམ་བྱས། །དུས་དེའི་སྐྱིད་སྡུག་མཐོང་ཙམ་ན། །སྡང་དགྲའི་མིག་ནས་མཆི་མ་འཆོར། །འོན་ཀྱང་སྲོག་ཕོད་བྱ་རིན་ཆོག །རྗེ་ན་རོ་ཆེན་པོས་སྣ་དྲངས་པའི། །གྲུབ་ཐོབ་ཀྱི་བླ་མ་ལྔ་དང་མཇལ། །སྤྱིར་རྒྱུད་སྡེ་བཞི་ལ་ཉན་བཤད་བྱས། །ཁྱད་པར་མ་རྒྱུད་མཐར་ཐུག་བསླབས། །ཕ་རྒྱུད་གསང་བ་འདུས་པ་ཐོས། །ཤར་ཆུ་བོ་གང་གའི་འགྲམ་དུ་ཕྱིན། །རྗེ་མེ་ཏྲི་ཆེན་པོའི་བཀའ་དྲིན་གྱིས། །གཞི་ཆོས་ཉིད་སྐྱེ་བ་མེད་པར་རྟོགས། །སེམས་སྟོང་པ་ཉིད་ལ་སྤར་ཟིན་བྱས། །དོན་སྤྲོས་བྲལ་གཉུག་མའི་ངོ་བོར་མཐོང་། །སྐུ་གསུམ་མ་དང་མངོན་དུ་མཇལ། །མི་ཁོ་བོས་སྤྲོས་པ་དེ་ནས་ཆོད། །ལར་བོད་ཡུལ་དབུས་སུ་ལོག་ཙམ་ན། །གདམ་ངག་ཀྱང་ང་རང་ཆེ་བོ་སྙམ། །གྲུབ་ཐོབ་ཀྱང་ང་རང་ཆེའོ་སྙམ། །འགྲོ་དོན་མང་པོ་འགྲུབ་བོ་སྙམ། །དེ་མི་ངན་ཁོ་བོའི་ཞེ་གདངས་ལགས། །དཀའ་བ་སྤྱད་པའི་སྤྱད་ལུགས་ལགས། །ཆོས་དེ་ཙམ་དཀའ་བར་ཐུགས་དགོངས་ལ། །ཁྱེད་ལ་ལོ་མ་མཛད་བསྒྲུབ་པར་ཞུ། །རྗེ་མར་པ་ལོ་ཚ་(ཙྰ་)བའི་དཀའ་བ་སྤྱད་པའི་འགུར(མགུར)།། །།མར་པས་གནས་སྐབས་གཅིག་ཏུ་འགུར་(མགུར་)བཞེངས་པ། སྔ་ཕྱི་མེད་པར་ཚོགས་བསགས་པས། །ལོངས་སྤྱོད་སེར་པོ་གསེར་ལ་བྱས། །བླ་མ་བསྟེན་པ་དེ་ཙུག་(གཙུག་)ལགས། །བླ་མ་བསུ་སྐྱེལ་བྱས་པ་ཡིས། །ཞབས་ལ་འཁོར་ལོའི་རྒྱན་གྱིས་བརྒྱན། །རྒྱ་གར་བགྲོད་པ་
1-1-234b
དེ་ཙུག་(གཙུག་)ལགས། །བླ་མ་སྐུ་སུན་མ་བཏོན་པས། །མཁའ་འགྲོ་དབྱིངས་ནས་དགྱེས་པ་ཡིས། །བར་ཆད་མེད་པ་དེ་ཙུག་(གཙུག་)ལགས། །ཐེག་པ་ཆེ་ལ་བློ་བཞག་ནས། །འགྲོ་བ་ཡོངས་ལ་སེམས་བསྐྱེད་བྱས། །བོད་དུ་ཕན་པ་དེ་ཙུག་(གཙུག་)ལགས། །ན་རོ་དང་མེ་ཏྲི་ཐར་ལམ་གསུམ། །འདི་གསུམ་རྩ་བའི་བླ་མ་ཡིན། །གདམ་ངག་ཆེ་བ་དེ་ཙུག་(གཙུག་)ལགས། །གློག་སྟོན་མགོ་ཡག་མེས་རྔོག་བཞི། །སྙིང་དང་འདྲ་བའི་བུ་བཞི་ཡིན། །སྟན་(བསྟན)་པ་དར་བ་དེ་ཙུག་(གཙུག་)ལགས། །ཚུལ་དང་མཐུན་པར་བསྒོམས་པ་དེ། །མི་ལ་རྡོ་རྗེ་རྒྱལ་མཚན་ལགས། །གདམ་ངག་སྤྲུགས་པ་དེ་ཙུག་ལགས། །རྗེ་མར་པའི་འགུར་(མགུར་)རོ།། །།
༄། །རྡེང་ཚད་དྲུག་གི་མགུར།
རྗེ་མར་པས། རྡེང་(གདེང་)ཚད་དྲུག་གི་འགུར་(མགུར་)གསུངས་པ། བདག་ཐ་མལ་གྱི་དུས་ན་སྲོག་རྩོལ་བསྒོམས། །གཙན་ཐབས་བགྱིད་ཅིང་བགྱིད་ཅིང་བསྒོམས། །འབྱུང་བཞི་འཁྲུགས་ཀྱང་ཉམ་མི་ང་། །བོགས་འདོན་ཤེས་པའི་རྡེང་ཅིག་(ཞིག་)ཡོད། །བདག་གཉིད་ཀྱི་དུས་སུ་འོད་གསལ་བསྒོམས། །སྣང་བ་སྡུད་ཅིང་སྡུད་ཅིང་བསྒོམས། །གཏི་མུག་ཏུ་སོང་ཡང་ཉམ་མི་ང་། །ཟུང་འཇུག་ཏུ་ཤེས་པའི་རྡེང་ཅིག་(ཞིག་)ཡོད། །བདག་རྨི་ལམ་དུས་སུ་སྒྱུ་ལུས་བསྒོམས། །སྣང་བ་སྤྲོ་ཞིང་སྤྲོ་ཞིང་བསྒོམ། །རྣམ་རྟོག་ཏུ་སོང་ཡང་ཉམ་མི་ང་། །སྒྱུ་མར་ཤེས་པའི་གདེང་ཅིག་(ཞིག་)ཡོད། །བདག་ཐ་མལ་གྱི་དུས་སུ་གཞན་ལུས་བསྟེན། །བདེ་བ་བསྒོམ་ཞིང་བསྒོམ་ཞིང་བསྟེན། །ཆགས་པ་རུ་སོང་ཡང་ཉམ་མི་ང་། །ལྷན་སྐྱེས་སུ་ཤེས་པའི་རྡེང་གཅིག་ཡོད། །བདག་འཆི་བའི་དུས་སུ་འཕོ་བ་བགྱིད། །སྦྱང་ཞིང་སྦྱང་ཞིང་འཕོ་བ་བགྱིད། །འཆི་ལྟས་བྱུང་ཡང་ཉམ་མི་ང་། །བཙན་ཐབས་སུ་ཤེས་པའི་རྡེང་ཅིག་(ཞིག་)ཡོད། །བདག་ལུས་སེམས་འབྲལ་ན་བར་དོ་འཛིན། །བར་
1-1-235a
དོ་ཀུན་སྤྲིན་དང་ན་བུན་འདྲ། །འོད་གསལ་གཞན་སྣང་དུ་སོང་ཡང་ཉམ་མི་ང་། །སྔར་འདྲིས་མི་ཕྲད་ལྟ་བུའི་རྡེང་ཅིག་(ཞིག་)ཡོད། །རྡེང་དྲུག་གི་ཤེས་དང་མ་བྲལ་ན། །ཁམས་གསུམ་འཁོར་བར་ཉམ་མི་ང་། །ཞེས་གསུངས་སོ།། །།
༄། །ཇོ་སྲས་མདོ་སྡེ་ལ་འཕོ་བ་གདབ་པའི་མགུར།
ན་མོ་གུ་རུ། ཇོ་སྲས་མདོ་སྡེའི་དབུ་རྟས་དྲུད་ནས་ཚལ་པ་གསུམ་དུ་སོང་། །གྲོངས་ལ་ཁད་པ་དང་། ཡབ་ཡུམ་གཉིས་པོ་བྱོན་ནས། །གདམ་ངག་མ་ལུས་པ་ནི་གོང་དུ་བསྟན། །ད་ཐུགས་ལ་གསལ་ལམ་མི་གསལ། །འཕོ་བ་གདབ་དགོས་སམ་དགོངས་ནས། འགུར་(མགུར་)འདི་བཞེངས་པ། རྗེ་བླ་མ་རྣམས་ལ་ཕྱག་འཚལ་ལོ། །བཀའ་དྲིན་ཅན་ལ་སྐྱབས་སུ་མཆི། །བྱིན་གྱིས་བརླབས་པར་མཛད་དུ་གསོལ། །ཁོ་བོ་མར་པ་ལོ་ཚ་(ཙཱ་)འདིས། །རྒྱ་གར་ཡུལ་དུ་ལན་གསུམ་ཕྱིན། །མཚན་ལྡན་བླ་མ་གུས་པས་བསྟེན། །ཁྱད་པར་ན་རོ་མེ་ཏྲི་ལ། །རྒྱུད་འགྲེལ་གདམས་པ་མང་དུ་ཞུས། །དབང་བཞིའི་དོན་ལ་ཕྱག་འཛུབ་བཙུགས། །མཐར་ཐུག་ན་རོའི་ཐབས་ལམ་ཞུས། །ཁྱད་ཆོས་བསྲེ་འཕོའི་གདམ་ངག་ཞུས། །རྗེ་ན་རོ་པན་ཆེན་གྱི་བཀའ་སྩལ་ཐོབ། །མ་བསྒོམས་སངས་རྒྱས་འཕོ་བའི་གནད། །མ་གསངས་བུ་ལ་གོང་དུ་བཤད། །བུ་ཐུགས་ལ་དྲན་ནམ་རིགས་ཀྱི་བུ། །འདུས་བྱས་སྤྱིའི་མཚན་ཉིད་ནི། །མི་རྟག་འཇིག་པར་གྱུར་ན་ཡང་། །བུ་སྒྱུ་མའི་ལུས་པོས་རྟག་མ་ཐུབ། །གླད་པ་དུང་ཁང་འཁོར་ལོ་ཅག །གླང་རྒྱ་དར་དཀར་ཡོལ་བ་རལ། །བུ་འདི་ནས་ཕ་རོལ་འགྲོ་བ་ལ། །གདམས་པ་དྲན་ནས་མདོ་སྡེ་བ། །ཁོ་བོ་མར་པའི་ལོ་ཚ་(ཙཱ་)འདི། །སེམས་
1-1-235b
སྐྱེ་མེད་སྤྲོས་བྲལ་ཕྱག་རྒྱ་ཆེ། །ཕུང་པོ་ཁམས་དང་སྐྱེ་མཆེད་རྣམས། །ལྷ་དང་ལྷ་མོའི་རྣམ་པར་གསལ། །ཕ་ཇོ་ལྷ་དགུའི་དཀྱིལ་འཁོར་ཡིན། །བུ་སྒྱུ་ལུས་འཇོག་པ་བདེན་ན་ཡང་། ད་རེས་ཕ་ཇོའི་ཐུགས་ཀར་འཕོས། །དེ་སྐད་གསུངས་པ་དང་། ཡུམ་གྱིས་མ་སྙིང་ཐག་ཉེ་བ་ཡིན་པས། །ང་ལ་འཕོས་ན་སླ་སྟེ་འོང་སྙམ་ནས། །འགུར་(མགུར་)འདི་བཞེངས་པ། རྗེས་དུས་གསུམ་སངས་རྒྱས་ཐམས་ཅད་ཀྱི། །མཆོག་གི་སྤྲུལ་པ་རིན་པོ་ཆེ། །སྐྱེས་མཆོག་མར་པ་ལོ་ཚའི(ཙྰའི)། །ཞབས་ལ་སྒོ་གསུམ་གུས་པས་འདུད། །བུ་གསོན་དང་དར་མ་མདོ་སྡེ་བ། །ཡབ་ཀྱིས་གོང་གི་བཀའ་སྩལ་པ། །མི་རྟག་ཕ་རོལ་བཞུད་དོ་སྐད། །འདུས་བྱས་ཕུང་པོ་འཇིག་པ་ལ། །ཐུགས་ཁྲལ་ཆེ་བ་ཤིན་ཏུ་བདེན། །ཕ་ཇོས་བསྟན་པའི་གདམ་ངག་དང་། །གདམས་པ་མ་ལུས་འདི་རྣམས་ལ། །དུས་ད་ནས་ཐུགས་ལ་གསལ་མི་གསལ། །ན་རོ་པན་ཆེན་ཆོས་དྲུག་ལ། །དུས་ད་ནས་རྡེང་དང་ལྡན་མི་ལྡན། །ཁྱད་ཆོས་བསྲེ་འཕོའི་གདམ་ངག་ལ། །དུས་ད་ནས་ངེས་ཤེས་སྐྱེས་མ་སྐྱེས། །གཞི་སྐྱེ་མེད་ཕྱག་རྒྱ་ཆེན་པོ་ལ། །དུས་ད་ནས་མཉམ་བཞག་བརྟན་མི་བརྟན། །བུ་ཕ་རོལ་བཞུད་པའི་དུས་འདི་རུ། །རྗེ་མར་པ་ལོ་ཚ་(ཙཱ་)བའི་ཀ་(བཀའ་)དྲིན་གྱིས། །མ་ང་རང་ལྷ་མོ་བདག་མེད་མ། །དུས་གསུམ་སངས་རྒྱས་བསྐྱེད་པའི་ཡུམ། །སྙིང་པདྨ་འདབ་བཞི་སེང་གེའི་ཁྲི། །ཉི་ཟླ་པད་མའི་གདན་སྟེངས་ན། །སངས་རྒྱས་མར་པ་ལོ་ཚ་(ཙཱ་)བཞུགས། །བུ་རྣམ་ཤེས་ཚངས་པའི་མཐོངས་ནས་ཐོན། །ད་རེས་ཨ་མའི་ཐུགས་ཀར་འཕོས། །དེ་སྐད་ཅེས་གསུངས་པ་དང་། །འཆི་བ་ལ་
1-1-236a
ཉམ་ང་བག་ཚ་མ་མཆིས་ཏེ། ཡབ་ཡུམ་གཉིས་དྲིན་ལན་མ་ཁོར་བ་ལ་ཤིན་ཏུ་འཕྲེང་གསུང་ནས། འགུར་(མགུར་)འདི་བཞེངས་པ། །རྗེ་གསུམ་ལྡན་གྱི་བླ་མ་རིན་པོ་ཆེ། །དཔལ་རྡོ་རྗེ་འཆང་དང་ཞལ་དངོས་མཉམ། །མཚན་ལྡན་མར་པ་ལོ་ཚ་(ཙྰ་)དང་། ཡུམ་བདག་མེད་མ་ལ་སྐྱབས་སུ་མཆི། །ང་འདི་ནས་ཕ་རོལ་འགྲོ་བ་ལ། །ཉམ་ང་བག་ཚ་མ་མཆིས་ཏེ། །ཡབ་དགྱེས་རྡོར་སྤྲུལ་པའི་ལྷ་དགུ་དང་། །ཡུམ་སངས་རྒྱས་བསྐྱེད་བྱེད་བདག་མེད་མ། །དྲིན་ལན་མ་འཁོར་འཆི་བ་དེ། །ཅུང་ཟད་སེམས་ལ་འཕྲེང་བས་ཀྱང་། །འོན་ཀྱང་མི་ཕན་འཆི་བ་ལ། །ཕ་ཇོས་བསྟན་པའི་གདམ་ངག་དང་། །རྒྱུད་འགྲེལ་གདམས་པ་སེམས་ལ་གསལ། །ཕུང་པོ་ཁམས་དང་སྐྱེ་མཆེད་རྣམས། །ལྷ་དང་ལྷ་མོའི་རྣམ་པར་གསལ། །བསྲེ་འཕོའི་གདམ་ངག་མི་འཚལ་བས། །ཡབ་ཡུམ་ཐུགས་ཁྲལ་བྱ་མི་འཚལ། །ནང་རིག་པ་སྤྲོས་བྲལ་ནམ་མཁའི་རླུང་། །འཕོ་བ་འཕོ་བྱེད་རྟེན་དང་འབྲེལ། །རྣམ་ཤེས་གྱེན་ལ་འཕང་མི་འཚལ། །ཐུགས་ཀར་འཕང་བའི་དམིགས་པ་ལ། །རྩེ་གཅིག་རིག་པ་གཏད་མི་འཚལ། །ཡབ་ཡུམ་ཐུགས་ཁྲལ་བྱ་མི་དགོས། །ན་རོ་མེ་ཏྲིའི་རྒྱུད་འགྲེལ་དང་། །བསྲེ་འཕོ་གནད་ཀྱི་གདམས་ངག་རྣམས། །མ་རྔོག་ལ་སོགས་མཐུ་ཆེན་རྣམས། །བྱིན་བརླབས་(རླབས་)བསྟན་པ་དར་བ་མཛོད། །ཁོ་བོ་གསོན་ཡང་དེ་ལས་མེད། །བདེ་ཆེན་མཁའ་སྤྱོད་ཨུ་རྒྱན་དང་། །ཁྱད་འཕགས་གནས་སུ་ཡབ་ཡུམ་དང་། །གཏན་དུ་འཛོམ་པའི་སྨོན་ལམ་འཚལ། །དེ་སྐད་གསུངས་ནས་གྲོངས་པ་དང་། །ཐམས་ཅད་མྱ་ངན་ཤིན་ཏུ་ཆེ་ནས། །
1-1-236b
དུ་ཆོང་ལས་མེད། །རྗེ་བཙུན་ཡང་ཐུགས་མུག་པར་བྱུང་བ་ལ། གཅིག་གིས་ཞུས་པ། ཐམས་ཅད་སྒྱུ་མ་ཡིན་གསུང་བ་ལ། འདི་ཡང་སྒྱུ་མ་མིན་ནམ་ཞུས་པས། །ད་ལན་གྱི་སྒྱུ་མ་འདི་སྒྱུ་རྒོད་བྱུང་གསུང་སྐད། །རྗེ་མར་པས་དགུང་ལོ་མང་པོ་ནི་ལོན། །སྲས་ཇོ་སྲས་མདོ་སྡེ་དབུ་ཆག་ནས། །གྲོངས་པའི་དུས་སུ་ཐུགས་ལ་བསམ་པའི། །ཐུགས་འོད་གསལ་གྱིས་(གྱི་)ངང་ནི་ལམ་མེ་འདུག་སྟེ། །སྣང་བ་འདི་སྒྱུ་མ་ཡིན་པ་ལ། །བུ་འདི་རང་ཡང་སྒྱུ་མ་ཡིན་པ་ལ། །ཡོང་བསམས་ནས་འགུར་(མགུར་)བཞེངས་པ་ཡིན་གསུང་། །བུ་གཅེས་པར་གསོས་པའི་མདོ་སྡེ་དེ། །བླ་མ་བས་བཀའ་དྲིན་ཆེ་བར་བྱུང་། །བུ་རྟག་པའི་དངོས་པོར་མ་གྲུབ་སྟེ། །སྒྱུ་མའི་རང་བཞིན་དུ་གོ་ལགས་པས། །ལམ་འོད་གསལ་གྱི་ངང་དུ་ཡལ་ནས་ཐལ། །དཀའ་སླ་བྱས་པའི་མདོ་རྒྱས་དེ། །རང་མོས་པའི་རྟེན་དུ་བཞུགས་སྙམ་པས། །བུ་སྒྱུ་མའི་དངོས་པོས་རྟག་མ་ཐུབ། །ནོར་རྫས་ལ་དགོས་ཆེད་མ་མཆིས་པས། །སེར་སྣ་ལ་སྐྱེ་རྒྱུ་མ་རྙེད་དོ། །ཤ་ཁྲག་གིས་འབྲེལ་པའི་བུ་ཚ་དེ། །སེམས་ལ་མཚོན་ཆ་བས་གཟན་པ་ཅིག་(ཞིག་)བྱུང་། །གཉེན་ཆོས་སྐུ་འོད་གསལ་དུ་རྟོག་པ་དེས། །གཙེ་(བརྩེ་)གདུང་ལ་བྱ་ས་མ་རྙེད་དོ། །ཞེ་སྡང་སོག་(གསོག་)པའི་དགྲ་སྡང་དེ། །བུ་མདོ་སྡེ་བས་སྙིང་དུ་སྡུག་པ་ཅིག་(ཞིག་)བྱུང་། །དགྲ་དང་བུ་ལ་ཉེ་རིང་མ་རྙེད་པས། །ཞེ་སྡང་ལ་བསགས་ས་མ་རྙེད་དོ། །དཀའ་སླ་བྱས་པའི་རྒྱུད་སྡེ་བཞི། །ཐུགས་ལས་བྱུང་བའི་མན་ངག་གནད། །སྒྲ་ཐང་ལོག་སྐད་ཀྱི་ཡིག་ཚད་རྣམས། །ལམ་འོད་གསལ་གྱི་ངང་ལ་ཡལ་ནས་ཐལ། །
1-1-237a
ཐ་སྙད་ལ་བཤད་རྒྱུ་མ་རྙེད་དོ། །སེར་སྣ་བྱས་པའི་གནག་ལུག་རྣམས། །སྤང་ཁའི་རི་དྭགས་འདྲ་བ་ཅིག་(ཞིག་)བྱུང་། །ནོར་ཕྱག་རྒྱ་ཆེན་པོར་རྟོགས་པ་དེས། །མཚོ་སྐྱོང་ལ་བྱས་ས་མ་རྙེད་དོ། །ཕ་ཡུལ་བེ་གསར་གྱི་དབུ་ཡུལ་དེ། དྲི་ཟའི་གྲོང་ཁྱེར་དང་འདྲ་བ་ཅིག་(ཞིག་)བྱུང་། །ཡུལ་སྣང་སྟོང་དབྱེར་མེད་དུ་རྟོགས་པ་དེས། །ཕ་ཡུལ་ལ་དགོས་པ་མི་གདའོ། །ཆོས་རྣམས་རང་བཞིན་སྤྲོས་བྲལ་ལ། །མཐར་ཐུག་གི་འབྲེལ་པ་གང་ཡང་མེད། །གནས་སྐབས་ཀྱི་འབྲེལ་པ་ཟད་ནས་གདའ། །སྤྱིར་ཡུན་རིངས་བསྐྱངས་པའི་བསྒོམ་(སྒོམ་)ཆེན་ཚོ། །ཚེ་འདི་ལ་མངོན་ཞེན་མ་ཆེ་མཛོད། །བུ་དར་མ་བསམ་གཏན་གྱིས་སྣ་དྲངས་པའི། །ལྷག་མ་ལུས་པའི་བུ་དྲུག་ལ། །ཆགས་ཞེན་མ་སྐྱེ་སྒྱུ་མ་འདྲ། །དུས་གཏན་དུ་འགྲོགས་པའི་ཇོ་མོ་གཉིས། །འཛིན་ཆགས་མ་བྱུང་བདག་མེད་མ། །ཕ་སྤུན་ཉེ་དྲུང་མར་ཚོ་ལ། །དགོས་ཆེ་ན་མ་བྱུང་ན་བུན་འདྲ། །ན་འུན་(བུན་)འོད་གསལ་གྱི་དབྱིངས་སུ་ཐིམ། །ད་ནི་མར་ཆུང་ཡང་ན་སོ་ཟད་ནས་གདའ། །ཆོས་ཉིད་ཀྱང་ཟད་སར་སྐྱོལ་ནས་གདའ། །རྗེ་མར་པའི་ཇོ་སྲས་མདོ་སྡེ་གྲོངས་པའི་དུས་ཀྱི་འགུར་(མགུར་)རོ། །ན་མོ་གུ་རུ། རྗེ་མར་པ་ལོ་ཚ་(ཙཱ་)བས། ལ་སྟོད་ཁུམ་བུར་འགུར་(མགུར་)བཞེངས་པ། །དད་པ་བགྱི་བའི་གཡེད་པོ་དེ། །བློ་འཁོར་བ་ལས་ལོག་པའི་རྩ་ན་གདའ། །རང་ཚེ་འདིའི་བློ་དང་མ་བྲལ་ན། །རྐྱེན་གློ་བུར་གྱི་དད་པ་ལྟར་སྣང་ཡིན། །ཁའི་དད་པས་ཀྱང་རྣལ་འབྱོར་སླུ་བར་མཆིའོ། །བརྩོན་འགྲུས་བགྱི་བའི་གཡེད་པོ་ཆེ། །འཆི་བ་རྗེས་དྲན་གྱིས་རྩ་ན་གདའ། །
1-1-237b
མི་རྟག་པ་རྒྱུད་ལ་མ་སྐྱེས་ན། །ཁ་ལོང་མེད་པ་སྐད་ཟེར་ཡང་ལྟར་སྣང་ཡིན། །ལོ་འདོད་ཀྱི་ཆོས་ཀྱིས་བསླ་བར་མཆིའོ། །དམ་ཆོས་བགྱི་བའི་གཡེད་པོ་དེ། །ཉམས་སུ་ལེན་པའི་རྩ་ན་གདའ། །སེམས་དང་ཆོས་སུ་མ་འདྲེས་ན། །གནད་ཟབ་པ་སྐད་ཟེར་ཡང་ལྟར་སྣང་ཡིན། །དཔེ་ཆ་ཡིས་རྣལ་འབྱོར་བསླུ་བར་མཆིའོ། །ལྟ་བ་བགྱི་བའི་གཡེད་པོ་དེ། །ཆོས་བརྒྱད་སྙོམས་པའི་རྩ་ན་གདའ། །རང་གཟུང་འཛིན་གྱི་བློ་དང་མ་བྲལ་ན། །ཁ་བྱར་མེད་པ་སྐད་ཟེར་ཡང་ལྟར་སྣང་ཡིན། །ཁ་ལྟ་གོག་པོས་ཀྱང་བསླུ་བར་མཆིའོ། །བསྒོམ་པ་བགྱི་བའི་གཡེད་པོ་དེ། །སེམས་རང་གསལ་འཛིན་མེད་ཀྱི་རྩ་ན་གདའ། །རང་བྱིང་རྒོད་ཀྱི་སྐྱོན་དང་མ་བྲལ་ན། །བསྒོམ་བཟང་བ་སྐད་ཟེར་ཡང་ལྟར་སྣང་ཡིན། །ཞི་གནས་སེམས་འཛིན་གྱིས་བསླུ་བར་མཆིའོ། །སྤྱོད་པ་བགྱི་བའི་གཡེད་པོ་དེ། །སེམས་ཆགས་སྡང་སྤངས་པའི་རྩ་ན་གདའ། །དགག་བསྒྲུབ་(སྒྲུབ་)ཀྱི་བློ་དང་མ་བྲལ་ན། །ཁ་ཤུགས་འབྱུང་བ་སྐད་ཟེར་ཡང་ལྟར་སྣང་ཡིན། །ཚུལ་འཆོས་དང་ཐོ་ཆོས་བསླུ་བར་མཆིའོ། །དམ་ཚིག་བགྱི་བའི་གཡེད་པོ་དེ། །ཟོལ་སོག་(ཟོག་)སྤངས་པའི་རྩ་ན་གདའ། །རང་སེམས་དཔང་དུ་མ་བཙུགས་ན། །རྣམ་དག་པ་སྐད་ཟེར་ཡང་ལྟར་སྣང་ཡིན། །ཡིག་བརྒྱ་དང་བཤགས་པས་ཀྱང་བསླུ་བར་མཆིའོ། །འབྲས་བུ་བགྱི་བའི་གཡེད་པོ་དེ། །རང་སེམས་སངས་རྒྱས་ཀྱི་རྩ་ན་གདའ། །སྐུ་གསུམ་རང་ངོ་མ་ཤེས་ན། །གཞི་ལྷུན་གྲུབ་གྱི་སངས་རྒྱས་ལྟར་སྣང་ཡིན། །ནམ་ཤི་སངས་རྒྱས་ཀྱིས་བསླུ་བར་མཆིའོ། །དབྱངས་དེ་སྐད་ཁུམ་བུའི་སྒོ་རྩར་བླངས་ཞེས་གསུངས་སོ།། །།
1-1-238a
༄༅། །ན་མོ་གུ་རུ། ལས་འཕྲོ་དང་རྐྱེན་དུ་མ་འཛོམ་པའི། །སྡུག་བསྔལ་གྱིས་བྱང་ཆུབ་མ་རེ་མཛོད། །རང་བློ་བླ་མ་མ་གཏད་པར། །ཚུར་ཐུགས་ལ་འདོགས་པ་ནི་མ་རེ་མཛོད། །རང་རྒྱུད་སློབ་མར་གཏུབ་པར། །གཞན་གྱི་སློབ་དཔོན་འདི་མ་རེ་མཛོད། །རང་བློ་རང་གིས་མི་ཐུབ་པར། །གཞན་བློ་གཏོང་པ་འདི་མ་རེ་མཛོད། །བརྒྱུད་པ་རྣལ་མས་མ་ཟིན་པའི། །གྲུབ་རྟགས་ཀྱི་དངོས་གྲུབ་འདི་མ་རེ་མཛོད། །ཚོགས་གཉིས་རྩེ་བྲག་(དྲག་)ཏུ་མ་བསགས་པར། ཏོམ་ཅོལ་གྱི་བྱང་ཆུབ་འདི་མ་རེ་མཛོད། །སྒོམ་བསྒྲུབ་(སྒྲུབ་)དྲག་པོས་མ་བཅུན་པར། །ཡིད་སྨོན་གྱིས་སངས་རྒྱས་འདི་མ་རེ་མཛོད། །ངར་འཛིན་འཆང་བ་དང་མ་བྲལ་བར། །ཕྱོགས་མེད་ཀྱི་ཐུགས་རྗེ་འདི་མ་རེ་མཛོད། །དངོས་འཛིན་གྱི་འཆིང་བ་ལས་མ་གྲོལ་བའི། །མཐའ་བྲལ་གྱི་ལྟ་བ་འདི་མ་རེ་མཛོད། །གཅེར་མཐོང་གི་ངོ་སྤྲོད་མི་མངའ་བར། །དོན་ངོ་བོ་མཐོང་བ་འདི་མ་རེ་མཛོད། །དྲི་མ་སེལ་ཐབས་མི་ཤེས་པར། །བསྒོམ་རྒྱུན་ཆད་མེད་པ་འདི་མ་རེ་མཛོད། །འཁྲི་བ་ནང་ནས་མ་ཆོད་པར། །ཚོགས་དྲུག་ལྷུག་པར་འདི་མ་རེ་མཛོད། །ཉམས་ཏིང་འཛིན་རྩད་བརྡར་མ་ཆོད་པར། །ཡེ་ཤེས་ཆེན་པོ་འདི་མ་རེ་མཛོད། །རེ་དོགས་ཕྲ་མོ་མ་ཆོད་པར། །འབྲས་བུ་སྐུ་གསུམ་འདི་མ་རེ་མཛོད། །སྒྱུ་(རྒྱུ་)འབྲས་རྣལ་མས་མ་ཟིན་པའི། །གནས་སྐབས་ཀྱི་བདེ་འགྲོ་འདི་མ་རེ་མཛོད། །བསྒོ་བའི་བཀའ་བཞིན་མ་ཉན་པའི། །མཆེད་ལྕམ་མཉེས་པ་འདི་མ་རེ་མཛོད། །སྣང་བ་དབང་དུ་མ་འདུས་པའི། །ལྷ་མེད་འདྲེ་མེད་འདི་
1-1-238b
མ་རེ་མཛོད། །རང་སེམས་དབང་དུ་མ་འདུས་པའི། །བག་མེད་ཀྱི་སྨྱོ་སྤྱོད་འདི་མ་རེ་མཛོད། །རང་རྒྱུད་ཐ་མལ་ལས་མ་འཕགས་པའི། །ལས་དགེ་མེད་སྡིག་མེད་འདི་མ་རེ་མཛོད། །དགོན་པ་འཛིན་གྱི་བསྒྲུབ་(སྒྲུབ་)པ་པོ། །ཆོས་བརྒྱད་ཀྱི་གྲགས་སྙན་འདི་མ་རེ་མཛོད། །རི་ཁྲོད་འདྲིམ་གྱི་དམ་པ་ཀུན། །འཕྲལ་དགའ་སྐྱིད་ཚོལ་འདི་མ་རེ་མཛོད། །རང་སེམས་དཀར་ནག་མི་ལྟ་བར། །མི་ངོ་དཀར་ནག་མ་ལྟ་མཛོད། །ཉམས་རྟོགས་དོད་རྟགས་མི་ཤེས་པར། །བར་དོར་གྲོལ་བ་འདི་མ་རེ་མཛོད། །གདམ་ངག་དང་སྦྱངས་བར་མི་ལྡན་པའི། །སྐལ་ལྡན་གྱི་མགོ་སྐོར་འདི་མ་མཛད་མཛོད། །བསླབ་སྡོམ་ཚུལ་བཞིན་མི་བསྲུང་བའི། །མཁའ་འགྲོ་དང་ཆོས་སྐྱོང་འདི་མ་རེ་མཛོད། །ལུང་རིགས་གདམ་ངག་མི་ལྡན་པའི། །ཐ་སྙད་མཆུ་ལ་མ་རེ་མཛོད། །མངོན་ཤེས་ལྔ་དང་མ་ལྡན་པའི། །ཁ་ཕྱི་བལྟས་ཀྱི་ཞལ་ཆེ་མ་རེ་མཛོད། །བསྒོམ་ཡེངས་སུ་མེད་པར་མ་རྟོགས་པར། །རང་རྒྱུད་ཡན་པ་འདི་མ་རེ་མཛོད།། །།
༄། །བླ་ོབདེ་བཅུ་གསུམ་གྱི་མགུར།
རྗེ་བླ་མ་རྣམས་ལ་ཕྱག་འཚལ་ལོ། །བདག་འདྲའི་བློ་བདེར་འཇུག་པ་ལ། །ཕྱག་རྒྱ་ཆེན་པོ་ངོ་མཚར་ཆེ། །གཅིག་ཆོད་ཀྱི་གདམས་པ་བློ་རེ་བདེ། །འཕོ་བ་མི་དགོས་པ་ངོ་མཚར་ཆེ། །སྐྱེ་ཤིས་མི་འཇིགས་པ་བློ་རེ་བདེ། །ཕྱོགས་མེད་དུ་ཤར་བ་ངོ་མཚར་ཆེ། །ལྟ་བའི་ཕྱོགས་སུ་མ་ལྷུང་བ། །ཡིད་ལ་མེད་པ་བློ་རེ་བདེ། །བསྒོམ་པའི་ཕྱོགས་སུ་མ་ལྷུང་བ། །ཡེངས་པ་མེད་པ་བློ་རེ་བདེ། །སྤྱོད་པའི་ཕྱོགས་སུ་མ་ལྷུང་བས། །བཀག་པ་མེད་པ་བློ་རེ་བདེ། །འབྲས་བུའི་ཕྱོགས་སུ་མ་ལྷུང་བས། །ཐོབ་རྒྱུ་མེད་པ་བློ་རེ་བདེ། །ཉམས་
1-1-239a
ལེན་གྱི་ཕྱོགས་སུ་མ་ལྷུང་བས། །སྐྱོ་སྐྱོར་མི་བདེ་བློ་རེ་བདེ། །ལྡོང་བུའི་ཕྱོགས་སུ་མ་ལྷུང་བས། །སྡུག་སྡུག་མི་སྤྲང་བློ་རེ་བདེ། །མི་ཆོས་ཀྱི་ཕྱོགས་སུ་མ་ལྷུང་བས། །ཁེ་གྲགས་མི་འདོད་བློ་རེ་བདེ། །ཁྱིམ་པའི་ཕྱོགས་སུ་མ་སོང་བས། སོ་ནམ་མི་བྱེད་བློ་རེ་བདེ། །ཆོས་པའི་ཆོས་ཕྱོགས་སུ་མ་ལྷུང་བས། །ཆོས་སྤྱོད་མི་བྱེད་བློ་རེ་བདེ། །ཡོན་བདག་གི་ཕྱོགས་སུ་མ་ལྷུང་བས། །སྦྱིན་གཏོང་ལ་མི་རེ་བློ་རེ་བདེ། །རྗེ་མར་པ་ལྷོ་བྲག་པའི་བློ་བདེ་བཅུ་གསུམ་གྱི་འགུར་(མགུར་)རོ།། །།
༄། །ཀ་བཞིའི་ལུང་བསྟན་གྱི་མགུར།
ན་མོ་འགུ་(གུ་)རུ། རྗེ་མར་པའི་སྤྱན་སྔ་ན། །རྗེ་བཙུན་མིད་ལ་བཞུགས་པའི་དུས་ན། །གདམ་ངག་གི་སྤྲོས་པ་ཐམས་ཅད་ཆོད་པས། །ད་ནི་ཡུལ་དུ་འགྲོ་སྙམ་པས། །འགུར་(མགུར་)གྱི་ཞུ་བ་ཕུལ་བ། །བདག་མི་འདུག་ཡུལ་དུ་འགྲོ་བར་ཞུ། །རྩང་གི་སིལ་མ་ལ་རྩ་ན། །བསེ་མོ་མཆེད་བཞིའི་སུན་མ་ཡོད། །ཡུམ་དྲིན་ལན་ཅན་གྱི་{དཀའ་}(བཀའ་)ལེགས་དེ། །དུས་དེང་སང་གྲོངས་སམ་མི་གྲོངས་བལྟ། །ཁང་པ་ཀ་གཅིག་གདུང་གཉིས་དེ། །དུས་དེང་སང་འགྱེལ་ལམ་མ་འགྱེལ་ལྟ། །ཞིང་གཅིག་གློ་མོ་ཧཾ་ཁུང་དེ། །དུས་དེང་སང་འཇག་སྐྱ་ཨེ་འཕྱུར་བལྟ། །ཁྱིམ་ཚེས་ཨ་ཀུ་གཡུང་དཔལ་དེ། །དུས་དེང་སང་ཤི་འམ་མ་ཤི་ལྟ། །མོ་ལས་འཕྲོ་ཅན་གྱི་ལེགས་སེ་དེ། །དུས་དེང་སང་གནས་ལ་ཨེ་སོང་བལྟ། །བདག་མི་འདུག་ཡུལ་དུ་འགྲོ་བར་ཞུ། །ཞེས་ཞུས་པས། །དེ་ཉིད་ཅང་མི་གསུང་། །དེ་ནུབ་བླ་མ་རྣལ་དུ་སོང་བའི་རྨི་ལམ་དུ། སྐལ་ལྡན་བཞི་འབྱུང་བ་རྨིས། །ཕྱིད་ཉིན་བུ་སློབ་རྣམས་བསྡུས་པས་ཚོགས་འཁོར་གཅིག་མཛད་པས། །རྨི་ལམ་འགུར་(མགུར་)དུ་བཞེངས་པ། 
1-1-239b
རྗེ་འགྲོ་བའི་བླ་མ་རྡོ་རྗེ་འཆང་། །རྒྱལ་བ་སྐུ་འཁོར་སྲས་བཅས་ལ། །གུས་པ་མཆོག་གིས་སྐྱབས་སུ་མཆི། །མདང་རྣལ་དུ་སོང་བའི་རྨི་ལམ་ན། །རྨི་ལམ་མི་ངན་རྨི་ལམ་བཟང་། །ཤར་དུ་ཀ་ཆེན་གཅིག་བཙུགས་པ་རྨིས། །ཐོག་ཏུ་སོང་ཆེན་གཅིག་བབས་པ་རྨིས། །སེང་གཡུ་རལ་ཐ་ནས་རྒྱས་པ་རྨིས། །སེང་ནམ་མཁའི་དབྱིངས་སུ་མཆོངས་པ་རྨི། །བུ་རྨི་ལམ་མི་ངན་རྨི་ལམ་བཟང་། །ལྷོ་རུ་ཀ་ཆེན་གཅིག་གཙུགས་(བཙུགས་)པ་རྨིས། །ཐོག་ཏུ་སྟག་མོ་གཅིག་བབས་པ་རྨིས། །སྟག་འཛུམ་དྲུག་མཐའ་ནས་རྒྱས་པ་རྨིས། །སྟག་ཁོང་འཛུམ་ལན་གསུམ་བྱས་པ་རྨིས། །སྟག་མོ་ནགས་ལ་འགྱིང་བ་རྨིས། །སྟག་ཐང་ཤིང་རྒྱུད་དུ་འབྲེལ་པ་རྨིས། །བུ་རྨི་ལམ་མི་ངན་རྨི་ལམ་བཟང་། །ནུབ་དུ་(ཏུ་)ཀ་ཆེན་གཅིག་གཙུགས་(བཙུགས་)པ་རྨིས། །ཐོག་ཏུ་ཁྱུང་ཆེན་གཅིག་བབས་པ་རྨིས། །ཁྱུང་གཤོག་དྲུག་མཐའ་ནས་རྒྱས་པ་རྨིས། །ཁྱུང་བྱ་མིག་གནམ་དུ་བཟློག་པ་རྨིས། །ཁྱུང་ནམ་མཁའི་དབྱིངས་སུ་འཕུར་བ་རྨིས། །བུ་རྨི་ལམ་མི་ངན་རྨི་ལམ་བཟང་། །བྱང་དུ་ཀ་ཆེན་གཅིག་གཙུགས་(བཙུགས་)པ་རྨིས། །ཐོག་དུ་(ཏུ་)རྒོད་ཅིག་(གཅིག་)བབས་པ་རྨིས། །རྒོད་གཤོག་དྲུག་མཐའ་ནས་རྒྱས་པ་རྨིས། །རྒོད་བྱ་སྤུ་གནམ་དུ་གཟིངས་པ་རྨིས། །རྒོད་ཚང་བྲག་ལ་བཅས་པ་རྨིས། །བྱ་དེ་ལ་བུ་གཅིག་སྐྱེས་པ་རྨིས། །བྱ་བྲན་གྱིས་བར་སྣང་གང་བ་རྨིས། །བུ་རྨི་ལམ་མི་ངན་རྨི་ལམ་བཟང་། །ཤར་དུ་ཀ་ཆེན་གཅིག་བཙུགས་པ་དེ། །ཁྱོད་དོལ་གྱི་མཚུར་སྟོན་དབང་དེ་ཡིན། །ཐོག་ཏུ་སེང་ཆེན་བབས་པ་དེ། །ཁྱོད་མི་གཤིས་སེང་གེ་འདྲ་བ་ཡིན། །སེང་གཡུ་རལ་མཐའ་ནས་རྒྱས་པ་དེ། །སྙན་རྒྱུད་ཀྱི་གདམ་ངག་ཐེབས་པ་ཡིན། །སེང་ནམ་མཁའི་དབྱིངས་
1-1-240a
སུ་འཆོངས་(མཆོངས་)པ་དེ། བསྒོམ་པ་བསྒྲུབ་ཚད་དུ་སྐྱོལ་བ་ཡིན། །ལྷོ་རུ་ཀ་ཆེན་གཅིག་བཙུགས་པ་དེ། །ཁྱོད་གཞུང་གི་རྔོག་སྟོན་ཆོས་ངོར་ཡིན། །ཐོག་ཏུ་སྟག་གཅིག་བབས་པ་དེ། །ཁྱོད་མི་གཞི་སྟག་མོ་འདྲ་བ་ཡིན། །སྟག་འཛོམ་དྲུག་མཐའ་ནས་རྒྱས་པ་དེ། །བཤད་རྒྱུད་ཀྱི་བསྟན་པ་དར་བ་ཡིན། །སྟག་ཁོང་འཛུམ་ལན་གསུམ་བྱས་པ་དེ། །རྗེ་བླ་མའི་གདམ་ངག་ཐོབ་པ་ཡིན། །སྟག་མོ་ནགས་ལ་འགྱིངས་པ་དེ། །གདམ་ངག་ལ་ངེས་ཤེས་སྐྱེས་པ་ཡིན། །ཐང་ཤིང་རྒྱུད་དུ་འབྲེལ་པ་དེ། །བུ་ཚ་བོས་རྒྱུད་པ་ཟིན་པ་ཡིན། །ནུབ་ཏུ་ཀ་ཆེན་གཅིག་གཙུགས་(བཙུགས་)པ་དེ། །ཁྱེད་རྩང་གི་མེས་སྟོན་ཚོན་པོ་ཡིན། །ཐོག་ཏུ་ཁྱུང་ཆེན་གཅིག་བབས་པ་དེ། །ཁྱོད་མི་གཞི་ཁྱུང་དང་འདྲ་བ་ཡིན། །ཁྱུང་གཤོག་དྲུག་མཐའ་ནས་རྒྱས་པ་དེ། །ནང་གི་ཡོན་ཏན་རྒྱས་པ་ཡིན། །ཁྱུང་བྱ་མིག་གནམ་དུ་ཟློག་པ་དེ། །འཁོར་བ་ལ་ཕྱི་ཕྱག་འཚལ་བ་ཡིན། །ཁྱུང་ནམ་མཁའི་དབྱིངས་སུ་འཕུར་བ་དེ། །ཚེ་འདི་དང་ཕྱི་མ་བར་དོ་གསུམ། །སྐད་ཅིག་གིས་ཡུལ་དུ་ཆོད་པ་ཡིན། །བྱང་དུ་ཀ་ཆེན་གཅིག་བཙུགས་པ་དེ། །ཁྱོད་གུང་ཐང་གི་མིད་ལ་རས་པ་ཡིན། །ཐོག་ཏུ་རྒོད་པོ་བབས་པ་དེ། །ཁྱོད་མི་གཞི་རྒོད་པོ་འདྲ་བ་ཡིན། །རྒོད་གཤོག་དྲུག་མཐའ་ནས་རྒྱས་པ་དེ། །ལྟ་བའི་གདར་ཤ་ཆོད་པ་ཡིན། །རྒོད་བྱ་སྤུ་གནམ་དུ་གཟིངས་པ་དེ། །རླུང་སྲོག་རྩོལ་གནད་དུ་ཆུད་པ་ཡིན། །རྒོད་ཚང་བྲག་ལ་བཅས་པ་དེ། །ཁྱོད་བསྒོམ་སྲན་བྲག་བས་ཆེ་བ་ཡིན། །བྱ་དེ་ལ་བུ་གཅིག་སྐྱེས་པ་དེ། །བུ་འགྲན་གྱི་དོ་མེད་གཅིག་འབྱུང་བ་ཡིན། །བྱ་བྲན་གྱིས་ནམ་མཁའ་གང་བ་དེ། །བསྒྲུབ་རྒྱུད་ཀྱི་བསྟན་པ་དར་བ་ཡིན། །
1-1-240b
བུ་སློབ་མ་བས་ཀྱང་ཡང་སློབ་བཟང་། །བརྒྱུད་པ་ཇེ་བཟང་ཇེ་བཟང་འགྱུར། །བུ་རྨི་ལམ་མི་ངན་རྨི་ལམ་བཟང་། །ཅེས་གསུངས་པས་ད་ལྟ་དེ་བཞིན་དུ་བྱུང་ངོ་།། །།
༄། །ཚོགས་འཁོར་ནམ་བྱེད་ཀྱི་མགུར།
ན་མོ་གུ་རུ། རྗེ་མར་པ་ལྷོ་བྲག་པ་ལ། བླ་མ་མེས་ཚོན་པོས་འོད་གསལ་གྱིས་གདམ་ངག་གཅིག་ཞུས་པ་ལ། །ཚོགས་འཁོར་གཅིག་དགོས་གསུང་ནས། ཚོགས་འཁོར་གཅིག་མཛད་པས། །དེའི་དུས་སུ་རྗེ་བཙུན་གྱིས། རྒྱ་གར་དུ་ཚོགས་ཀྱི་འཁོར་ལོ་ཁྱད་པར་ཅན་ཇི་ལྟ་བུ་གཟིགས། །ཚོགས་ཀྱི་འཁོར་ལོ་དགོས་པའི་དུས་ནམ་ཡིན་ཞུས་པས། རྗེ་མར་པས་འགུར་(མགུར་)འདི་བཞེངས་པ་ཡིན། །ཚོགས་ཀྱི་འཁོར་ལོ་སྐད་པ་དེ། །སྨིན་ལམ་གྱི་དབང་བསྐུར་བྱེད་ཙམ་ན། །ཚོགས་ཀྱི་འཁོར་ལོ་དགོས་པ་ཡིན། །རྒྱུད་སྡེའི་ཉན་བཤད་བྱེད་ཙམ་ན། །ཚོགས་ཀྱི་འཁོར་ལོ་དགོས་པ་ཡིན། །དམ་ཚིག་བཤགས་བསྡམ་བྱེད་ཙམ་ན། །ཚོགས་ཀྱི་འཁོར་ལོ་དགོས་པ་ཡིན། །ཟབ་མོའི་གདམ་ངག་ཞུ་ཙམ་ན། །ཚོགས་ཀྱི་འཁོར་ལོ་དགོས་པ་ཡིན། །ཉམས་དང་རྟོགས་པ་སྤེལ་ཙམ་ན། །ཚོགས་ཀྱི་འཁོར་ལོ་དགོས་པ་ཡིན། །འཕྲིན་ལས་རྣམ་བཞི་བསྒྲུབ་ཙམ་ན། །ཚོགས་ཀྱི་འཁོར་ལོ་དགོས་པ་ཡིན། །མཁའ་འགྲོའི་བྱིན་རླབས་ཞུ་ཙམ་ན། །ཚོགས་ཀྱི་འཁོར་ལོ་དགོས་པ་ཡིན། །མི་ཁོ་བོ་མར་པ་ལོ་ཚ་(ཙྰ་)འདི། །ལར་རྒྱ་གར་ཡུལ་དུ་ལན་གསུམ་ཕྱིན། །སྤྱིར་ཚོགས་འཁོར་བསམ་གྱིས་མི་ཁྱབ་མཐོང་། །དགོས་ངོ་མཚར་ཆེ་བ་འདི་འདྲ་མཐོང་། །དཔལ་ལྡན་ན་རོ་པན་ཆེན་ལ། །རྗེའུ་རིགས་ཀྱི་དེད་དཔོན་ཙ་ཀྲ་དང་། །ཆང་འཚོང་གི་བུ་མོ་ཀུན་དྷ་ལིས། །རིན་ཆེན་འབར་བའི་མཎྜལ་ལ། །ཀར་ཤ་པ་
1-1-241a
ནིའི་རྒྱན་བཀོད་ཕུལ། །ལོ་གཅིག་གོང་ནས་གསོལ་བ་བཏབ། །དཔལ་ན་རོ་ཆེན་པོས་ཞལ་གྱིས་གཞེས(བཞེས)། །སེང་ལྡེང་ནགས་ཀྱི་དུར་ཁྲོད་དུ། །ཚོགས་འཁོར་རིམ་པ་གསུམ་དུ་བསྐོར། །ལོངས་སྤྱོད་འབྱོར་བ་དཔག་མེད་ལ། །ཚོགས་དང་གཏོར་མ་རྒྱ་ཆེན་བཤམས། །དཔལ་ལྡན་ན་རོའི་བྱིན་བརླབས་(རླབས་)ཀྱིས། །དཔལ་བདེ་མཆོག་འཁོར་ལོའི་ལྷ་ཚོགས་དང་། །གྲངས་མེད་མཉམ་པའི་རྣལ་འབྱོར་པ། །ཕོ་མོ་དྲུག་བཅུ་(ཅུ་)རྩ་གཉིས་འཚོགས། །ཟབ་མོ་བརྡའ་དང་སྐད་ཀྱིས་དྲིས། །ཆོ་གའི་རིམ་པ་རྒྱས་པར་བྱས། །རྗེ་བཙུན་ན་རོའི་ཐུགས་ཀ་ནས། །བདེ་མཆོག་འཁོར་ལོའི་ལྷ་ཚོགས་རྣམས། །དཀྱིལ་འཁོར་དབུས་སུ་ལེགས་པར་བྱོན། །དཔལ་ལྡན་ན་རོ་ཆེན་པོ་དེས། །རྡོ་རྗེ་དྲིལ་བུ་ཕྱག་དུ་(ཏུ་)བཟུང་། །ཁྲུ་གང་ཙམ་གྱི་ནམ་མཁའ་ལ། །གཡས་བརྐྱང་བ་ཡིས་རོལ་པ་མཐོང་། །རྣལ་འབྱོར་ཕོ་མོ་གཞན་རྣམས་ཀྱང་། །གཡས་པ་ཌ་མ་རུ་དཀྲོལ་ཞིང་། །གཡོན་པ་ཏིང་ཏིང་ཤག་གཟུང་(བཟུང་)ནས། །གར་གྱི་ཉམས་ཀྱིས་རོལ་བ་མཐོང་། །ཁོ་བོ་མར་པ་ལོ་ཚ་(ཙཱ་)བ། །ལྷན་ཅིག་སྐྱེས་པ་ཆོས་ཀྱི་སྐུ། །ཟབ་མོ་བཞིའི་ངོ་བོ་མཐོང་། །ལར་ཚོགས་འཁོར་དེ་འདྲ་མཐོང་བ་ཡིན། །དེ་འདྲའི་རྗེ་དང་མཇལ་བ་ཡིན། །འས་དང་འོས་ཀྱིས་ཚོགས་མི་མཆི། །ངོ་མཚར་བར་གདའ་འམ་རྩང་སྟོན་པ་ཞེས་གསུངས་སོ།། །།རྗེ་མར་པའི་འགུར་(མགུར་)ཉེར་ལྔའོ། །བཀྲ་ཤིས་བདེ་ལེགས་ཕུན་སུམ་འཚོགས་(འཚོག་)པར་ཤོག །ཡོན་མཆོད་འཁོར་བཅས་མཐའ་ཡས་སེམས་ཅན་རྣམས། །ཚེ་འདི་བདེ་སྐྱིད་ཕུན་སུམ་ཚོགས་པ་དང་། །བཀྲ་ཤིས་དགེའོ། །ཨོཾཱ་ཡེ་དྷརྨཱ་ཧེ་ཏུ་པྲ་བྷ་བཱ་ཧེ་དུན་ཏེ་ཤན་ཏ་(ཏུནྟེ་ཥྰཉྟ)ཐཱ་ག་ཏོ་ཧྱ་བ་དད་(དཏ་)ཏེ། ཥྞྩ་(ཥཱཉྩ་)ཡོ་ནི་རོ་དྷ་ཨེ་བཾ་བྷ་ཏི་(བཱ་དཱི་)མ་ཧཱ་ཥ་(ཤྲ་)མ་ན་(ཎ་)ཡེ་སྭཱ་ཧཱ། 
1-1-241b
ཨོཾ་བདེ་ལེགས་སུ་གྱུར་ཅིག །དཔག་མེད་བསྐལ་པར་ཚོགས་གཉིས་རབ་རྫོགས་ཞིང་། །སྒྲིབ་གཉིས་མུན་པའི་ཚོགས་ཀུན་རྣམ་བཅོམ་ནས། །དོན་གཉིས་ཕུན་ཚོགས་སྐྱེ་དགུའི་དཔལ་གྱུར་པ། །སྐུ་གཉིས་མངོན་གྱུར་ཡང་དག་རྫོགས་སངས་རྒྱས། །དཔལ་ལྡན་རྡོ་རྗེ་འཆང་ལ་སྐྱབས་སུ་མཆི། །ཁྱོད་ཐུགས་མཁྱེན་པའི་ཡེ་ཤེས་གསལ་བའི་ཆ། །བདེ་མཆོག་འཁོར་ལོའི་སྤྲུལ་པ་ཏེ་ལོ་པ། །ས་གསུམ་འདྲན་(འགྲན་)ཟླ་བྲལ་བས་བདག་སྐྱོངས་ཤིག །རིག་པའི་གནས་ལྔ་མ་ལུས་མཐར་ཕྱིན་ཞིང་། །བསྟན་པའི་མངའ་བདག་རྗེ་བཙུན་ཏེ་ལོ་པས། །ལེགས་པར་རྗེས་བཟུང་ན་རོ་པཎ་ཆེན་རྒྱལ། །དགྱེས་པའི་རྡོ་རྗེ་སྐད་གཉིས་སྨྲ་བའི་དཔལ། །གསང་སྔགས་རྒྱུད་སྡེ་ཆུ་བོ་འདུ་བའི་མཚོ། །ལྷོ་བྲག་མར་པ་ལོ་ཙྪ་རྒྱལ་གྱུར་ཅིག །སྒྲུབ་རྒྱུད་བསྟན་པའི་སྲོག་ཤིང་མཁྱེན་པ་གཉིས། །མངོན་གྱུར་མཁའ་འགྲོའི་དབང་ཕྱུག་རྡོ་རྗེ་འཆང་། །རྗེ་བཙུན་མིད་ལའི་སྐུ་ལ་ཕྱག་འཚལ་ལོ། །རྒྱལ་བས་ལུང་བསྟན་སངས་རྒྱས་སྨན་གྱི་ལྷ། །སྙིངས་མའི་དུས་སུ་རྗེ་བཙུན་སྒམ་པོ་པ། །ཟླ་འོད་གཞོན་ནུར་གྱུར་ལ་རབ་གུས་འདུད། །རྟོག་པའི་མཁའ་ལ་མཁྱེན་རྩེའི་སྤྲིན་སྤུང་འཁྲིགས། །ཐུགས་རྗེའི་ཆར་གྱིས་དགེ་བའི་ལོ་ཏོག་རྒྱས། །དོན་གཉིས་འབྲས་བུ་སྨིན་མཛད་མཐའ་རྩ་བ། །ཇི་ལྟར་མཁྱེན་པའི་ཡེ་ཤེས་མངོན་དུ་མཛོད། །ཇི་སྙེད་གཟིགས་པའི་རྒྱུ་འབྲས་ཕྲ་བ་རྣམས། །རྟེན་འབྲེལ་དུ་མས་ལེགས་པའི་ལམ་སྟོན་པ། །འཇིག་རྟེན་གསུམ་མགོན་ཆོས་རྗེའི་ཞབས་ལ་འདུད། །དེའི་
1-1-242a
མཁྱེན་རྩེའི་འཕྲིན་ལས་ཅིག་(གཅིག་)བསྡུས་པ། །རྒྱལ་བའི་སྲས་པོ་དབོན་རིན་ནས་བཟུང་སྟེ། །དབུ་རྒྱན་སྤྲུལ་པ་ཉེ་བརྒྱད་རིན་ཆེན་བར། །གདུལ་བྱའི་དབང་གི་རིམ་པར་བྱོན་པ་རྣམས། །བསྟན་པའི་རྒྱལ་མཚན་འགྲོ་བའི་དོན་མཛད་པ། །ལྷ་མིའི་གཙུག་རྒྱན་རྣམས་ལ་གུས་པས་འདུད། །ས་སྟེངས་མཚུངས་མེད་ཆོས་ཀྱི་རྒྱལ་པོ་དང་། །སྐུ་གསུམ་མངོན་གྱུར་ཨཱ་མོ་གཱ་ར་ཛཱ། །ཡབ་སྲས་གཉིས་ཀྱི་ཞབས་ལ་གུས་པས་འདུད། །འདས་པའི་དུས་ནས་མངོན་པར་སངས་རྒྱས་ཀྱང་། །གདུལ་བྱའི་སྣང་ངོར་སྒྲུབ་པའི་ཚུལ་མཛད་ནས། །སྐུ་གསུམ་མངོན་གྱུར་དཔལ་ལྡན་རྡོ་རྗེ་འཆང་། །ནམ་མཁའ་རྒྱལ་མཚན་ཞབས་ལ་ཕྱག་འཚལ་ལོ། །དེ་སྲས་ཐུ་བོ་རྒྱལ་བའི་འོད་རྒྱུད་ལ། །ལེགས་སྦྱངས་ཚུལ་བཞིན་སྒྲུབ་ལ་བརྩོན་པའི་འཐུས། །རིམ་གཉིས་བརྟེན་ཞིང་མཁྱེན་གཉིས་མངོན་དུ་མཛད། །སྒྲུབ་བརྙེས་ངག་དབང་རྒྱལ་མཚན་ཕྱག་འཚལ་ལོ། །སྣང་སེམས་ནམ་མཁའི་དོན་ལ་ཐུགས་སྦྱངས་ཤིང་། །བདེན་པར་གྲུབ་པའི་ཕྱོགས་ཞེན་རྡིང་ནས་ཞིག །གདོད་མའི་གནས་ལུགས་མངོན་དུ་གྱུར་མཛད་པ། །ངག་དབང་གྲགས་པའི་ཞབས་ལ་ཕྱག་འཚལ་ལོ། །སྦས་པའི་གྲུབ་ཆེན་ནམ་མཁའི་རྣལ་འབྱོར་པ། །ཡང་དག་དོན་ལ་རྨོངས་འཁྲུལ་པ་ཞིག །བརྗོད་མེད་གསུང་གི་ང་རོ་སྒྲོགས་མཁས་པ། །རདྣ་ར་ཛའི་ཞབས་ལ་ཕྱག་འཚལ་ལོ། །དེ་ལྟར་རྒྱུད་པ་ཡིད་བཞིན་ནོར་བུ་ཡི། །རྣམ་ཐར་བཞེངས་པས་བདག་སོགས་འགྲོ་བ་རྣམས། །ས་གསུམ་དོན་བདུན་རྡོ་རྗེ་འཆང་ཆེན་གྱི། །གར་དབང་བདག་པོ་རྒྱལ་བ་མྱུར་ཐོབ་ཤོག །
